سائیکل ءِ سر ءِ ورنا

Internet photo

اے نبشتانک چہ نامداریں اہوالکار ءُ ناول نویس محمد حنیف ءِ انگریزی کتاب ءَ تاج بلوچ ءُ ساجد حسین ءَ رجانک کُتگ۔ اے کتاب بیگواہیں بلوچانی سرا انت۔ اشی ءِ پش کپتگیں بہر یک یک ءَ بلوچستان ٹائمز ءَ شنگ کنگ بنت۔

چہ سریاب روڑ کوئٹہ ءَ بیگواہ بوگا شش سال رند پولیس ءَ حافظ سعید رحمان ءِ شوہاز کنگ ءِ واستا کبرے کلونڈ اِت۔ کورٹ ءَ پرمان داتگ ات کہ لاشے چہ کبر ءَ درکنگ بِبیت چیا کہ پولیس ءَ آئی ءِ بیگواہی ءِ دگہ بازیں اُزرانی ہمرائی ءَ اے ہم گشتگ ات کہ حافظ سعید کُشگ بوتگ۔  آئی ءِ پت اللہ بکش بنگلزئی ءَ، کہ ہپت سال ءَ وتی چُک ءِ در کنگ ءِ واستا جہد ءَ اَت، پولیس ءِ ہبر باور ن>بوت۔ ”مں زانت کہ اے آئی ءِ کبر نہ انت، مں زانت کہ آ نہ مُرتگ،“ اللہ بکش ءَ پر لیس اِت۔ آئی ءَ لوگ ءِ کش ءَ پرچون ءِ دکانے ہست۔

اللہ بکش بنگلزی ءِ ستک ءِ سبب ایش نہ اَت کہ پِتے وتی مستریں چُک ءِ مرگ ءَ ہچ وڑا منّگ نَلوٹیت۔ آئی ءَ ہما کبر ءَ کّلیں لاش چم ء وت دیستگ ات۔ شش سال پیسر، وتی نوک بیگواہ بوتگیں چُک ءِ شوہاز ءَ آئی ءَ بازیں میّت جاہے گولِتگ اَت۔ ”آہاں منا دو لاش پیش داشت،“ اللہ بکش ءَ گُشت۔ آئی ءَ شر چارِتنت۔ ”دوئیں منی چک ءِ عمرئیگ اتنت۔ یک بچکے ءِ گُٹ تَل ات۔ دومیگ ءِ پاد کونڈاں چہ جہل سِستگ اتنت۔ من سارتیں گینّے کش اِت کہ دوئیں منی چُک نہ اتنت“۔

دیم ءِ شش سال ءَ آئی ءِ چُک ءَ بس برے برے رپورٹ، سرکاری کاگد ءُ کورٹ ءِ پیشیانی تہا زاہری دات۔ یک رندے بلوچستان ہائی کورٹ ءَ اے منّگ بوت کہ آ انٹیلیجنس ادارہانی دست ءَ انت۔ دگہ رندے آئی ءَ گشگ بوت کہ آئی ءِ چُک ءَ 25 سال ءِ سزا دیگ بوتگ چیا کہ آ دہشت گردے۔ پدا ہائی کورٹ ہال دیگ بوت کہ آ گجرانوالہ ءَ جیل انت۔ بلے انگہ شَش سال ءِ تچ ءُ تاگ ءُ ہر دروازگ ءِ ٹُکگ ءَ رند اللہ بکش کبرے ءِ کش ءَ اوشتاتگ ءُ لاشے ءِ درکنگ ءِ ندارہ چارگا ات۔ آ وتی دل ءَ جزم ات کہ اے آئی ءِ چک نہ انت۔

حافظ سعید 4 جولائی 2003 ءِ بیگاہ ءَ چہ وتی لوگ ءَ دراتک۔ جمعہ ءِ روچ ات ءُ ہمے دَمگ ءَ بلاہیں ترْاکے بوتگ ات۔ ترْاک ءَ چِل مردم ءِ بیران بوگا رند کرفیو جنگ بوتگ ات۔ ”مگرب ءِ نماز ءَ رند آ لوگ ءَ اتک، وتی سائیکل ئےِ زرت ءُ دراتک،“ اللہ بکش ءَ گیر آران ءَ گشت۔ آ یکّیں گپ ءَ پِر لیسیت، گشئے چیزے بے ہال ئےِ کتگ ءُ اگں سرجمیں کسّہ ءَ شر گِیر بیاریت وتی چُک ءَ درگیتک کنت۔ ”شہر ءَ مئے نیمگا کرفیو جَنگ بوتگ ات۔ کرفیو 6 بج ءَ بندات بوت ءُ حافظ 6:15 ءَ چہ لوگ ءَ دراتک۔“ شش سال ءَ وتی یادداشت ءِ پٹّگ ءَ رند آ انگت نزانت آ روچی کرفیو ءِ جَنگ بوگا رند پرچہ آئی ءِ چُک چہ لوگ ءَ دراَتک۔

۔ ”بلکیں آئی ءَ دل ءَ ہمے گشتگ کہ اگں تو سائیکل ءَ سوارئے کس ترا جُست نہ کنت۔ یا بلکیں آئی ءَ نزانتگ کہ کرفیو جَنگ بوتگ۔ من نزاناں آئی ءِ ہیال چے بوتگ“۔

حافظ سعید ءِ عمر 25 سال ات وہدے آ بیگواہ بوت۔ آ ہبر زوروکیں ءُ سرپدیں چُکے اَت۔ پانزدہ سال ءِ عمر ءَ قران ئےِ دل یات کت۔ پدا میٹرک ءِ چکّاس ئےِ پرائیویٹ پاس کت۔ اقرا اسکول ءَ چُکاں قران ئےِ حفظ کنائینتگ۔ آ مستریں چُک اَت ءُ آئی ءِ شور بوتگ کہ سالے پد سور بِکنت، بلے بیگواہ بیت۔

مدرسہ ءَ وانگ، اسکول ءَ قران وانیینگ، ریش، کُپّی ءَ لانتکگیں شلوار فوج ءُ پولیس ءُ دگہ بازینے ءَ شَکّ ءِ تہا دور دینت کہ بِگندئے آئی ءَ گوں مذہبی گروہ یا جہادی گلے ءَ بندوکی یے بوتگ۔ ”آئی ءَ چُشیں ہچ کار نہ کتگ۔ اسکول ءَ وانینگ ءَ رند آ تچک ءَ غریب آباد ءَ منی دکان ءَ اتکگ منا کمک ئےِ کتگ۔ آئی ءَ لہتیں تروزتک ءُ ناکوزتک بوتگ کہ آہاں ہم مدرسہ ءَ وانینتگ۔ آ برے برے آئی ءِ چارگ ءَ اتکگ انت۔ من ہجبر آہاں سیاسی گپ ءَ ندیتگ۔ آ سکّیں ہدا ترُسیں مردمے بلے دگہ چپ ءُ چوٹ ئےِ مان نہ بوتگ۔ آ منی مستریں چُک اِنت ءُ چہ مں سک نزّیک بوتگ۔ چُشیں گپّے بوتیں مں سرپد بوتگ اتاں“۔

۔ ”آ شپی حافظ لوگ ءَ واتر نَبوت۔ چوش ہجبر نَبوتگ کہ منی چُک ءَ لوگ ءَ چہ ڈن شپے گوازینتگ۔ من پریشان بوتاں ءُ آئی ءِ شوہاز ءَ دراتکاں“۔

حافظ سعید ءُ آئی ءِ خاندان ءَ گوں کس ءَ ذاتی دشمنی نہ بوتگ۔ آئی ءِ پت ءَ دل ءَ ہمے گُشت کہ کرفیو ءِ وہدا ڈنّ ءَ دراہگ ءِ سبب ءَ فوج ءُ پولیس ءَ گپتگ۔ آئی ءَ اے ہم جیڑت کہ یکے ءَ ملام ءِ واستا آوار جتگ بلے پدا آئی ءَ وتا گشت کہ کس چرائی ءِ وڑیں نیزگاریں مردمے ءَ ملام ءِ گَت ءَ نہ گیپت۔ آئی ءَ پولیس ءَ کیس درج کُت، ہسپتال گول اتنت ءُ ہر کس کہ دپ کپت وتی چُک ءِ جست ئےِ کت۔

۔ ”پانزدہ روچ رند مردمے منی گندگ ءَ اتک،“ اللہ بکش ءَ گُشت۔ ”آ موٹر سائیکل ءَ سوار ات، گُشت ئےِ آئی ءِ نام یاسین انت ءُ چہ ملٹری انٹیلیجنس ءِ نیمگا اتکگ“۔ ایم۔آئی ءِ یاسین ءَ اللہ بکش جست کت کہ آئی ءِ چُک ءِ گوں جہادی گَلے ءَ واستا است؟ ”من آئی ءَ گشت کہ آئی ءَ گوں کس ءَ واستا نیست بید ء چُکّانی وانینگ ءُ منی دکان ءَ“۔

موٹر سائیکل والا مرد ءَ اللہ بکش دلجمی دات کہ ایم۔آئی پٹ ءُ پول کنت ءُ اگں آئی ءِ چک سیکورٹی ادارہانی کرّا انت یلہ دیگ بیت۔ تاں سئے ماہ ءَ اللہ بکش ءَ شر پَٹّ ءُ لوٹ کُت بلے آئی ءَ چہ ہچ کس ءُ ہچ نیمگا گوش مالومی نہ رس اِت۔ آئی ءَ ہائی کورٹ ءَ کیس کُت۔

کورٹ ءِ کیس ءَ نوں ہپت سال بیت ءُ کورٹ ءَ باز رند ءَ اے پرمان جاری کتگ کہ بیگواہیں مرد ءَ را آئی ءِ وارثاں پیش دارگ بِبیت بلے یک رندے ہم آئی ءَ وتی چُک ءِ دیدار نہ بوتگ۔ اے دراہیں مدّت ءَ آئی ءَ وتی چُک ءِ گوماں ہچ وڑیں ہال اہوال نہ بوتگ۔

بنداتی پیشی یے ءِ تہا چہ آئی۔ایس۔آئی ءِ نیمگا یک بیانے ءَ گشگ بوتگ ات کہ تراکے ءِ تہا ٹپّی بوگ ءَ رند حافظ سعید دزگیر کنگ بوتگ ءُ چرائی ءَ جست ءُ پرس بوگا انت۔ کرائم برانچ ءَ جتائیں رپورٹے ءِ تہا منّتگ کہ حافظ سعید چیریں ادارہانی دست ءَ انت۔ ہائی کورٹ ءَ پرمان دات کہ آ خاندان ءِ مردماں پیشدارگ ببیت، بلے ہجبر پیشدارگ نَبوت۔ اشی ءِ سرا، کرائم برانچ ءَ دگہ رپورٹے آؤرت، اے رندی ہمے گشت ئےِ کہ حافظ سعید چیریں ادارہانی دست ءَ نہ انت۔

اللہ بکش ءَ صدر ءُ چیف جسٹس ءِ سرا کاگد راہ دات بلے آہانی جواب ہجبر نیاتک۔ آ یازدہ ماہ ءَ کوئٹہ پریس کلب ءِ دیما احتجاجی کیمپ ءَ وانڈہ بوت۔ اے دراہیں سالاں آئی ءِ چُک ہچ جاگہ زاہر نَبوت، آئی ءِ ہچ ہال نیست ات، بلے اللہ بکش ءَ بس نَکُت۔

یک روچے، 2009 ءِ سال ءَ، اناگہ ءَ بلوچستان ہائی کورٹ ءَ لِسٹے اتک۔ اشی ءِ تہا 13 بیگواہیں مردمانی نام مان ات۔ لسٹ ءِ ہساب ءَ، آ درست بندی جاہ ءَ سزا گوازینگ ءَ اتنت۔ حافظ سعید ءِ نام ہوار ات۔ لسٹ ءِ ہساب ءَ، فوجی عدالت ءَ آ 25 سال ءِ سزا داتگ ات۔ رپورٹ ءِ تہا گشگ بوتگ ات کہ آ گجرانوالہ ءَ بندیگ انت۔

اللہ بکش ءَ ایچ آر سی پی ءِ در ٹُکّ اِت ءُ آہاں وتی مردمے گجرانوالہ جیل ءَ دیم دات۔

جیل ءِ واکداراں گُشت کہ حافظ سعید ہودا نہ انت۔ اللہ بکش پدا ہائی کورٹ ءَ شُت ءُ اے رندی پولیس ءَ ہمے اُزر پیش کت کہ حافظ سعید ہما تراک ءَ مُرتگ ءُ کل کنگ بوتگ۔

یپّیما ہمے زاہر کنگ بوتگ ات کہ ہمے تراک حافظ سعید ءَ کُتگ ءُ ہمیشی ءِ تہا ٹپّی بوتگ۔ نوں شش سال ءَ رند آئی ءِ خاندان ءِ مردمان ءَ ہمے گُشگ بوت کہ حافظ سعید اسل ءَ شش سال پیسر ءِ تراک ءِ تہا بیران بوتگ۔ ترْاک ءِ چار ساہت ءَ رند حافظ سعید چہ لوگ ءَ دراتکگ ات۔ ہائی کورٹ ءَ پرمان دات کہ لاش ءِ ڈی۔این۔اے ٹیسٹ کنگ بہ بیت۔ پولیس ءِ گشگ ایش ات کہ ہما لاش کہ شش سال پیسر آہاں اللہ بکش ءَ پیش داتگ ات آئی ءِ چُک ءِ بوتگ۔ ”مں لاش شر چارتگ انت،“ اللہ بکش ءَ یک رندے پدا تَلیں گُٹ ءُ سستگیں پادانی کسہ بنا کُت۔ ہمے لاش کہ آئی ءِ چُک ءِ نہ ات ہمیشی ءِ کلونڈگ ءَ پیسر آ اللہ بکش ءَ جوڑہے گُد دینت ءُ جست کننت کہ آ اِشاں پجّہ کاریت۔ ”آ منی چُک ءِ گُد نہ اتنت۔ حافظ قران بوگ ءَ رند آئی ءَ ہجبر بٹن والا پشک گوْرا نہ کتگ۔ بلے پدا ہم پکّا کنگ ءِ واستا ہمے گُد آئی ءِ مات ءَ پیش داشت انت۔ آئی ءَ ہم ہمے گُشت کہ گُد آئی ءِ نہ انت“۔

لاش چہ کبر ءَ کلونڈگ ءُ کشّگ بوت ءُ انچو کہ اللہ بکش ءَ پیشگُشی کُتگ ات اے آئی ءِ چُک نہ ات۔ آ دل ایمن بوت۔ بلے کمے وہد ءِ واستا۔ آ وتی دل ءَ گُشیت کہ آ مردم شر نسیب انت کہ آہاں وتی بیگواہیں کسانی لاش دز کپنت۔ ”آیاں آ کل کُتگ انت ءُ نوں آہانی پُرس ءَ نشتگ انت۔ منی دست ءَ بید ءِ ودار ءَ ہچ نَبیت“۔

اے دراجیں ودار ءِ تہا اللہ بکش یپّیما ہما شومّیں بیگاہ ءِ گپّاں جیڑیت۔ ”من ہمے ہبر ءَ سرپد نہ بیں کہ مگرب ءِ نماز ءَ رند آ لوگ ءَ اتک۔ سہتے پیسر تراکے بوتگ ات۔ ءُ آئی ءَ وتی سائیکل زُرت ءُ ڈن ءَ شُت۔ ڈن ءَ کرفیو ات۔ من سَر پِر نَبیت آ پرچہ ڈنّ ءَ شُت“۔