Taj Baloch

گوادر: نوکیں شِنزین۔۔۔ برطانوی اخبار ءِ رپورٹ ءِ بلوچی رجانک

چار فروری 2016 ءَ برطانیہ ءِ ہالتاک ”دی گارڈین“ ءَ گوادر ءُ بلوچستان ءِ جیڑہ ءِ سرا رپورٹے شنگ کتگ ات۔ ما تاج بلوچ ءِ منّت واریں کہ آئی ءَ ہمے رپورٹ پہ مئے بلوچی وانوکاں رجانک کتہ۔

گوادر واریں شہرے ۔ ہمے زوتاں وہدے پاکستان ءِ اے گیابانیں ماہیگیرانی تیابی ہندءِ لوگے ءَ دور کنگ بوت تہ تہنا وَرگی آپ ءِ جریکن دُزّگ بوتنت ءُ بَس ۔۔۔ زند ءِ اے بنیادی زرورت ءِ نیاد آبدَرانی ہُشک بوگ ءَ رند آزمانءَ شتگ۔ گوادر بلوچستان ءِ بہرے، بلوچستان پاکستان ءَ ڈالچاریں دَمگے کہ ہودا چہ پاکستان ءَ جتا بوگ ءِ کوہنیں جہدے بوگا انت۔

بلے سرکاری اَپسر ہمے واب ءَ گندگا اَنت کہ اے گوادر دنیاءِ دومی شینزین بیت، ہما شہر کہ چینءِ باپاری تہت اِنت ءُ چین ءُ ہانگ کانگ ءِ مَرزءِ سرا اِنت۔ گَرد ءُ تَرّے ءَ بروئے تہ ترا گُشگ بیت کہ گوں چائینا ءِ کُمک ءَ اے کسانیں میتگ، جہانءِ باپارءِ بُنجلے بیت کہ ہودا دنیا ءِ گاڑی جوڑ کنگ ءِ فیکٹری بنت، پاکستانءِ مَستریں ائیرپورٹ بیت، درپشکویں زِردیم ءَ فائیواسٹار ریزورٹ ہوٹلانی رِدے بیت۔

بلے ادءِ جہہ منند دِلترَکّ اَنت، تہنا ماہیگِر نا، اودءِ توامیں کدیمیں جہمنند ہم، کہ آ چرے جاگہاں 40 کیلومیٹر دُورتر لڈینگ بنت۔

gwadar 1

اے درست پہ اد ءِ مہلونک ءِ واستا ناں بلکیں پہ چینءَ کنگ بوگا اَنت،“ ماہیگیر ہدا بَکش ءَ گشت۔ آ گوادرءَ  را عرب زِرءَ سر بوگ ءِ واستا وتی بُنجل جوڑ کنگ ءِ چینی منصوبہ ءَ آنگُرینتگ۔

آ ہم چو اِندگرانی پئیما ادءِ یکّوئی پَدمنتگیءِ زَنگءَ جنت۔ اقوامء متحدہ ءَ 2009 ءَ گُشتہ کہ اے ڈسٹرکٹ ءَ وَردِن ءِ آسراتی ناتوان انت۔ شہر ءَ جان سَلامتی ءُ وانگ ءِ آسراتی بس پہ نام انت۔ ہُدا بکشءِ کِرّا اینچو آپ ہم نیست ات کہ ہپتگ ءِ سرا وتی گُداں شُشت بکنت۔ ما وہدے آئی ءَ ءُ آئی ءِ پنچیں ہمراہاں چاہ ءِ سلاہ جَت کہ پاکستان ءَ مہمانداری ءِ المی بہرے، آہاں چاہ ءِ بدل ءَ مئے ورگی آپ ءِ بوتل دوست کتنت۔

”درہیں دَمگ سرکارءَ گپتہ ءُ بُنّکی جہہ منند یک کِرّےءَ گلّینگ بوگا انت،“ آئیءَ گُشت۔

گوادر ڈیویلپمنٹ اتھارٹیءِ اپسرے ءِ گُشگ ءِ پدا اگاں ہرچیز منصوبہ ءِ ہساب ءَ بُروت تہ اد ءِ انوگیں 80 ہزار مردم ءِ آبادی ءَ را آوکیں 20 سال ءِ تہا دگہ 20 لکھ مردَم پِر بیت کہ اشانی تہا 20 ہزار تہنا چینی بنت۔

10 سالءَ پیسر، شینزین ءِ بدل ءَ، گوادرءَ باندات ءِ دبئی کنگ ءِ بٹاک جَنگ بوتگ ات۔ دبئی والا گپ ءَ تہنا زمینانی سرا بازی جنوکیں مردم برباد کُت انت۔ سرکاری کارِندہ گشنت کہ نوں جاور گوستگیں سال ءِ جار جتگیں ”چین پاکستان باپاری در“ پروجیکٹ ءَ بدل کتگ اَنت۔ اے پروجیکٹ ءِ رِد ءَ چین، پاکستان ءَ را اِنوِسٹمنٹ ءِ واستا 4600 کروڑ ڈالر ءِ وام دَنت۔

چریشیءَ گوادر ءِ انوگیں کارنہ بَستیں جُہلیں زرءِ ودّینگ ءِ ہرچ ءُ درچ ہم درکایَنت ءُ ہما سڑکانی ہم کہ چرے پورٹ ءَ بِگر داں 1800 کیلومیٹر دور ہمالیہ ءِ گَٹّ ءُ گَراں جنان چین ءِ سیمسرءَ سر بنت۔ اے روڈ پاکستان ءَ چہ کجام جاگہاں گوَزان کننت، اے ہبر انگتہ پاکستان ءِ صوبہانی نیامءَ اڑوکی اِنت۔

پاکستان ہمے اوست ءَ نِشتگ کہ اے روڈ پاکستان ءَ را جہان ءِ دومی مستریں باپاری دَر ءِ بِستارءَ دَینت۔ ہبر ءِ ہساب ءَ وا ”ژِنجَنگ“ءِ ہما باپاری کہ دَرملکاں سامان راہ دَیَنت، آہان ءَ پہ عرب زِرءُ جہانی نیادیاں سربوگءَ، چہ چینءِ رودراَتکی نیمگ ءِ تیاب ءِ راہ ءَ، اے راہ سک باز نزّیک تِر کپیت۔

گپ کہ پہ کارءِ کنگ ءَ بئیت تہ باز ءَ باور نہ بیت کہ چہ دنیا ءِ مستریں گٹءُ گَراں ٹرَکّانی سرا سامان ءِ برءُ آر واکی چہ دریا ءِ انوگیں راہاں اَرزان ترءَ کپیت۔ اے ناباوران ءَ شَکّ اِنت کہ چین، گوادر ءَ را خلیج ءِ ٹیلانی راہ ءِ نزیک ءَ، وتی دریائی لشکرءِ بُنجلے جوڑ کنگا گیشترہدوک انت۔

”چین پاکستان باپاری دَر“ءِ دیما مستریں جیڑہ اے بلاہیں صوبہ (بلوچستان) ءَ کَسانیں بلے نہ کُٹّوکیں انسرجنسی انت۔ پروجیکٹ ءِ دراجیں راہ ءَ سیکیورٹی چوں دیگ بوت کنت؟ چہ پاکستانءِ اِندگہ جاگہاں رُمبوک ءُ آؤکیں مردمانی تہا گارءُ بیگواہ بوگ ءِ تُرس ءَ بلوچستان ءَ بغاوتے پاد کُتگ۔

”چین پاکستان باپاری در“ سرمچارانی ہاسیں نشانگے، چیا کہ آہانی دل ءَ اے روڈ بلوچانی نام ءُ نشان ءَ را گار کنگ ءِ یک مزنیں سَوَبے بیت۔ بلوچ اے صوبہ ءَ جہہ منندیں 80 لکھ مردمءِ کِساس نیم اَنت۔

”اے روڈ چہ ہما جاگہاں گوَزیت کہ آ انّوں جنگ ءِ دِل اِنت،“ کیسر بنگالی ءَ مارا گُشت کہ وت بلوچستان ءِ سر وزیر ءِ معاشی سوجکار انت۔ آئی ءَ گُشت کہ اے کندگی ہبرے کہ فوج ءَ ہمے دو نوکیں بریگیڈ کہ جوڑ کتگ انت اے پہ راہ ءُ رہگوَزانی پہریزگ ءَ بسّ اَنت۔

”اگاں ٹرکانی ہمک کاروان ءَ را نیم دَرزَن ٹینک، سِلہ بندیں گاڑی ءُ ہیلی کاپٹر ہمراہ بہ بیت، تہ ہَرچ ءُ دَرچ پُجّگی نہ بیت،“ آئی ءَ درّائینت۔

چہ 1947 ءَ، بلوچستان ءِ پنچیں بغاوتانی بُنپَد ہمے ہبر بوتہ کہ بلوچ گشنت اسلام آباد پہ ہاکمیں پنجابی اسٹیبلشمنٹ ءِ پائدہ ءَ صوبہ ءِ گیسءُ اندگہ درہیں گواجِناں روپان ءُ بَران انت۔

پاکستان گشیت کہ کارانی ہراب کنوک آہانی اَزَلی دُژمن، انڈیا انت۔ ”دَری تاکت وَ پہ پاکستان ءِ نَزور کنگءَ، گُمراہ ءُ ناشَریں مردمانی سلاہ دیگ، ٹریننگ دیگ ءُ کُمک کنگ ءَ مُدام ہدوک بوتگ اَنت،“ آرمی چیف جنرل راہیل شریفءَ گُشت، کہ چارشمبےءِ روچ ءَ، بلوچستان ءَ وزیر اعظم ءِ ہمراہ اَت ءُ پہ چین پاکستان باپاری دَرءِ دگہ شاہے ءِ بُنگیج کنگ ءِ واستا بلوچستان ءَ اَتکگ اَت۔

انوگیں جنگ 2005ءَ یک فوجی اپسرے ءِ جنیں ڈاکٹرے ءِ زور زِنا ءَ آس دات۔ چریشیءَ پیسری سالءَ، گوادرءَ، سے چینی انجینئیر، گاڑی یےءِ تہا ایریں بمبانی تراک ءَ کُشگ بوتگ ات۔

gwadar 2

پہ ترّءُ گَردءَ آؤکیں چینی گشنت کہ بِلّے کہ پہ مئے ہپازت ءَ باز چست ءُ ایر کنگ بوگا اِنت بلے انگہ ما پہ سیکیورٹی ءَ دِلوارگیں۔ چینی باپاری ءُ سرکار مردم  تہنا ہما وہدا گوادرءَ گَردَنت کہ فوجی گاڑی اِش ہمراہ بہ بنت ءُ درہیں راہ پہ اندگہ درہیں ٹریفک ءَ بند کنگ بہ بنت۔ کِشکانی سرا ہر سَد گام ءَ پولیس ءِ چوکی انت۔

”جہہ منندانی واستا انچش اِنت کہ کَسے وتی جند ءِ میتگءَ بَندیگ کنگ بہ بیت،“ ریٹائریں آرمی اپسر شمشاد اہمدءَ گُشت، کہ وتی کارانی رِد ءَ مُدام اے میتگ ءَ، گوادرءِ یکیں فائیواسٹار پرل کونٹینینٹل ہوٹلءَ، کہ بازیں سالانی دَپ بَندی ءَ پَد پَچ بوتگ، روءُ آ کنت۔ ”زاہر اِنت آ وتی آزادی ءِ پَچگِرَگ ءَ وش نہ بنت ،“ آئی ءَ گُشت۔

پورٹ ءِ سرا کار بوگ ءِ ہمرائی ءَ، سرجمیں شہر ءَ را سیکورٹی ٹَٹے ءِ تہا پتایگ ءِ منصوبہ ءَ مردمانی بندیگی ءِ تُرس ودّینتگ۔

”ہرکس کہ شہرءَ پُتریت، تہ آئیءَ را یک ریزیڈنس کارڈے پیشدارَگی بیت تاکہ ما بزانیں گوادرءِ جہہ منند کے ءُ کے اِنت“، پولیس اِنسپکٹر چاکر خان ءَ گُشت۔

سرکاری کارِندہ گشنت کہ گوادرءِ شہر ءِ جند ایمن اِنت، بِلّے تُری کَش ءُ گوَراں سیکیورٹی ءِ جیڑہ ہست اِنت۔ ہمے ڈسٹرکٹ ءِ تہا 9 جنوری ءَ پاکستان ءِ کوسٹ گارڈ ءِ دو اپسر کُشگ بوت ءُ سے ٹپّی۔

جرمنی ءِ کَدّیں شاہگانیں بلے تَنِک آبادیں صوبہ ءِ سیکورٹی ءِ واستا بازیں زورے جنگ بوتہ۔ اِدءِ شِنگ ءُ شانگیں ءُ بہر بہریں جنزءِ نزور کنگ ءَ فوج یک ہدے ءَ سوبمند ہم بوتہ۔ پاکستان انسٹیٹیوٹ آف پیس اسٹڈیزءِ رپورٹےءِ رِدءَ، 2015 ءَ اِد ءِ آجوئی جنز ءِ اُرُش 194 بوتگ اَنت کہ چہ پیشی سال ءَ 36 درسَد کمتر انت۔

بلے ایراد داروکیں مردم گُشنت کہ فوج ءَ اد ءِ سیکیورٹی گوں سکّیں رَدیں رہبندے ءَ گہتر کُتہ ءُ چریشی ءَ اد ءِ مہلونک ءِ تہا چہ پاکستان ءَ درامَدی ءِ مارِشت گیشتر بوتہ۔ گشنت کہ ہما مردم کہ پیسرا نہ اے نیمگا بوتگ اَنت، نہ آ نیمگا، آ ہم پہ زورے آجوئی جنزءِ نیمگا تیلانک دیگ بوتگ اَنت۔

مساپر گِلگ کننت کہ پُرّیں بس راہانی سرا دارَگ بنت ءُ گھنٹہانی گھنٹہ ہُشک ءَ اوشتارینگ ءُ سُبک کنگ بنت۔

” بیگواہیں مردمانی“ جیڑہ مہلونک ءِ کینگ ءَ گیش کنان اِنت۔ انچو گشنت کہ انٹیلیجنس ایجنسیانی مردم گوں ایف سیءَ روَنت ءُ ہر کسی سرا کہ سرمچاربوگ ءِ شک انت چست اِش کننت، ءُ وتی چیریں بندیجاہاں دارَنت اِش۔ چریشاں بازینے کُشگ بیت ءُ لاش اِش گوں ٹارچر ءِ نشاناں ماں ویرانگاں دست کپنت۔

گوَستگیں سالءَ صوبائی سرکار ءَ جار جتگ ات کہ چہ 2011ءَ بگر داں 2014ءَ 800 انچیں مردمءِ لاش دَست کپتہ کہ آہانءَ یک نہ یک رنگےءَ گوں ہمے جنزءَ نزیکی یے بوتہ۔ اے اندازہ ہم جنگ بوگا اِنت کہ کساس 950 مردم انگہ گارءُ بیگواہ اِنت، بلے 2013 ءِ، اقوامء متحدہ ءِ پٹ ءُ پولی ٹیم ءِ رِدءَ، گاریں مردمانی کساس 14000 ہم گُشگ بیت۔

چدءُ پیسر، بلوچستان ءِ درہیں بغاوت ماں زِرباری بلوچستان ءَ بوتگ اَنت ءُ آہانی سروکی سرداراں کتگ انت کہ گوں سرکارءَ سہل ءُ تران ءَ ہدوناک بوتگ انت، بلے اے رَندی ئیں جنزءِ سرءَ مکران ءِ مڈل کلاس زورآور انت کہ اودا سرداری نزام ءِ جند نیست اِنت۔ اے دمگ چہ گوادرءَ کساس 200 کیلومیٹر توکی نیمگا درْاج کشّیت۔

پیسری جنگاں درکوم جنگ نہ بوتگ اَنت، بلے اے رَندی غیربلوچیں سیویلین ہم جنگ بوتگ اَنت۔ انسانی ہکانی ادارہ گَشنت کہ اے بری چہ 2006 ءَ بگر داں انونءَ 1000 ہمے پیمیں آبادکار جنگ بوتہ کہ اشانی تہا یک اسکول ماسٹرے ہم ہوار اِنت، ءُ ہمے اسکول ءِ تالبیں زہگان ءَ پہ زور پاکستانءِ ترانہ ءِ وانگا دارگ بوتگ۔

مکرانءِ آم مردم ہمے زنگ ءَ جنَگا اِنت کہ ما سرمچارءُ ایف سی ءِ نیامءَ پَسّ اتگیں، اے ہما جاگہہ اِنت کہ چین پاکستان باپاری دَر جوڑ بوگا اِنت ءُ ادا ایف سی ءُ سرمچار مُدام جنگا اَنت۔

”روڈءِ کار کہ بندات بوت، تہ جنگ ہم بندات بوت، ءُ مارا وتی لوگانی یل دیگ ءُ لڈگ ءَ ابید دگہ ہچ راہ ءُ دَر نیست اَت،“ ہوشاب ءِ دُکانداریں شہاب بلوچ ءَ گُشت، کہ مرچاں چو اندگہ مردمانی ڈول ءَ وتی لوگ ءُ میتگ ئِے یلداتگ ءُ دگہ مستریں شہرےءَ لڈّگ ءَ لاچار بوتگ۔ ”مردم اَزاب اَنت، بلے واپس وتی میتگاں روگ اِش تُرسیت“۔

اے ہندءُ دمگانی سرا سرمچارانی ودّوکیں اَسَر چرے گپ ءَ گندگ بیت کہ 31 دسمبرءَ وہدے مکران ءِ یک سیٹے ءِ سرا دوبر الیکشن بوت، سرمچاراں مہلوک گُشت کہ چہ اوٹاں وتا دور بدار اِت، تہ تہنا چار درسد مردم ءَ اوٹاں بہر زُرت۔ یک اُمیدوارے ءِ برات چِست کنگ بوت ءُ یکے ءِ لوگ ماندارگ بوت اَنت۔

ہما کہ دنیگتہ گوں اوٹ ءُ الیکشنانی سیاست ءَ ہمگرنچ اَنت، آ ہم ترُندتِر بوان اَنت۔ بلوچستان نیشنل پارٹی (بی این پی) ءِ سروک ءُ پیسریگیں سر وزیر اختر مینگل گشیت کہ ”پاکستانءِ سروک مارا چہ گُلاماں ہم بَدتریں چمےءَ چارَنت“۔

”آہانی نِزّءَ ما اے ملک ءِ صوبہے نیاں، گِپتگیں ہندے آں“، آئیءَ گُشت۔ ”نوں دیمرویءِ نام ءِ سرا اے مارا مئے وتی ملکءَ اقلینت جوڑ کنگ لوٹنت۔“

صوبائی سرکار یکوئی گوں آجوئی لوٹوکیں سروکاں ۔۔۔ کہ ایشانی تہا بازینے یورپی ملکاں درانڈیہہ اِنت ۔۔۔ گپ ءُ تران ءِ جہد ءَ انت۔ بلے سویلین سیاستدانانی گشگ ایش اِنت کہ اے صوبائی سروکان ءَ فوج ءِ جنگی آپریشنانی دارگ ءِ وس نیست۔

نیام رَویں بلوچ سروکانی گشگ اِنت کہ اگاں سرکارءُ سرمچارانی نیام ءَ سَلاہے بیت تہ بائد اِنت اود ءِ مہلونک ءَ را آئینی تحفظ دیگ بہ بیت، ہاس گوادرءَ را۔ گوادرءِ بازیں مردم انگہ وتارا چہ پاکستان ءَ گیشتر گوں مشکت ءَ نزّیک کننت چیا کہ پیسرا گوادر تاں 1958ءَ مشکت ءِ بہرے بوتہ۔ گوادرءَ بی این پی ءِ عزیز بلوچ ءِ گشگ اِنت کہ جہہ منندی ءُ کارءِ پرمٹ ءِ نزامے جوڑ کنگ ءِ زرورت اِنت دانکہ دَری مردم اِدا اوٹ دات مکننت۔

لہتے مردم ہمے اُمید ءَ دارگا اِنت کہ چین پاکستان باپاری دَرءِ ودی کتگیں کارءُ روزگار اے ہندءِ جنگءُ جنزءَ نزورتِر کننت۔ بلے بازیں جہہ منند چوش نہ جیڑیت۔ آ گشنت کہ ملک ءِ آبادی ءَ بلوچ کم انت، سرکاری نوکریانی تہا بلوچستان ءِ بہر شش درسَد اِنت، ءُ ایشانی تہا ہم بلوچستان ءِ مردم پہ شِہمتریں کارءُ روزگارانی واستا کوالیفائیڈ نہ اَنت۔

گوستگیں مارچ ءَ اخباراں گوادرءِ فشریز ءِ پوسٹانی جارے اتکگ اَت، شریں پوسٹ پہ پنجاب ءِ مردمان اتنتءُ گاٹ ءُ ہاکروپ ءِ ڈولیں کَسانیں کار پہ اودءِ جہہ مننداں۔

”ہیال ایش اِنت کہ چہ چین پاکستان باپاری دَرءَ بلوچ ءَ را آ پائدہ کہ رسیت، آ اِنت، چینی ٹئیرانی پنچرءِ گِرَگ،“ معاشی سوجکار کیسر بنگالیءَ گُشت۔

پاکستانءِ وزیر اعظم نواز شریف ۔۔۔ کہ دسمبرءِ ماہ ءَ چین پاکستان باپاری درءِ نوکیں شاہے ءِ بنگیج کنگ ءِ واستا بلوچستان ءَ اتکگ اَت ۔۔۔ زبان ئِے نَرم اَت۔ گُشت ئِے ”چہ بلوچستان ءَ ہرچی گواجنے کہ درکپتہ، آہانی سرا اولی ہک بائد اِنت بلوچستان ءِ بہ بیت۔“

بلے آئی ءَ گیابانیں تیاب دپ ءِ ہما شہدگ ءَ را ہم نوک کنگ ءِ پرمان دات کہ اودا مردم روچ پہ روچ گیشتر آہان ءُ جہہ منند بوان اَنت۔

اے کِشک چینی ٹرکان ءَ جنگ آماچیں بلوچستان ءَ سرگوز کنان ءَ چہ زرباری نیمگا اِندگہ صوبہانی ایمنیں راہاں گوزگءَ پیسر، رودراَتکی نیمگا کراچیءَ روگ ءِ راہ دَنت۔

Don’t miss posts from Balochistan Times!

We don’t spam!

+ posts

Taj Baloch is a poet and linguist. He published the first anthology of his poetry in 2016 in both Roman and Arabic scripts. Baloch is the Coordinator of Human Rights Council of Balochistan.

He can be reached at @TajBloch

Leave a Comment