یجّاگہ مُچ بوگ یا یجّاگہ کار کنگ؟

7

بلوچ سیاست ءِ تہا یک رندے پدا تپاکی ءِ شور شور انت۔ چِد ءُ پیسر ہم بوتگ۔ سالانی سال سیاسی گلاں برے ہالتاک ءُ برے سوشل میڈیا ءِ تہا چہ بلوچ راج ءَ اتحاد ءِ مستاگی گپتگ۔ بلے پارٹیانی نیام ءَ تپاکی وتی جاگہ ءَ ہر پارٹی وتی تہا پرْشان ءُ ٹُکّر ٹُکّر بیان انت۔

یجّاگہی درد نہ وارت، یجّاگہ کار کنگ لوٹیت۔ اگں یکّیں پارٹی ءِ تہا ہر سروک ءُ باسک دومیگ ءِ کوپگ ءِ سرءَ پاداں ایر بہ کنت ءُ وتا بُرز کنگ ءِ کوشش بہ کنت، آ پہ راجی کاراں نہ کپ انت۔ اگں باندا روچ درستیں بلوچ پارٹی ہوار ہم بہ بنت ءُ یک پلیٹ فارمے بہ ٹاہین انت، بلے اگں مئے سیاسی مردمانی مانمیاتکی ءُ بے بروسہی ہلاس مہ بیت، چوشیں اتحاد پہ راج ءَ وشّیں روچ مُشکل بیاریت۔

Coexist

پمیشکا بلوچ ءِ مستریں جیڑہ اتحاد ءِ نہ بوگ نہ انت، سیاسی کلچر یا بہ گُش اختلاف دارگ ءِ ہاٹیگ ءِ نہ بوگ انت۔ ہچ دو مردم، تُری آ یکّیں پارٹی ءِ بہ بنت یا دگہ دگہ پارٹیانی، یکّیں وڑا نہ جیڑ انت، چیزاں یکّیں رنگ ءَ نہ چارنت۔ پارٹی یا سیاست ءِ مستریں ذمہ واریاں چہ یکے ہمیش انت کہ آ مردمانی نیام ءِ اختلافاں باوجود آہاں یجّاکہ کار کنگ ءِ واستا رہبندے بہ دنت۔ اگں یک پارٹی یے اے کار ءَ کُت نہ کنت بزاں کہ آ وتا داشت نہ کنت۔

کانگریس ءِ تہا گاندھی ءِ مستریں سیاسی مخالف سبھاش چندرا بوس بیت۔ گاندھی بے جنگ ءُ شدّت ءَ انگریزاں کشّگ لوٹیت ءُ بوس گُشیت کہ بے جنگ ءَ انڈیا آزات نہ بیت۔ 1939 کانگریس ءِ تہہ ءِ الیکشن ءَ بوس صدری ءِ واستا اوشتیت۔ گاندھی وس کنت کہ مہ کٹّیت بلے بوس سوبمند بیت۔ گاندھی بد بارت بلے کانگریس ءَ نہ پروشیت۔ آ بوس ءِ سوبمندی ءُ پہ انڈیا ءِ آجوئی ءِ جہد ءَ آئی ءِ قربانیاں ساڑائیت بلے گشیت آ ءُ بوس ءِ راہ دگر دگر انت۔ بوس ہم گاندھی ءِ نہ وشّی ءَ آئی ءِ بدنیتی نہ لیکیت۔ آ گاندھی ءِ شرپ ءِ دارگ ءَ چہ کانگریس ءَ درکئیت ءُ وتی راہ ءَ جتا کنت۔ کانگریس مانیت۔ پارٹی پش کپیت۔

بلوچ سیاسی مردمانی تہا دنیگہ ہمے سیاسی کلچر نیاتکہ۔ اگں براتے گوں براتے ءَ اختلاف بہ داریت، یکے دومی ءَ وتی پِت کُشتہ لیکیت۔ پمیشکا پارٹی ٹُکر ٹکّر بیان ءُ ہلاس بنت۔ اتحاد تہنا دپ ءِ سرا بیت۔ سیاسی کار تہنا وتا بُرز دارگ انت، پارٹی منشور ءِ دیما برگ نہ انت۔

باکسر مانی پاکیو گُشیت ”باکسنگ لیبے۔ ما یکے دومی ءَ مُشت ءُ مکونڈی کنیں بلے من وتی مخالف ءَ دژمن نہ لیکاں“َ۔ سیاست ہم چو باکسنگ ءِ وڑا انت۔ اختلاف بدار، وتی سیاسی سِتک ءُ لیکہانی پلّہ مرز بہ بو، جاک ءُ کوکار بہ کں، بلے وتی مخالف ءَ وتی دژمن مہ کن۔ مہ گش کہ آ پاکستان ءِ دلاّر انت ءُ پارسا تہنا مناں۔ مہ گش کہ آ بہا بوتہ۔ اے سیاست نہ انت پلینڈی انت۔

تو ہر بلوچ سیاسی مردم ءَ دپ ءَ گوں جن، آ ترا گُشیت بید ءِ آ ءُ آئی ءِ پارٹی ءَ ایدگہ درست پاکستان ءِ یا دگرے ءِ دست ءَ بہا بوتگ انت۔ بلے راستیں ہبر ایش انت کہ بلوچ سیاسی گلاں دنیگہ چُشیں نیاد ءُ زورے نیست کہ پاکستان وتی زرّاں زوال بہ کنت۔ بلوچ سیاسی پارٹی یا مردم بہا زورگ نہ لوٹنت، آ وتی دژمن وت انت۔

+ posts

Sajid Hussain (1981-2020) was a writer and senior journalist from Balochistan. He had a degree in Economics, International Relations and English Literature from Karachi University. He had the experience of working with Pakistani newspapers Daily Times and The News International. Sajid Hussain was also the founding editor of this online magazine.