دَهے رۆچ اِنت که کێچءِ مزن‌شهر ترُبتءَ هزاراں مردم اهتجاجےءَ نِشته. اے اهتجاج، هما وهدا شرو بوت که بالاچِ مولا بخش سرکاری لشکرا کُشت ءُ بالاچءِ لۆگءِ مردماں لاش کَبر ءُ کَسارت کنگءِ بدلءَ تابوتےءَ کت ءُ تربتءِ چؤکءِ سرا نِشتنت که ما اِنساپ لۆٹێں.
بالاچ 21 اکتوبرءِ شپءَ پؤجءَ چه لۆگءَ گِپت ءُ بُرت، 21 نؤمبرءَ تربتءَ اَدالتءَ پێش‌ئےِ کت ءُ په دَه رۆچءِ ریمانڈءَ بُرت. هالانکه کانون همێش اِنت که گِپتگێں مردم 24 گنتهءِ تها اَدالتےءَ پێش کنگ ببیت یا یله دئیَگ ببیت. بلے بالاچ اَدالتءَ پێش کنگ بوت ءُ انگه 23 نؤمبرءَ دگه سئے مردمءِ همراهیءَ جنَگ بوت. سرکاری اداره سی ٹی ڈیءَ گُشت که ”ما راهءَ بوتگێں. مردماں مئے سرا ارُش کته ءُ اے مردم همے جنگءَ جنَگ بوتگ/اَنت.“ هرکَسءَ زانت که سرکاری لشکر درۆگ بندَگا اِنت.
چه بالاچءِ زئیءِ واکیَهءَ لهتێں رۆچ پێش، بالگترءَ سئے مردم گاڑی‌یےءِ تها بندگ ءُ بمب جنَگ ءُ کُشگ بوت. اے سئےئێں مردم هم سرکارءَ چه پێسرا گِپتگ‌اَتنت ءُ سرکارءِ جێلءَ بوتگ‌اَنت.
بالاچءِ لاش که چئوکءِ سرا اێر بوت، لۆگءِ مردمانی پِریاتاں سجّهێں کێچ جَکسێنت. تربت شهرءِ مهلوک آتک ءُ اهتجاجءَ نِشت. اهتجاج که چه یک رۆچےءَ گوَست، کَش ءُ کِرّءِ مێتگاں هرکَس که پؤجءَ بُرتگ ءُ بێگواه کته، آهانی لۆگءِ مردم هم همے اُمێدءَ آتک ءُ هؤار بوتنت که مئے مردم اگں یله نبیت، کَم چه کَم اے دابءَ کُشگ ءُ دؤر دئیَگ نبیت. اهتجاج پدا هما وهدا تمَردتِر بوت که زامُران، اَبدوئیءَ، مندءِ ورنایے سرکاری لشکرءَ تیربار کرت ءُ کُشت.
بالاچءِ لاش کِساس هپتگےءَ همے چارراهءِ سرا اێر اَت ءُ مردم کوکارا اَتنت. سرکاری وفد هر رۆچ مُزاکراتءَ اَتکنت، بلے مردماں وتی اهتجاج تاں اے دمانءَ هلاس نکُته. اهتجاجءَ نِشتگێں مردمانی هبر اِش اِنت که تانکه سرکار مئے لۆٹاں پیلؤ نکنت، ما وتی اهتجاجءَ هلاس نکنێں. اے مردمانی لۆٹ اِش اَنت که:
- سی ٹی ڈیءِ هلاپءَ کێس دَرج کنگ ببیت ءُ اے کۆشءِ زمّه‌دار سزا دئیَگ ببنت
- سی ٹی ڈی بئیان بدنت ءُ بِمَنّیت که بالاچ جنگےءَ جنَگ نبوتگ، ما جتگ
- مارا اے گپّءِ زمانَت دئیَگ ببیت که اے دگه بێگواهێں مردم اے دابءَ کُشگ ءُ دئور دئیَگ نبنت
- سجّهێں بێگواهێں مردم اَدالتاں پێش کنگ ببنت
- ڈِت‌اِسکْواڈ هلاس کنگ ببنت
هما مردم که بلۆچستانءِ تها سرکار ءُ مهلوکءِ اے کَشّ ءُ چیلّءَ په دلگۆش چارَگا اَنت، آ هئیران اَنت که تربت پئیمێں جاگهےءَ اے دابێں اهتجاجے چۆں جاری بوت کنت. بازێں مردمے گُشیت که بلۆچستانءَ مزنێں شَهر (بلۆچءَ) نبوته. مسترێں شهر تهنا شال اِنت. شال سرکاری ءُ انتزامی مزن‌شهر اِنت بلے اۆدا بلۆچءِ اے دابێں مُنزّمێں آبادی‌یے نێست. ءُ چاگرد هم بلۆچءِ دستءَ نه‌اِنت. تربت همے انّوگێں جنگ (2000ءَ رند) ءِ دؤرانءَ مزنێں شهرے جۆڑ بوت. اے شهرءِ مسترێں هاسیت اِش اِنت که اِشیءِ سێوَل انتزامیهءَ بگر تانکه سێوَل سۆسائٹی، درُست بلۆچ اَنت. اِشیءِ سئوَبءَ مهلوک یکدومیءِ درد ءُ گَمءَ زوت مارِت کنت ءُ اے دابێں اجتمائی جێڑَهانی سرا اے شهرءِ مردم زوت همگام بوت کننت. پدا یونیورسٹی، کالج ءُ اے دگه ادارهانی سئوَبءَ اے سجّهێں آتراپانی ورنا همے شهرءَ اَنت. اے چیزّاں اے مزنێں اهتجاج مُمکن کته. دگه یک گپّے اِش اِنت هم اے مهلوک که آتکگ، درُست بێگواه کتگێں ورناهانی لۆگءِ مردم اَنت. په اِشاں تربت دور هم نه‌اِنت ءُ گران هم نه‌اِنت. په مند، کۆلواه، دشت، بلیده ءُ اے دمَگانی مردماں شال ءُ اسلام‌آباد سَک دور اَنت ءُ آهانی گُنجائشءَ هم نه‌اِنت، بلے تربتءَ اے سجّهێں مردم نه لاپءَ کپنت، نه وپسگ یا نادراهی‌یےءَ. اے مردمانی هئیال اِش اِنت که همے سئوَب اَنت که اے پئیمێں اهتجاج شال یا دگه شهرےءَ بوت نکنت.
بالاچءِ کَبر ءُ کَسارتءَ دگه تاریخے جۆڑ کت. بازێں مُلّایےءَ زۆر جت مردم جنازهءَ بَهر مزورنت. جار بوت که هرکَس زِگریانی جنازهءَ برؤت، جَنءِ سُهن‌ئےِ کَپتگ‌اَنت. بلے هزاراں مردمءَ بَهر زُرت. پدا، تنے وهدی چُشێں مزنێں جنازه دێما نئیاتکه که اۆدا نُمازی مُلّا هم وتی کُرانی آیَت وانَگا ببیت ءُ زِگری رَسم هم اَدا کنگ ببنت. اے اؤلی رند بوته که نُمازی مُلّا ءُ زِگری مُلّائی کَش ماں کَشءَ اۆشتاتگ‌اَنت ءُ مُلّاءَ وتی آیَت ونته ءُ مئیک مُلّائیءِ دستءَ داته، مُلّائیءَ وتی سَدا کَشّتگ ءُ مئیک مُلّاءِ دستءَ داته. هالانکه همے شهرءَ لهتێں وهدا پێسر مُلّاهاں زِگری ورنایے په گوَنڈۆئی گپّےءَ کُپرءِ بُهتام جت ءُ کُشت.
چه کێچءَ باز مردمءِ هئیال همێش اِنت که اے اهتجاج باید اِنت نوں هلاس کنگ ببیت. یا شالءَ لَڈّێنَگ ببیت. بلے اے اهتجاج پمێشکا چۆ اسَرمند اِنت که تربتءَ اِنت. تربت بلۆچ سیاستءِ، کَمّ ءُ گێش، مرکزی شَهر جۆڑ بوته. سجّهێں بلۆچ پارٹی تربتءَرا وتی دستءَ آرگءِ جُهدءَ کننت. هالانکه چه اے پارٹیاں یکّے هم اے اهتجاجءَ زاهر نه‌اِنت. اے گپّ، باز مردمءِ هئیالءَ، اے چیزّءَ نِشان دنت که تربتءَ هما سێوَل سۆسائٹی، یا اؤامی اهساس ءُ زانتے که رُدان اِنت، آ چه انّوگێں گَل ءُ لێکهاں جُهلتِر اِنت.
کَس نَزانت که اے اهتجاجءِ آسر چے بیت. بلے اگں اے مردم سرکارءَ همے گپّءَ مجبور کت بکننت که پؤج، سی ٹی ڈی یا ایف سیءِ هلاپءَ ایف آئی آر درج ببنت، یا سرکار نبشته بکنت ءُ بدنت که ما اے سجّهێں بێگواهێں مردماں اے دابءَ نکُشێن ءُ دؤر ندئیێں، اے وت سَکّێں مزنێں کامیابی‌یے بیت، انچێں مزنێں کامیابی‌یے که اے بلاهێں جنگءِ دؤرانءَ تنے وهدی بلۆچءَ هاسل کت نکُته. چێا که نبشته کنگ ءُ دئیَگ، ایف آئی آر کنگ همے گپّءَ سابت کنت که سرکاری لشکر گُنهگار اِنت. ءُ اے کَسانێں هبرے نه‌اِنت.
