News Desk

بولان کئی اِنت

پشتون سیاسی سروک واجه محمود خان اچکزئیءَ گوستگیں روچاں بیانے داتگ که ”بولان تاں چترالءِ زمین یَکجاگه کنگ ببیت ءُ پشتونستانءِ نامءَ صوبهے جوڑ کنگ ببیت۔“

بازیں مردمےءَ اے بیانءِ سرا بازیں هبرے کت۔ ءُ مزنیں هَدّےءَ یَک بهسے پاد آتک که بولان، بُندَرءَ بلوچانی اِنت یا پشتونانی، که هرکَسءَ گوَشت منی اِنت.

بازیں تاریخ زانتےءِ هئیال اِش اِنت که نوزده سَد ءُ هپتادءِ زمانَگءِ نیپ هکومتءَ رند، بلوچستانءَ نِشتگیں پشتونانی کئومی سیاستءِ یَک اهم تِریں ڈیمانڈے همے بوتگ: ”بلوچستانءَ په پشتوناں صوبهے اَڈّ کنگ ببیت.“ پشتون کئوم پرست پارٹی، پختونخواه میپ مُدام گوں همے نارَهءَ اسمبلیاں بوتگ و هکومت و اپوزیشنانی بهرے بوتگ.

اے پئیما، بلوچستانءِ انتِزامی مزَنشهر شالکوٹءِ سیاست مُدام همے جیڑهءِ تها بوتگ. بلوچ ءُ پشتونانی جنگ و بِجنگ سجّها همے نارَه ءُ اِشیءِ پیدا کتگیں کَشّ ءُ چیلّانی پیداوار بوتگ اَنت. ءُ اے کَشّ و چیلّءِ سرا شالکوٹءَ مردم مُرتگ، اے دیما ءُ آ دیما. اے واستا که هکومتءِ گِرگءِ واستا زور جن ءُ کائیءِ وهداں پشتون پَجّار ءُ بلوچ پَجّارءِ بهس ترُند بوتگ. ءُ بلوچستانءِ سرا مالکی مسلھے بوتگ۔

دگه بازیں مردمے گُشیت که اے نارَه که ”بولان تاں چترال پشتونانی اِنت“ یا اِش که ”ائوگانِستانءِ بازیں دمَگے بلوچانی اِنت“، چه بُندَرا مان گیشِّتگیں هبرے. بلوچ ءُ پشتون وتی همے زمینانی سرا آباد بوتگ اَنت که مرچی بلوچستان ءُ ائوگانستان گُشگ بوگا اَنت. مجموئی سورتا، دوئیں کئوم یکے دومیءِ دژمن نبوتگ اَنت. چو کَسان کَسانیں جنگ هم بوته، ایمنی هم بوتگ.

پدا دویں کئومانی ریاستی تاریخ چو شاندار ءُ روشن نه اِنت که اے دابیں مسله چو تچکا بگیشّنت، که باز وهدا همے یَکیں اِلاکه برے اِشیءَ گون بوتگ ءُ برے آئیءَ. بله اے اِلاکهانی تها هم بولان هچبر مان نبوتگ.

پدا دوئیں کئومانا گیشّتگیں، دراج مُدّتیں مُنَزّمیں ریاست نبوته.

باز مردمئے هئیال اِش اِنت هم که چو که بلوچستانءِ جاوَراں سابِت کته که پاکستانا کئومی سوال سَکّیں مزنیں جیڑهے ءُ مهلوک همے نارَهئے سرا شَرتِر همراهداری کنت، پمیشا پشتون سنگت هم وتی اے راجی جیڑهءِ سرا سیاست کنگ لوٹنت. بله پشتون ءُ بلوچ، دوئیں سرکارءِ لَٹّانی چیرا اَنت. چه بلوچستانءِ بهر ءُ بانگ کنگا مستریں جیڑه آ اِنت که پشتون سروک چه سرکار، فوج ءُ طالبان اِزمءَ وتی راجءَ رَکّینت بکننت. پمیشا اے مردمانی هیال اِش اِنت که بلوچستانءَ نِشتگیں پشتون سروک دنیگه نه وتی راجی جیڑهءَ سِریئس اَنت و نه که په وتی مهلوکءَ دگه زمین ءُ مُلکءِ گپّءَ. اے بَس بلوچستانءِ جاوَرانی تها یک رندے پدا، تاب ءُ ریسے مان کنگ لوٹنت. سرکاری نبشتهانی تها هم بلوچستانءِ جیڑهءِ مان گیشّینگءِ جُهد مُدام بوتگ ءُ بیت. بله مهلوکءِ تاریخءَ چون کنئے؟

چیا که بولان، بلوچستانءِ دومی نام اِنت. گپّ زیبائیءِ ببیت، یا مزَنیں کوه ءُ گَرئے، رومانئے کِسّه ببنت یا مُزاهِمتانی، بولان ءُ بلوچستان هم مانا اَنت، سرجمیءَ. ءُ اے کار مزنیں تاریخی اَمَلےءَ وت کتگ. هچ کالج ءُ یونیورسٹیءَ نوانینتگ که بلوچستان ءُ بولان هم مانا اَنت، هِچ سیاسی نزریَها رائج نکتگ. مهلوکءِ سئوت ءُ نازینک، زهیروک ءُ داستاناں بولان ءُ بلوچستانءِ هم مانائی رودینتگ.

اے ھبر پکّا ءُ تچک اِنت که بولان، وتی جھمنندانی اِنت، ءُ اے مردم بلوچ اَنت، چه ھزاراں سالءَ۔

Don’t miss posts from Balochistan Times!

We don’t spam!

+ posts

Leave a Comment