بلوچستان ءِ دَمگ تربت ءَ پہ پیسِتگیں درمان ءِ بہا کَنَگ ءَ ڈرگ انسپکٹر ءُ اسسٹنٹ کمشنر ءَ میڈیکل اسٹورے ءِ سرا چھاپہ جَتگ ءُ چہ ہودا بازیں دوا کہ آہانی وہد گوستہ درگیتکہ۔
اے چھاپہ سیزدہ اکتوبر ءَ ناصرآباد ءِ جنین آدمے ءِ شکایت ءَ رند جنگ بوتگ۔
اے میڈکل اسٹور تربت ءِ نامداریں چُکّانی ڈاکٹر، مختار بلوچ ءِ برات افتخار ءِ نام ءَ انت ءُ چہ شہر ءِ مستریں دوا بہاکنوکاں یکے۔ ڈاکٹر مختار تربت ءِ بازیں ہسپتالانی، چو کہ تربت میڈیکل ءِ شریدار انت ہم۔
دوا ءِ کاربندگ ءَ پد جنین گنتر بوتگ ءُ آئی ءَ چہ تربت انتظامیہ ءَ شکایت کتگ۔ شکایت ءَ پد ڈرگ انسپکٹر اکرم دشتی ءُ اسٹٹنت کمشنر حسین جان ءَ میڈیکل
اسٹور ءِ سرءَ چھاپہ جتہ ءُ پیشکانڈگ ءَ رند ہمے پیستگیں دوا ءِ مزنیں کساسے در اَتکگ۔
اے دواہانی دراہگ ءَ رند میڈیکل اسٹور سیل کنگ بوتگ، بلے پدا تربت انتظامیہ ءُ علاقائی سیاستدانانی سپارش ءِ سرءَ تہنا دہ ہزار ءِ ڈَنڈ ءِ دیگ ءَ رند اسٹور ءَ را پچ کنگ ءِ اجازت دیگ بوتگ۔
تربت ءُ سرجمیں بلوچستان ءِ تہا دوا بہا کنوکیں کمپنی، ڈاکٹر ءُ میڈیکل اسٹورانی ہم شوری ءَ علاج انسانی خدمت ءِ بدل ءَ انچیں کاروبارے جوڑ بوتگ کہ چرائی ءِ آسر ءَ مردم مُرت ہم کنت۔
یونیسیف ءِ کارندہے ءَ کہ وتی نام ءَ زاہر کنگ نہ لوٹیت، اے بابت ءَ گُشت: ”دوا بہا کنونکیں کمپنی پہ ڈاکٹراں لوگ ہم بند انت، آہانی لوگاں رنگ ہم کننت ءُ آہانی موبائل فوناں زر ہم مان کننت۔ کجام کدّ ءِ ڈاکٹریے آئی ءِ ہما ہساب ءَ ہزمت کننت تانکہ آہانی دواہاں بہا بہ کننت۔ اگں نادراہ ءَ یک درمانے پکار، ڈاکٹر آئی ءَ دہ درمان نبشتہ کنت دنت چیا کہ کمیشن گیپت۔ بلے ایکسپائریں دوا ءِ بہا کنگ سک خطرناک انت۔ چوناہا دوا کہ ایکسپائر بیت آئی ءِ اثر ہلاس بیت بلے باز وہدا ریکشن کنت ءُ مردم مُرت ہم کنت۔“
