نیشنل پارٹی ءِ تربت دپتر ءَ ترْاک، ہپت مردم زَدگ

21

دو شمبئے ءِ سہب ءَ  نیشنل پارٹی ءِ تربت دپتر ءَ دستی بمبے دؤر دیگ بوت کہ چریشی ءِ آسر ءَ ہپت مردم زَدَگ بوتگ۔

چم دیدیں مردمانی ہساب ءَ دو مردم موٹر سائیکل ءِ سرا اتک، دپتر ءِ دیم ءَ اسپیڈ سُست کُت ءُ پُشت ءَ نشتگیں مردم ءَ دستی بمبے چہ دپتر ءِ در ءَ دؤر دات ءُ دَر شُت انت۔

 ہپتیں زدگانی تہا سئے سَک ٹپّی انت بلے ایدگراں جاوَر سَک نگیگ نہ انت۔

زَدَگان ءَ تربت ڈسٹرکٹ ہسپتال ءَ علاج ءِ واستا راہ دیگ بوتگ۔

 دنیگہ ہچ تنظیم ءَ ترْاک ءِ ذمہ نہ زُرتگ۔ تربت ءِ جہہ منندانی گُشگ ءِ پد ءَ ترْاک ءَ رند شہر ءِ سر ءَ فوجی ہیلی کاپٹر گَشت کنگا انت ءُ چہ شہر ءَ دراہگ ءُ پُترگ ءِ راہانی سر ءَ پٹ ءُ پول گنتر کنگ بوتگ۔

نیشنل پارٹی بلوچستان حکومت ءِ اتحادی یےءُ پارٹی ءِ بازیں باسکے وزیری ءُ ایدگہ عہدہانی سرا کار ءَ انت۔ پارٹی ءِ کارمستر ڈاکٹر مالک بلوچ تاں دو سال ءُ نیم ءَ بلوچستان ءِ سروزیر ہم بوتگ۔

+ posts