ریاستءَ هزار زۆر جَت، بلے 27 جنوَریءَ شالءَ هزاراں مردم مُچّ بوت، مُزاهره کنگ بوت. جلسهءَ مردم انچۆ باز اَتنت که کَماشے گُشیت ”من وتی هۆشءَ شالءَ چُشێں مزنێں مُچّی ندیستگ.“
اے جلسهءَ چه کراچی ءُ چه بلۆچستانءِ بازێں دمَگاں بلۆچ اَتکگ ءُ هئوار بوتگ‌اَنت. هالانکه سرکارءَ، په بلۆچ یکجهتی کمیٹیءِ اے مُزاهرهءِ دێمءِ دارَگا، شالءَ دفه 144 نافز کت. دفه 144 یک کانونے، اے که نافز بیت، مرمانی یکجاگهی ءُ مُچّیءِ سرا پابندی بیت. هرکَس که مُچّی مێڑی کنت، آ کانونءِ هلاپ‌ورزیءَ کنگا اِنت.
اے جلسه، اے وهدی مزنێں بستارے داریت، چێا که اے بلۆچ ءُ ریاستءِ نیام ءِ هما کَشّ ءُ چیلّءِ بهرے که چه نوبر 2023ءَ چه کێچءَ بندات بوته ءُ تاں اے دمانءَ چلَگا اِنت. اے کشمکَش هما وهدا بندات بوت که 23 نومبر 2023ءَ پولیسءَ بالاچ مولا بخش ءُ دگه سئے ورنا، که چه پێسرا پولیسءِ بندیجاهان اَتنت، کُشتنت ءُ گُشت‌ئےِ که اِشاں مئے سرا مهله کتگ ءُ جئوابی کاررئوائیءَ کُشگ بوتگ‌اَنت، بالاچءِ لۆگءِ مردماں لاش زُرت ءُ تربت چئوکءِ سرا نِشتنت که ما اِنساپ لۆٹێں. چه کێچءَ اے مُزاهرهءَ لانگ‌مارچے بندات کت. 6 دسمبرءَ چه کێچءَ لانگ‌مارچ بندات بوت، پنجگور، خُضدار، شال، کوهلو، تئونسه، تاں 20 دسمبرءَ اسلام‌آبادءَ سر بوت.
اِسلام‌آبادء اے رئوانکءِ سرا همله کنگ بوت. پولیسءَ جنێن، مَردێن، کَماش، گونڈۆ، درُست لَٹ جت ءُ جێلاں بند کُتنت. اے زُلم ءُ زۆراکی که جهانءَ دیستنت، بلۆچانی تئوار مُهکم‌تِر بوّان بوت ءُ جهان‌ئےِ جَکسێنت. هالانکه سرکار اے سجّهێں راہءَ اے مردماں سَکّ جنجال کنان اَت. ”راهءَ مێتگانی هما مردم که مئے دێما اَتکگ‌اَنت ءُ مارا وَشّ‌آتکِش کتگ، آهانی هلاپءَ ایف آئی آر دَرج کنگ بوت. ڈیتھ‌اسکواڈاں مئے مردم تُرسێنتنت. یک جاگھے وَه مئے راہءِ دێما کنٹینرش اێر کُت،“ شاجیءَ گۆں بی ٹیءَ هبر کت ءُ گُشت.
چه کێچءَ بگر تاں اسلام‌آباد، پدا چه اِسلام‌آبادءَ واپسیءَ تاں شالءَ رسَگا، هر رۆچ، هر وهدا، هر جاگه سرکار اے مردماں تنگ کنگا بوته. سرکار وَس کنگا بوته که بلۆچءِ اے اهتجاجءَ بند بکنت یا پرۆش بدنت، ءُ بلۆچ یکجهتی کمیٹی همے جُهدا بوته که جمهوری رنگےءَ وتی اے اهتجاجءَ برجاه بداریت. دومی نێمگا، سجّهێں مێتَگانی مردماں اِشانءَ په اِزّت ءُ شرَپ دست گِپت. ”ھر نێمگا مارا گۆں پُلّ ءُ بلۆچی چادراں وَش‌آتک کنگ بوت،“ سّمی دینءَ گُشت۔
اے رئوانک 25 جنوَریءَ چه اِسلام‌آبادءَ که واتر بوت ءُ شالءَ سر بوت، هزاراں مهلوک اِشیءِ دێما دَر آتک. مهلوکءَ اے رئوانک په شانے وَشّ‌آتک کت، پُلّ زَرشان کُت ءُ انچێں دابےءَ دست گپتنت که راجے وتی هیرواں دست گیپت. هالانکه سرکارءِ وزیر جان اچکزئیءَ سوشل میڈیاءَ پوسٹ هم کتگ‌اَت که بلوچستان مهرنگءِ همراه نه‌اِنت.
بازێں مردمےءِ هئیال اِنت که اے لانگ‌مارچءَ بازێں مسالی کارے کتگ، شالءِ اے استِکبال ءُ اے جلسه هم همے مسالی کارانی تها هئوار اَنت. اِشانی هئیال اِش اِنت که اے سرجمێں تهریک، که 23 نئومبر 2023ءَ بندات بوته، سَکّ باز هسابءَ یادگارے.
اے دراهێں کَشّ ءُ چیلّ، بلۆچاں مُبائلانی سرا ویڈیو کنان کتنت، کَهر ءُ مِهر آنلائن شنگ بوتنت. مُلک ءُ درمُلکاں نِشتگێں سوشل میڈیا ایکٹیوسٹاں اے جاوَر چِست کنان کتنت. ائولی رند اِنت که بلۆچءِ تئوار چه بلۆچستانءِ دیواراں دَر شته ءُ پاکستانءِ تها هم جکسِته ءُ دَری مُلکاں هم، بازێنےءِ هئیال اِنت.
زاهرءَ اے زهرشانی په هما کارءَ که دَر اَتکه، بێگواهێں مردمانی دَرا کنگ، آ کار وَه انگه نبوته. بلے بلۆچ یکجهتی کمیٹی ءُ آئیءِ همکار بلۆچ مهلوکءِ موبَلائز کنگا هم سَک کامیاب بوتگ‌اَنت ءُ آلمی سورتءَ هم بلۆچستانءِ جێڑهءَ همینکَس پزیرائی گِپتگ که چِد ءُ پێسر نبوته.
بی وائی سیءِ اے مُزاهرهانی مسترێں لۆٹے اِش اِنت که بلۆچستانءَ یو اینءِ کمیٹیءِ سربراهیءَ انسانی هَکّانی جاوَرءِ سرا تهکیکات کنگ ببیت. آلمی سورتءَ اِشیءِ همایَتءَ بازێں سُر ءُ پُرے هم هست. یکجهتی کمیٹیءَ اے لۆٹءِ هَکّءَ یک آنلائن پٹیشنے هم جۆڑ کته، که اشیءَرا جهانءِ بازێں نامی‌ئێں مردم ءُ جُهدکاراں هم دَسخَت کته.
چه درُستاں مسترێں هبر اِش که بلۆچءِ همدستیءِ مزنێں مُزاهرهے بوت. ءُ اے چیزّءَ، هزار رندا مار وارتگێں مهلوکءِ همے هِمّت پدا زندگ کرت که اے رندی مئے سرۆکاں مئے سَر بُرز کرتگ ءُ اے مردم مئے هَکّانی گپّءِ سرا اۆشتنت. مُلکءَ بگر تاں درمُلکاں، بلۆچءَ نۆکێں توانائی‌یے رسِت.
مهلوکءِ تها همے همّت که اینکسێں مزنێں وهدےءَ رند اے جێڑهءِ سرا دَر اَتکگ، اے وت سَکّێں مزنێں کارے.
