ساجد حسین نِزرآبادا زمینئے امبازان دئیگ بوت

نامیێن بلۆچ اهوالکار و نبشته‌کار، بلۆچستان‌ٹایمزئے بُنگێجکار، ساجد حسین، آدێنَگئے بێگاها وتی بُنُکّی مێتگ، نزرآباد تُمپا زمێنئے امبازان واپێنگ بوت. ساجد، دو مارچا چه سویدنئے شهر اُپسالاها، بێگواه بوت و بێست و سئے اپرێلا آییئے جۆن، شهرئے کئورێا دست کپت. ساجدئے اُمر سی و نُه سال اَت.

ساجد نزرآبادئے مردمے و چه کسانیا گێشتر کراچیا بوتگ. ساجد دو هزار دوازدها چه ملکا در آتکگ و گوستگێن سالا سویڈنا پناهی رستگ‌اَت. همے آدێنگئے رۆچا آییئے جسَد چه سویڈنا کراچی، و چه کراچیا نزرآبادا سر بوت و همۆدا وتی رپتگێن ازیزانی نیاما کَبر و کَسارت کنگ بوت.

ساجد نامیێن اهوالکارے ات و بلۆچستانا مردمانی بێگواهی، نشه و کاچاکی، مردمانی بزّگیئے سرا نبشتهی کرتگ. ساجدئے نبشتهان مدام ساجد جنجالان پِرّێنتگ، چیا که آییا بلۆچستانا زُلمئے هما کسّه نبشته کرتگ‌اَنت که زالمان چێر دئیگ لۆٹِتگ‌اَنت. اے کار هاکمان دۆست نبوت، و ساجدئے درپَدَریئے بُن هم همِش اَت.

ساجدئے واکیه چۆنیا بوتگ؟ چه پئیما بوتگ؟ اے رِدا دنیگت سویڈنئے پولیسا وتی سرجمێن رپۆٹ نداتگ. تانکه رپۆٹ مئیئیت، ساجدئے جێڑهئے سرا دگه هبرێئے کنگ وتساچێن کسّهے بیت و هچ کارَ ندنت. اُمێد همِش اِنت که سویڈنئے پولیس نون وتی رپۆٹا سرجمَ کنت و ساجدئے لۆگئے مردمان سرَ کنت.

بله سئوب هرچے ببیت، چه ساجدئے بێرانیا بلۆچ چاگردا آ تاوان که رستگ، آییا اِلاج نێست. ساجدئے جاگه مدام هالیگَ مانیت وهجبر پُرّ کنگ بوتَ نکنت.