عطاءالّله مێنگل؛ اَهدے بێران بوت

130

واجه مێنگَل هما گُڈّی سَرۆک اَت که بلۆچستانئے جێڑهئے سَرا، چه گْوَستگێں هَپتاد سالا گۆں سرکاری پئوج و اِجَنسیاں مُدام جنگ و جێڑها اَت. چه نۆزدَه سَد و پَنجاهئے زمانَگا بگر، تاں وتی گُڈّی نپَسا، بلۆچ و بلۆچستانئے هَکّانی سَرا پُشتا نَکِنزِت 

بلۆچستان چه نۆزدَه سَد و چِلّئے گُڈّی زمانَگاں پاکستانئے بهرے، بله بلۆچستانا، سرکارا تهنا گْواجِن و دئولتئے در کنگا ابێد دگه هِچ نکرتگ. بلۆچستانئے مهلوک تاں رۆچِ مرۆچیگا په گُٹّے آپ و چُنڈے نانا مُهتاج اِنت

نۆزدَه سَد و پنجاهئے زمانَگا واجه مێنگل مَگرِبی پاکستانئے پارلیمانئے باسکے گِچێن کنگَ بیت، بله کَمّے رندتِرا جرنَل ایّوب خان، پاکستانئے هکومَتا چَپّیَ کنت و مُلکا پئوجئے هاکِمیَ بیت. واجه مێنگَل، پئوجئے هاکِمیئے هِلاپا کوکّارَ کنت

نۆزدَه سد و شَستئے بنداتی زمانَگاں، واجه مێنگل یک برے پدا چه کَلاتا اۆٹا کَٹّیت و پارلیمانئے باسکے گِچێن کنگَ بیت

پاکستانئے هاکِماں پاکستانا وَن یونِٹ کنگئے جار جت، ته واجه مێنگلا پدا هاکِمانی هِلاپا کوکّار و جاک بندات کرت و یک برے پدا واجه مێنگلئے هِلاپا مُلک‌دژمنیئے کێس کنگ بوت و واجه مێنگل جێل کنگ بوت

نۆزدَه سَد و هَپتادئے زمانَگا، سرکارا وتی پێسَری کانون، وَن یونِٹ هلاس کرت و پاکستانا چار سوبه جۆڑ کنگ بوت؛ اِشانی تها یک سوبهے بلۆچستان اَت. هپتادئے زمانَگئے گِچێنکاریان نئیشنَل ائوامی پارٹی بلۆچستانا چه سجّهێں گَلاں گێشتِر اۆٹَ گیپت و سرکار جۆڑَ کنت. واجه مێنگَل اے هکومئتے سَروَزیرَ بیت

بلۆچستانا اسکول و کالج، یونیورسٹی، چه همے دئورا بنداتَ بنت و واجه مێنگل و آییئے همراه په بلۆچانی وانِنده و وشهال کنگا سَکّێں مزَنێں جُهدے کننت. شالئے بۆلان مئیڈیکل کالج ببیت یا بلۆچستان یونیورسٹی، اے سجّهێں دْرِچ، واجه مێنگلئے دورچاری و شَرکاریئے نشانی اَنت

گْوَشنت که واجه مێنگَل سروَزیریئے وهدا هم پاکستانئے پئوجئے سَرا باوَرَ نکنت. بلۆچستانا، بلۆچی وانَگئے کانونئے هَمراهیا بلۆچستانئے وتی لێویز و پولیسا گێشَ کنت. پولیس و لێویزا بلۆچستانئے جندئے مردُمان بَرتیَ کنت

همے نیاما، پاکستانئے سَروَزیر بُٹّۆ سهیگَ بیت که اے مردم په وتی پولیس و لێویزا چه اِراکا سِلاه هم آرَگا اَنت. همے وهداں اے گَپّ درَ کئیت که پاکستانا اِراکئے اِمبئیسیا په بلۆچان بازێں سِلاهے آتکگ و اێر اِنت. گوَشگَ بیت که اے سِلاهانی آرۆک واجه مێنگَلئے سرکار اِنت و اِشانی دلا اِنت که گۆں سرکارا جنگَ کننت و بلۆچستانا جتا کننت

بُٹّۆ، بلۆچستانئے سرکارا هلاسَ کنت و واجه مێنگَل و اے دگه سرۆکان جێلَ کنت. بلۆچستانا نئواب بگٹیا گئورنَرَ کنت و پئوج مێتَگاں مانَ رِچیت و مردماں جَنان و کُشانَ کنت

مرۆچی بلۆچستانا چُشێں لۆگے نێست که آییئے یک نه یک پرزندے پئوجا چِست نکرتگ و بێگواه نکرتگ. بله بلۆچستانئے ائوَلی بێگواهێں مردم اَسَد مێنگَل اِنت که واجه مێنگَلئے بَچّ اِنت

هَپتادئے زمانَگا واجه مێنگَل که چه جێلا درَ کئیت، ته جَلاوتنَ بیت و په بلۆچستانئے آزادیا گَلے هم جۆڑَ کنت. بله بازێن وهدێا رند وتی جَلاوتَنیا هلاسَ کنت و بلۆچستانا کئیت و نندیت

بلۆچستانئے انّونێں جنگئے بِنداتا پاکستانئے پئوجی هاکِم جرنَل مُشرّپا جار جتگ‌اَت که بلۆچستانا سئے سردار مسله کنگا اِنت و اِشان بُنے نێست. اے سئیێں سَردار، نئواب هئیر بشک مَری، اکبر بگٹی و عطاءالّله مێنگل اَتنت

نئواب بگٹی، دو هزار و شَشا پاکستانئے پئوجا کُشت و لاش بلاهێں پێتیێا کُرت، پێتی کُبل کرت و ڈێره‌بگٹیا برت و کَبر کرت

نئواب هئیر بشک مَری، کراچیا هسپتالا، چه نادراهیا بێران بوت

سئیمی و گُڈّی سرۆک، واجه مێنگَل دو ستمبر دو هزار و بیست و یکّا، کراچیا هسپتالێا بێران بوت

واجه عطاءالّله مێنگَل، بلۆچستانئے  سیاسی راجدَپتَرا دانایی، دورچاری و سَنگینیئے اَهدے اَت. بلۆچستان، چه داناێں سرۆکێا زِبَهر بوت. بلۆچستانئے سیاسی راجدَپترئے اَهدے بێران بوت