News Desk

گُلزار اِمام کئے اِنت

بلوچ نیشنل آرمیءَ جار جتگ که ”لهتیں وهد اِنت مئے کمانڈَر گُلزار اِمام بیگواه اِنت. گَلءِ جارچین مُرید بلوچءَ وتی بئیانےءِ تها اے هبر کرتگ‌اَنت ءُ گوَشتگ ئِے که ما گُلزار اِمامءِ بیگواهیءِ هبرءِ تهکیک کرتگ ءُ ما سهی ایں که گُلزار پاکستانءِ چیریں ادارهانی هراستءَ اِنت.“ چه پاکستانءِ نیمَگا انگته اے دابیں هِچ گپّے دیما نئیاتکگ.

کِساس شَش هپت ماه بیت که اے هال گوش په گوش گَردان اِنت که گلزار چه ایرانءَ جهازےءَ سوار بوتگ ءُ تُرکیءَ شُتگ۔ چه تُرکیءَ چِست کنگ بوتگ ءُ هما اِنت که بیگواه اِنت.

گلزار کئے اِنت؟

گُلزار اِمام پنجگورءِ کوهستانی دمَگ پَرومءِ مردمے. بِلّ تُرے مکرانءَ کبائلی نِزام نیست، بله کبیله، زات ءُ هانَدان هست‌اَنت. اے کبیلهانءَ وتی سِلهبندیں تاکت هست. گُلزار، میر اِمام شمبئےزئیءِ چُکّ اِنت ءُ وتی پتءِ کوشءَ رند، وتی کبیلهءِ تاکتءِ مالک بوت ءُ کبیله ءُ الاکهءِ مردم گُمان کنگا اَتنت که وتی پتءِ بیرءَ گیپت، بله گلزارءَ گوں وتی پتءِ کاتِلاں سَلاه کرت ءُ جار جت که مئے اَسلیں دشمن ریاسَت اِنت ءُ من گوں ریاسَتءَ جنگ کناں.

گُلزار بی آر اےءَ شُت. مکرانءَ بی ایل ایف ءُ بی آر اےءِ سنگتی ءُ نَمِڑَگانی سئوَب هم، باز مردمَ گوَشیت همِش اِنت که گُلزارءَ گوں واحد کمبر، الله نزر ءُ اے دگه مردماں بلوچی سنگتی کتگ.

براهُندگ که چه مُلکءَ در آتک ءُ یورُپءَ سر بوت، گرِپت ئِے کم کمّا چه بی آر اےءَ هلاس بوت. مردم گوَشنت که یَکّ رندے براهُندگ وتی سرمچاراں گُلزارءِ کئیمپءَ دیم دنت ءُ یَک سرمچارے وتی مرکزی کئیمپءَ لوٹیت، که آ سرمچارءَ ”پارٹیءِ اُسولانی هِلاپ‌ورزی کرتگ“ گڑا گُلزار اے مردمءَ براهُندگءِ مردمانی دستءَ ندنت ءُ جُست کنت که هِلاپ‌ورزیءَ مئے دیما بگوَش اِت ءُ هر سزا ءُ جزایے هست، مئے دیما ببیت.

اے کَشّ ءُ چیلّ رئوان کنت ءُ لهتیں سالءَ رند، بی آر اےءِ بلوچستانءَ نِشتگیں سرمچار چه براهُندگءِ دستءَ در کایَنت ءُ گلزارءِ دستءَ بنت که مُلکءَ نِشتگ ءُ جنگ کنگا اِنت۔ دومی نیمگا یو بی اےءِ بازیں مردمے چه مِهران مَریءِ سروکیءَ دم بارت۔ بی آر اے (گُلزار امامءِ سروکیءَ) ءُ یو بی اےءِ بھرے اِنزِمام کننت ءُ بی این اے (بلوچستان نیشنل آرمی)ءَ جوڑ کننت.

گلزار کدی گِرَگ بوته، کُجا گِرَگ بوته، چوں گِرَگ بوته؟ اے رِدا مُرید بلوچءَ انگت هچّ نگوَشته۔

باز مردم گوَشیت که گُلزار کَسےءَ رَد داتگ ءُ تُرکیءَ لوٹائینتگ، همے گپّءِ سرا که ما گوں تئو دیم په دیما هبر کنگ لوٹین که ترا ءُ تئیی پارٹیءَ، بلوچستانءِ آزادیءِ جُهدءَ کُمَکّ کنیں. اے مردمانی گوَشگ اِنت که گلزار په همے میٹِنگءَ تُرکیءَ شُتگ، بله جهازارءَ سوار بئیَگءِ هال ئِے هست، چه جهازءَ ایر آیَگ ءُ تُرکیءَ سر بئیگءِ هِچ هال نیست.

گُمان همِش اِنت که تُرکیءَ گُلزار گِپتگ ءُ پاکستانءِ دستءَ داتگ.

گُلزار که شَش و هپت ماه اِنت که پاکستانءِ دستءَ اِنت، گڑا پاکستان چیا گُلزارءَ دیما نئیاریت؟ اے وَه سکّیں مزنیں نیوزے. گُلزارءَ لاهورءِ بَمب دَماکه ءُ اے دابیں بازیں کارےءِ سَرا تچکءَ میڈیاءِ تها هبر کرتگ. اے پاکستانءِ واستا مزنیں نیوزے ءُ مزنیں کامیابی یے، گڑا اے هبر گار اِنت چیا؟ بازیں مردمےءِ هئیال اِش اِنت که اگں پاکستان بِمَنّیت که منی کِرّا اِنت، گڑا پاکستان چیر دات ئِے نکنت. گڑا باید اِنت اَدالَتاں بیاریت ئِے. میڈیاءِ دیما بیاریت ئِے. ءُ همے کارءَ پاکستان کنگ نلوٹیت. بله بازیں مردمے جُست کنگا اِنت که بی این اے ءُ مُرید بلوچ اے سرجمیں گپُءَ چیا کنگا نه‌اِنت؟

دلگوش: اے رپورٹ 27 نومبرءَ اَپڈیٹ کنگ بوتگ۔

Don’t miss posts from Balochistan Times!

We don’t spam!

+ posts

Leave a Comment