Attaulla Méngal; ahdé bérán but

103

Wája Méngal hamá goddhi sarók at ke Balóchestánay jérhahay sará, cha gwastagén haptád sálá gón sarkári pawj o ejansián modám jang o jérhahá at. Cha nózdah sad o panjáhay zamánagá beger, tán wati goddhi napasá, Balóch o Balóchestánay hakkáni sará poshtá nakenzet.

Balóchestán cha nózdah sad o chellay goddhi zamánagán Pákestánay bahré, bale Balóchestáná, sarkárá tahná gwájen o dawlatay dar kanagá ábéd dega hech nakortag. Balóchestánay mahluk tán róche maróchigá pa gotthé áp o chondhé náná mohtáj ent.

Nózdah sad o panjáhay zamánagá Wája Méngal magrebi Pákestánay párlimánay báské gechén kanaga bit, bale kammé randterá Jarnal Ayub Khán, Pákestánay hokumatá chappia kant o molká pawjay hákemia bit. Wája Méngal, pawjay hákemiay helápá kukkára kant.

Nózdah sad o shastay bendáti zamánagán, Wája méngal yak baré padá cha Kalátá óthá katthit o párlimánay báské gechén kanaga bit.

Pákestánay hákemán Pákestáná wan yuneth kanagay jár jat, ta Wája Méngalá padá hákemáni helápá kukkár o ják bendát kort o yak baré padá wája Ménglay helápá molkdozhmeniay kés kanag but o Wája Méngal jél kanag but.

Nózdah sad o haptáday zamánagá, sarkárá wati pésari kánun, wan yuneth halás kort o Pákestáná chár suba jórh kanag but, esháni tahá yak subahé Balóchestán at. Haptáday zamánagay gechénkárián Nayshnal Awámi Párthi Balóchestáná cha sajjahén galán géshter ótha gipt o sarkár jórha kant. Wája Méngal é hokumatay sarwazira bit.

Balóchestáná eskul o kálej, yuniwarasthi, cha hamé dawrá bendáta bant o Wája Méngal o áiay hamráh pa Balócháni wánendah o washhál kanagá sakkén mazanén johdé kanant. Shálay Bólán Maydhikal kálej bebit yá Balóchestán Yuniwarasthi, é sajjahén drech, Wája méngalay durchári o sharkáriay nesháni ant.

Gwashant ke Wája méngal sarwaziriay wahdá ham Pákestánay pawjay sará báwara nakant. Balóchestáná, Balóchi wánagay kánunay hamráhiá Balóchestánay wati léwiz o pulisá gésha kant. Pulis o léwizá Balóchestánay jenday mardomán bartia kant.

Hamé nyámá, Pákestánay sarwazir Botthó sahiga bit ke é mardom pa wati pulis o léwizá cha Eráká seláh ham áragá ant. Hamé wahdán é gapp dara kayt ke Pákestáná Erákay embaysiá pa Balóchán bázén seláhé átkag o ér ent. Gwashaga bit ke é seláháni árók Wája Méngalay sarkár ent o esháni delá ent ke gón sarkárá janga kanant o Balóchestáná jetá kanant.

Botthó, Balóchstánay sarkárá halása kant o Wája Méngal o é dega sarókán jéla kant. Balóchestáná Nawáb Bogthiá gawrnara kant o pawj métagán mána rechit o mardomán janán o koshána kant.

Maróchi Balóchestáná choshén lógé nést ke áiay yak na yak parzendé pawjá chest nakortag o bégwáh nakprtag. Bale Balóchestánay awali bégwáhén mardom Asad Méngal ent ke Wája Méngalay bacch ent.

Haptáday zamánagá Wája Méngal ke cha jélá dara kayt, ta jaláwatana bit o pa Balóchestánay ázádiá galé ham jórha kant. Bale bázén wahdéá rand wati jaláwataniá halása kant o Balóchestáná kayt o nendit.

Balóchestánay annunén jangay bendátá Pákestánay pawji hákem Jarnal Mosharrapá jár jatagat ke Balóchestáná say sardár masla kanagá ent o eshán boné nést. É sayén sardár, Nawáb Hayr Bashk Mari, Akbar Bogthi o Attaulla Méngal atant.

Nawáb Bogthi, do hazár o shashá Pákestánay pawjá kosht o lásh baláhén pétiéá kort, péti kobl kort o Dhéra Bogthiá bort o kabr kort.

Nawáb Hayr Bashk Mari, Karáchiá hespetálá, cha nádráhiá bérán but.

Saymi o goddhi sarók, Wája Méngal do Satambar do hazár o bist o yakká, Karáchiá hespetáléá bérán but.

Wája Attaulla Méngal, Balóchestánay syási rájdaptará dánái, durchári o sanginiay ahdé at. Balóchestán, cha dánáén sarókéá zebahr but. Balóchestánay syási rájdaptaray ahdé bérán but.