Home / Balochi / سئید هاشمیئے بُت گوادرا ایر کنگ بوتگ

سئید هاشمیئے بُت گوادرا ایر کنگ بوتگ

بلوچی زبانئے مستریں هزمتکار و مزن‌نامیں شایر و زبانزانت سئیَد زهور شاه هاشمیئے بُت گوادرئے کشتی چئوکا ایر کنگ بوتگ.

اے بُت روبرکتی بلوچستانئے نامداریں ازمکار هسن یادگارزادها اڈّ کُتگ. بُتئے کالب آییا چه وتی لوگا اڈ کُتگ و گونی بوتگ. زیک و مرچی، آییا گْوادرئے ازمکارانی همراهیا بُتئے کالب پُر کُتگ.

آییئے گوشگئے رِدا بُت ماهے جنت تاں سرجما هشک ببیت. هشک بئیگا رند، رنگ و روگن و گُڈّی کار کنگ بنت.

په سئیدئے بُتئے اڈ کنگا گوادرئے سیاسی و چاگردی کارنده، میر ارشد کلمتی، هاسین کُمک کنگا انت. هالتاک “آزادی”ئے رِدا، آییا گوشتگ که په بُتئے دیمدراییا مزنیں مراگشے برجم دارگ بیت.

سئید هاشمی بیست و یک اپریل 1926آ رودرآتکی بلوچستانئے بندن، گْوادرا ودی بوتگ. آییئے مسترین کارانی تها بلوچی زبانئے نبشته رهبندئے ٹهینگ، بلوچیئے ائولی لبزبلد، بلوچی زبان و ادبئے تاریخ، ائولی بلوچی گدار، آزمانکانی ائولی کتاب و آییئے جندئے شئیرانی بازیں دپترے هوار اَنت.

سئیَدا بلوچی، پارسی، اربی و اردوا نبشته کُتگ. 1963آ وهدئے آ هندُستانا رئوت، اودا سنسکرت زبانا هم در بارت.

رنجئے نادراهیئے سئوبا آ سکّ نزور و ناجوڑ بیت، بله تاں گُڈّی ساها په بلوچیا کارا بوتگ. آییا مارچ  1978آ چه اے دنیایا سپرَ کت.

بُتئے ایر کنگئے واستا، روبرکتی بلوچستانئے نامدارین بُتکار هسن یادگارزاده وت سئیَدئے بُنجاهی شهر گْوادرا آتکگ. رودرآتکی بلوچستانا اے آییئے ائولی رَند انت. چد و پیش آییا وتی هُنر دنیائے بازین ملکیا پیش داشتگ.

هسن یادگارزادها بلوچانی بازیں تاریخی کردارانی بُت اڈ کُتگ اَنت که آیانی تها ملّا کمالان، سبا دشتیاری، استاد ابدلمجید گْوادری، میر چاکر رند، میرهمّل کلمتی و دگه بازینے هوار اَنت.

بیست و نُه نومبرا کشتی چئوکا، همودا که سئیدئے بُت ایر کنگ بوتگ، سئید هاشمیئے شرپا مزنین مراگشے برجم دارگ بئیگا انت، و هسن یادگارزاده دسمبرئے دومی هپتگا چه روبرکتی بلوچستانا یک رندے پدا په بُتئے کالبئے بوجگا گوادرا کئیت.

About News Desk

Check Also

How important are indigenous land claims?

How important are indigenous land claims? In this episode, Dr. Zaffar Baloch joins our panel …

Leave a Reply

Your email address will not be published. Required fields are marked *