مزدورانی چِست کنگئے سَرا

370

بی ایل اے ئے ترجُمان، آزاد بلۆچا جار جتگ که مئے گَلا، 26 جونا، چه شالا شَش مزدور دزگیر کرتگ. آزاد بلۆچَ گوشیت که اے شَشێن مردم انٹرنِٹئے ٹاوَر اَڈّ کنگا بوتگ‌اَنت. گوَشیت ما کمپنیئے سجّهێن سامان سۆتکگ‌اَنت و شَشێن مزدور بُرتگ‌اَنت. رَندا سئے مزدور یله داتگ و دگه سئے انگته مئے کِرّا اِنت که مارا اِشانی سَرا شَکّ اِنت که اے په سرکارئے پئوجا کارَ کننت. بی ایل ائیا جار جتگ که اگن اکوامِ مُتّهده و جنیوا شَهرا نشتگێن رِیڈ کراس نیاما دئور بکننت و مارا اے گپّئے زمانَتا بدئیَنت که اے سئیێن مزدور په سَرکارا کارَ نکننت، ما اِشان یلهَ دئیێن، اگن نه، بی ایل ائے اے مردمان راجی اَدالَتا پێشَ کنت. بی ایل اےآ یو این و ریڈکراس، دَه رۆچئے مُهلَت هم داتگ‌اَنت.

تان اے دَمانا، نه یو اینا چه بی ایل اےآ دَزبندیے کرتگ و نه که ریڈکراسا اے رِدا گَپّ جتگ (بئیان و ٹویٹ دێما نئیاتکگ، اگن چێرکاییا گَپّے بوتگ وَه زانَگَ نبیت).

چه دوهَزارئے بِنداتا، بلۆچستانئے بلۆچ‌نِندێن هَند و دمَگان، هما جاگَهان که اِنسانان چه اے رُزواێن زِندا دَم بُرتگ‌اَت، بلۆچ سَرمَچار نامدار بوتنت و چه آ رۆچان، بلۆچستانئے جێڑهئے سجهێن تَک و پهناتانی سَرا، آزادی‌پسُندانی لێکه سَرا بوتگ. اے مێتَگان، سرکارئے زۆر چه هر چیزّا هلاس بوتگ. هکومت نه سرجَمیا سرکارئے دَستا بوتگ و نه تهنا سرمچارانی. بله دوێنانی کَشّ و چیلّ برابریا بوتگ. سرکارا زۆر جَنان کرتگ و سرمَچار دێما مان تَرّان بوتگ‌اَنت.

دوهَزار و نُها، شالا، یو اینئے اِنسانی همدردیئے ادارهێئے مردمانی سَرا ارُش بوت، یو اینئے یَک مردُمے کُشَگ بوت و یک مردمے، امریکی مَردَکے چِست کنَگ و برَگ بوت. بی یو ایل ایف نامێن، بلۆچ آزادی‌پسُندێن گَلێا جار جَت که اے ارُش ما کرتگ و جان سولیکی مئے گْوَرا بندیگ اِنت. گوَشتِش که اگن امریکه و یو این، جان سولیکیئے سَلامتیا لۆٹَنت، مئے لهتێن شَرت بِمَنّنت. بی یو ایل ایف، وه هما اِنت گار بوت بله اے شَرتانی پێش کنگئے دئورانئے سجهێن سیاسی سرگرمیانی مرکز هئیربَشک مَری اَت و اے گپّ هم زاهِر اَت که بی یو ایل ایف، اَسلا هئیربَشکئے بی ایل اے و الّا نِزارئے زئییئے بی ایل ایفئے هئوارێن نام اِنت، بله تان مرۆچیگا اے گَپّ بی ایل اے و بی ایل ایف، نه اے کارا وتیگَ کننت و نه که گوَشنت که ما نکرتگ. البت، چه هئیربَشک و گُلام مهمدئے سرگرمیان همے پدّر اَت که اے مردم سهیگ اَنت.

سَرکار، سیاسی کارکُن و سرۆکان جنان و کُشان اَت و بلۆچ سرمچار، سرکارئے جاسوسان. مێتَگان، یک نێمگے سرکارے پئوجئے پولیسِنگ اَت و دومی نێمَگا بلۆچ آزادی‌پسُندانی.

بلۆچانی چِست کنگ، کُشَگ و دئور دئیَگئے سَرا ریڈکراسا که هِچ نگْوَشت ته اے هامۆشیئے سَرا، دوهزار و دَها، بلۆچان، شالا، ریڈکراسئے کارگِسا ٹیلپون کرت و بیهار داتنت که شما گۆن بلۆچان زیادَتیا هئوار اێت، چه بلۆچستانا در کپێت اگن نه ما شُمارا جَنێن. ریڈکراسا وتی بلۆچستانئے کارگِس بند کرت و لَڈِت.

تان وهدێا، بلۆچستانا، مردمانی گار و بێگواه کنگئے سَرا پاکستانئے اے دگه شهرانی نامیێن مردمان تئوار چِست کرت. بلۆچانی همدَردی باز اَت. بله اے جنگ، که پێسرا پئوجی و سرمچارانی نیاما اَت، نون نیامئے مردمانی گِرَگ، برَگ، کُشَگئے نێمَگا چکَرِّت. سرکارا بلۆچانی سهولت‌کار چِست کنان کرتنت و بلۆچان، سرکارئے سهولت‌کار جَنان کرتنت.

بلۆچا، پنجابی جَنێن، آ هم ٹیچر جت و کُشت که سرکاری سهولت‌کار اَنت، رۆڑانی سَرا کار کنۆکێن مردم چِست کرتنت، آیانی کارڈ چارِتنت، بلۆچستانئے مردم یله داتنت و پنجابی کُشتنت، رَندا سِندی هم کُشتنت. باز وهدا اے کار وِڈیو هم کرت که لهتێن مردمئے دست بستگ‌اَنت، چَمّان پَٹّی بَستگ، بلۆچ اِشان سرَگا تیر جنانَ کننت و دئور دئیانَ کننت. اے هم سرکارئے سهولت‌کار گوَشگ بوتنت.

بلۆچ جنگی گَلانی گوَشَگ اِش اِنت که اے په سرکارا جسوسیَ کننت و آزادی‌پسُندانَ کۆشارێنَنت. دومی نێمَگا سرکارا هزاران مردم بُرتگ و بێگواه کرتگ. سرکارئے بُهتام اِش اِنت که اے مردم، آزادی‌پسُندان کُمَک کننت.

جهانا هر جاگه که بلۆچا همدَردے بوتگ، هئیران اِنت که ما وَه گوَشتگ که بلۆچ مَزلوم اِنت، بله اے کار وَه زالِمی اَنت. مردمان زانتگ که بازێن بێگواهێن مردمے آزادی‌پسُندانی هَمدَرد بوتگ، بله انگت بلۆچئے همراه بوتگ‌اَنت.

مزدور و هَجّامئے کُشَگ، جاسوسئے نامئے سَرا بازێن ناسِلَهبندێن مردمانی کُشَگ، چه بَس و گاڑیان، مردمانی شناستی کارڈانی چارَگ و پنجابیانی کُشَگ اَنچێن کار اَتنت که بلۆچئے نامئے سَرا تُهمَت اَنت. بلۆچئے نامئے سَرا پۆلِنگ اَنت.  

گپّ اے نه‌اِنت که تئو گْوَشئے اے مزدور جاسوس اَنت و اِشانی کُشَگ دهشتگردیے نه‌اِنت. اے گپّئے پئیسلهئے جُستا ترا کَس کنگا نه‌اِنت که جَنگئے تها کجام کار رئوا اِنت و کُجام نارئوا. اے کانون، جهانئے تها دێری گیشِّتگ‌اَنت. مردم تئیی کارانَ چارَنت، کارانَ گِندنت.

تان رۆچِ مرۆچیگا کَسَّ نزانت که یو این و ریڈکراسئے سَرا ارُش کنۆک کئے اتنت؟ هچ جنگی گَل، راجی سرۆکا اے دل مان نه‌اِنت که بِمَنّیت که اے کار ما کرتگ.

بی ایل اے و اے دگه جَنگی گَلانی سرۆک باید اِنت بِزاننت که اے مزدورانی برَگ، جنَگ و کُشَگ په بلۆچئے همدَرد یا اے دگه جهانا شَرّێن پئیگامے ندَنت و باید اِنت بلۆچستانئے مهلوکئے نامئے سَرا اے دابێن هِچ کارے مکننت که آییئے اسَر نَسل تان نَسل مهلوکا بزّگ و بَزّگتِر بکنت.