یوسف مَستی خان: اُصولی سیاستءِ کَلاتے پرُشت

68

یوسف مستی خان بلوچ سیاستدانانی هما لڑءِ مردمے اَت که چه برطانیهءِ لڈّگا رند پیدا بوتگ اَنت ءُ نوکیں راجدوستی سیاستءِ راه اِش آکوشته. بلوچستان که په نُه ماهءَ آزازدیں مُلکے بوته، آ وهدا آزادیں بلوچستانءِ سفارتخانه، کراچیءَ مَستی خان هانَدانءِ لوگ بوته.

آ زمانَگءَ بلوچ واننده سَک کَم بوتگ. تهنا سیر ءُ اَزگاریں مردماں وتی چُکّ وانینت کتگ اَنت. اِشیءِ سئوبءَ سیاستءِ زانت ءُ سرپدی هم باز نبوته. میر بزنجو ءُ دگه بازیں مردمےءَ اَبید یَک هاسیں مردمے واجه یوسف مستی خان بوتگ.

چه نوزدَه سَد ءُ شَستءِ زمانَگا، که واجه مستی خان سرگرمیں سیاستءِ بهرے بیت ءُ واجدوستیءِ همراهیءَ طبقاتی سیاستءَ هم سَک اهم سرپد بیت، تاں وتی زندءِ گُڈسَری دَماناں وتی نَظریاتی سیاست ءُ اصولانی سَرا اوشتوک اَت.

نوزدَه سَد ءُ شَست، هپتاد، هَشتاد، نئوَد، تاں دو هزارءِ دئورءِ نوکیں راجدوستی جُنزءَ، واجه مستی خانءَ وتی سیاسی سرگرمی هجبر بند نکُرتگ اَنت. هالانکه گوں اے دگه سیاسی سروک ءُ پارٹیاں اختلاف ئِے هم بوته، بله گوں هرکَسءَ په اِهترام و سنگینی بَهس ئِے کته.

واجه مستی خان دیر اِنت که شومُکءِ نادرهیءِ آماچ اَت ءُ روچ په روچ نِزورتِر بوان اَت، بله همے نادراهی جاگهءَ هم هر جاگه که دست ئِے رسِت، شُت ءُ سیاسی بهساں بهر ئِے زُرت. گوادرءَ بلوچانی هَکّانی جُنز ببیت یا کراچی شهرا په بیگواهیں مردماں آواز چِست کنگ، یا سجهیں شپءَ کراچی ایئرپورٹءَ جلّگ ءُ کریمه بلوچءِ جونءِ دَست گِرَگ، مستی خان مُدام گون اَت ءُ دلجمی یے اَت.

اے کَماشانی رئوَگءِ تاوان انّوں باریں زانَگَ بنت یا نه، بله هر کَماشے که چه اے جهانءَ رئوَگا اِنت، بلوچ سیاسی کِسّهءِ بهرے بَران اِنت گوں، که یَک نه یَک وهدے بلوچ راجدوستیءِ کسّهءِ سرجم کنگا الّمی اِنت.

واجهءِ اَرواه آسودَگ بات ءُ بلوچ راجءَ اے هاٹیگ ببات که اے گرانیں گَما بِسَگّیت.

+ posts