رۆهێلِ مهلب نسیر، سویڈنا زمینئے امبازاں دئیگ بوت

8

نامیێں بلۆچ نبشته‌کار مهلب نسیرئے یکّێں چُک، چارده سالی رۆهێل، 7 دسمبر، دو شمبهئے سُهبئے ساهت دَها، سویڈنئے شهر اوپسالها زمینئے امبازاں دئیگ بوت. رۆهێل و مات نومبرئے ماها کرۆنائے نادراهیا گپتگ‌اتنت. رۆهێل تاں چارده رۆچا اوپسالهئے اکێدمِسکا هسپتالا اَت و همے هسپتالا 23 نومبرا بێران بوت.رۆهێلئے بێرانیئے هال که شنگ بوت ته سویڈنا چُکانی مات و پت سک پرێشان بوتنت که یک چارده سالی گونڈۆے چۆن چارده رۆچا رَند، هسپتالئے تها مُرتَ کنت؟ سویڈنئے سجهێں مزنێں میڈیایا اے گپئے سرا گپ و تران بندات بوت و هسپتالانی نزامئے سَرا شَک کنگ بوت. اے تکانسری تاں هما وهدا برجاه اَت تاں مهلب نسیر وت سویڈنئے میڈیائے دێما آتک و گونڈۆانی مات و پتی هال داتنت که رۆهێل چه کسانیا نادراه بوتگ و رۆهێلئے پُپّ چه پێسَرا نزۆر بوتگ‌اَنت و اشیئے تها هسپتال و داکتراں هچ دابێں مئیارے نێست.رۆهێلارا سَن فلیپّۆ نامێں جِنِٹِک نادراهیے بوتگ که لَکّاں مردمانی تها یکێا بیت. بله رۆهێلئے نادراهی پێسرا زانَگ نبوتگ.

مهلب نسیرئے گوشگ اِنت که رۆهێل پێدایشئے وهدا برابرێں چُکّے بوتگ. وهدے اُمرئے پنچُمی سالا سر بوتگ و انگه هچ هبری نکتگ، ته من پرێشان بوتگان و کراچیا هسپتالاں بُرتگ. کراچیئے هسپتالاں مارا هال داتگ که چُک اشکُت نکنت. گڑا، مهلبَ گوشیت، که ما رۆهێلئے گۆشاں هیئرنگ اێڈ جتگ که مشینانی کُمکا گۆش بلکێں کار بکننت. بله کَم کَمّا رۆهێلارا جَٹکه شرو بوتگ ته رۆهێل نِزۆر تَرّان بوتگ و نوں ما سهی بوتگێں که رۆهێل ناسَلامت اِنت. گوشیت که ما تانکه مُلکا، بلۆچستانا بوتگێں ما نادراهیئے جِند نزانتگ که چے اِنت.

2019آ سویڈنئے داکتراں که ٹِسٹ کتگ‌اَنت، نوں زانگ بوتگ که رۆهێلارا سَن فلیپّۆ اِنت. اے نادراهی که کَسێا بیت، آییئے جِسم رۆچ په رۆچ کَمّ کنانَ کنت.رۆهێلا 2019آ گَردَگ یله داتگ. ورگی هم وارت نکته. داکتراں اپرێشن کتگ و ناپَگئے سَرا کسانێں بٹَنے پِر کتگ که چه همدا آپ، ورَگ و درمان داتگ.سَن فلیپّۆ جِنِٹک نادراهیے. بازێن زانتکار گوشنت که اے دابێں نادراهی گێشتر هما مات و پتانی چُکّان گیپت که وت ماں وتا تروزاتک و/یا ناکۆزاتک اَنت. پُشت تاں پُشت وت‌ماں‌وتا سور و سانگ کنگئے سئوبا چُکّاں بازێں اے دابێں نادراهیے گۆنَ کپیت.
اے نادراهی و مَرگا هما مردم هم تَکانسُر کتگ‌اَنت که آهانی جِند یا آهانی لۆگئے مردم گێشتر وت‌ماں‌وتا سانگبَندی کننت.
رۆهێلِ مهلب نسیر، اوپسالا یونیورسٹیئے کِرّا، مزنێں کبرِستانا زمینئے اَمبازاں دئیگ بوت. اے اَرداچئے وهدا بازێن بلۆچ و سویدیے گۆن ات.