گْوَستگێں رۆچا بلۆچ راجی جُنزئے دگه یک سَرۆکے، واجه میر جُمّعه خان بلۆچا اے کوڑهێں اِمرۆز یله دات. نۆزدَه سَد و پَنجاهئے زَمانَگا که واجه کَراچیا وانَگا بیت، هما زَمانَگا بلۆچ مهلوکئے بزّگی و بلۆچستانئے سَرا بئیۆکێں زُلم و جَبرا، واجه جُمّعه خان، سیاستئے نێمَگا بُرت
وتی نۆدَربَریئے زَمانَگا، کراچیا وهدے پاکستانئے سَرکار، اێرانئے باگی، دادشاهئے برات و گوَهارا دزگیرَ کنت، ته واجه جُمّعه خان، وتی اے دگه سنگتانی همراهیا زَهرشانیَ کنت و لۆٹَ کنت که اے مردم اێرانئے دَستا دئیگ مبنت. بله اے کارا سۆبێنَ نبنت
رَندا که اێران و عراقئے نیاما جنگَ بیت، ته جُمّعه خان و دگه لهتێں وانِندهێں بلۆچ عراقا رئوت. عراقئے بعث پارٹی، که آ وهدا کمیونِسٹ گَلے بیت، بلۆچاں کُمَکَّ کنت، جاگهِشَ دنت. اے گپّا هم نادِلگۆش مبێں که همے عراقی سِلاه و کُمَکّئے بُهتامَ بیت که پاکستانئے سروزیر بهُٹۆ، بلۆچستانئے سَرکارا هلاسَ کنت و رهشۆناں جێلَ کنت
همے زَمانَگا واجه جُمّعه خان و آییئے سنگت بلۆچستان لبرئیشن فرنٹ نامێں جَنگی گَلے جۆڑَ کنت و همے نامئے سَرا تاں مرۆچیگا بلۆچستانا یَک جنگی گَلے هَست که گێشتِر وانِندهێں آم بلۆچ که جنگا اَنت، گۆں همے گَلا بَندۆک اَنت
میر جُمّعه خان، کُلانچئے جَهمِنندے بله آییئے زِندئے گێشتری بَهر درانڈێهیا گْوَستگ
جُمّعه خان، هما ائولی بلۆچانی سرَپا اِنت که وت دێما کِنزِتگ، دَرانڈێهێں بلۆچ چِتگ و نَزّ آورتگ‌اَنت، گَل جۆڑ کتگ، دَری مُلکاں سپَر جنتگ و په بلۆچستانئے آجۆییا دَری مُلکانی کُمَک هم گِپتگ
چه جُمّعه خانئے بێرانیا بلۆچا وتی جُنزئے مزَنێں سرۆکے باهێنت. یک مزَنێں تاوانے اِش اِنت هم که واجها وتی اے تئوامێں سیاسی سپَر نبشته هم نکرتگ که آیۆکێں نَسل پدا هما رَدیاں مکنت که یک زَمانَگے کنگ بوتگ‌اَنت
