چہ مشکےءَ ہال اِںت کہ سرکاری لشکرءَ ڈاکٹر اللہ نظرءِ گْوہار، نوراتون آوار جتہ۔ نوراتونءُ صوفی دادکریمءَ ابید، سوج اِنت کہ دگہ کساس بیستءُ شَش جنیں آدم ہم برگ بوتہ کہ آہانی نام انگہ زانَگ بُوّگءَ نہ اَنت۔
چہ فوجی ہیلی کاپٹرانی شیلنگءَ غوث بخشء شکاری عرض محمد، غوث بخشءِ لوگ بانُک، بی بی، غوث بخشءِ کسانیں زہگے، بابلء ائیدو ءُ عبدالغنیء بدل بیران بوتگ اَنت۔
پیسرا مردمے چِست کنگ بوت تہ مردماں کوکارءُ جاک کت۔ آخر دیراں پد مردم یلہ کنگ بوت۔ چاءُ رَند مرم چست کنگ بوتءُ سالانی سال بیگواہ بوت، مردمانی کوکارءُ جاک کارءَ نیاتک اَںت۔ کمو دیمترا چست کتگیں مردم کُشگءُ دور دئیگ بوت اَنت۔ مردماں کوکارءُ جاک یلہ نہ دات۔ بلے اے کوکار کنوکیں مردمانی توان تُسانءُ دَم بران بوت۔
میتگانی سوچگءِ وہدا ہم فوجءَ جنینءِ چست کنگءُ برگءِ کار نہ کت۔ باز وہدا جنین جَنَگ بوت اَنت، بلے بَرَگءِ ہال سک کم اَت۔ نوں ہمے ظاہر بوگءَ اِنت کہ چدءُ دیم لشکرءِ دیم گوں جنیناں بیت۔ کم کمءَ ہرکَسی باری اَتک کنت۔
گوستگیں ماہءَ وہدے ڈاکٹر اللہ نظرءِ لوگبانُکءُ اسلم بلوچءِ گہار گوں دگہ دو جنیں آدمءُ لہتیں زہگءَ آوار جنگ بوت، تہ چہ سجّہیں نیمگاں کوکارءُ جاکءَ رَند یلہ دئیگ بوت اَنت۔ بلے اے گپ چہ ہما وہدا ہم زانَگ بوت کہ اے تہنا بنداتے اَت۔ تہنا پاکستان نہ، دنیاءِ درہیں ملک انچش کننت، نوکیں کارےءِ کنگءَ پیسر، یک ٹیسٹ کیسے بیت، چہ ہمے ٹیسٹ کیسءَ زانگ بیت کہ اگاں دگہ برے چُش کنگ بہ بیت تہ اے کار کامیاب بیت یا ناکام۔
پاکستانءُ اندگہ ملکانی نیامءَ فرق اِش اِنت کہ پاکستان یک کارے کنت، کمو وہدا رَند ظاہرءَ مردماں یلہ دَنت، بلے آ راہءَ یلہ نہ کنت۔ تنا وہدا مرم اے گپءَ کننت ءُ گشنت کہ اے کار وَ پیشءَ ہم بوتہ۔
