دشت آپریشن ءِ پنچمی روچ ءَ پاکستانی زمینی فوج ءَ دمگ ءِ بازیں میتگاں سہب ءَ مہلا لوگ لوگ پٹّتگ ءُ شش مردم آوار جتگ ءُ گوں وت بُرتہ۔
چہ بل نگور ءِ بازار ءَ گوْزان ءَ راہ ءَ ایف سی ءِ دوازدہ گاڑی ءِ مردماں کپکار، شملی، دزرد ءُ گوارگ ءِ سوالی میتگ ءَ لہتیں لوگ پیش پیش کُتگ ءُ ششیں مردم دزگیر کتگ انت۔ آوار جتگیں مردمانی نام اے وڑ انت: بشیر ء گلام مہمد، سابر ء پنڈوک، لال بکش ءِ ہیبتان، نسیر ء دُر مہمد، پُردل ء بالاچ ءُ رزاق ء امین۔
پنچ ہیلی کاپٹر ءَ کہ چراہاں دو ءَ ساہیجی ءِ ماتبند ءِ ءُ سئے ءَ تلار ءِ سرا گَشت جتگ ءُ واتر بیتگ انت۔
زیکّیں روچ ءَ ایف سی ءَ بل نگور ہائی اسکول ءَ مراگشے برجم داشت ءُ جار جت کہ ما ایشی ءَ پبلک اسکولے کنیں ءُ سرمچاراں جنَگ ءَ پد دمگ ءِ تہا ایمنی ءُ دیمرئی کاریں۔
ہؤر ءِ بازار کہ ساہیجی ءِ بُن ءَ انت، چہ ہودا مہلوک لڈّگ ءُ دگہ میتگاں روگا انت۔ ہؤر ءِ یک جہہ منندے ءِ گشگ ءِ پدا فوج شپ ءَ آہانی کسانیں بازار ءَ ایر کپیت ءُ آہانی آپ ءُ راشناں بارت۔
چہ تربت ءُ گوادر ءَ دشت ءِ راہ ءِ سرا فوج ءَ چوکی بستگ ءُ نشتگ ءُ ہچ وڑیں راشن ءُ ازباب ہودا روگا نئیلگا انت۔ گمان ہمیش انت کہ فوج ساہیجی ءِ تہا کہ ہودا سرمچار پناہگیر انت، روگ نہ لوٹیت بلے راہ اش بستگ انت کہ یکے آہاں راشن ءُ ازباب سر مہ کنت۔
دشت ءِ مردمانی گُشگ ہمیش انت کہ فوجیاں جار جتگ کہ آ نی ہمدا نشتگ انت ءُ تاں جون ءَ سرمچاراں پرْوش دینت۔ چو کہ ساہیجی ءِ تہہ ءِ روگ پہ فوج ءَ گران انت، مردم گشنت کہ آ ہمے ودار ءَ نشتگ انت کہ سرمچاراں پہ تُن ءُ گُژن پروش بدینت۔
ساہیجی چہ 2004 ءَ پہ بلوچ سرمچاراں پناہ گاہے بیتہ ءُ ہودا فوج ءَ باز رند ءَ آپریشن کتگ بلے سرمچاراں وتا چہ کوہ ءِ بازیں چیریں راہ ءُ دراں کَشّتہ۔ اے رندیگیں آپریشن چہ پیشیاں گیشتر توانا تر انت کہ ایشی ءِ تہا فوج ءِ ششت گاڑی ءُ پنچ ہیلی کاپٹر بہر زورگا انت۔
