روس ءِ صدر ولادی میر پوٹن ءَ دوشمبے روچ ءَ روس ءِ فوجیانی سوریا ءَ چہ دزکشی ءِ ہکم داتگ۔ اے گپ پوٹن ءَ روس ءِ سرکاری میڈیا ءَ گوں تران کنان ءَ گُشتگ۔
روس ءِ فوج ءَ اے پنچمی ماہ انت کہ صدر بشرالاسد ءِ کُمک کنگا سوریا ءِ تہا پُترتگ ءُ بشرالاسد ہکومت ءِ دژمنانی سرا بمباری کنگا انت۔ امریکہ ءُ یورپی ملکاں روس ءِ سوریا ءِ تہا دزمانگیجی ءِ سرا سک باز ایرادگری کُتگ۔ نیٹو کہ بیست ءُ ہشت گوریچانی امریکہ ءُ یورپی ملکانی فوجی اتحاد ءِ گلے روس ءِ سوریا ءِ تہا پُترگ ءَ سک نہ وش بوتگ۔
روس ءِ ریاستی نیوز رپورٹ ءِ رد ءَ پوٹن ءَ بشرا الاسد ءَ ٹیلیفون کُتگ ءُ گُشتگ کہ روس سے شنبے ءِ روچ ءَ وتی فوجیاں سوریا ءَ چہ درکنگ ءَ بُنگیج کنت۔ پوٹن ءَ اے ہم گُشتگ کہ روس ءَ سوریا ءِ تہا وتی دزمانگیجی ءِ مول ءُ مُراد پیلو کُتگ انت پمیشا فوج ءِ سوریا ءِ تہا دارگ ءِ دگہ ہچ رنگیں نیمونے پش نکپتگ۔
روس ءَ سوریائی ہکومت ءِ کُمک ءِ واستا کسانیں فوجی مشنے سوریا ءِ تہا برجم دارگ ءِ ہم جار جتگ۔ یک یورپی سفارتکارے ءَ برطانیہ ءِ گارڈین روتاک ءَ را گون تران کنان ءَ گُشتگ کہ پوٹن ءِ سرا سرجمی ءَ اوست کنگ نبیت۔ گوْست ءَ ہم پوٹن ءَ بازیں اے وڈیں گپ جتگ بلے ہشکیں گپ بوتگ انت۔ ”مارا سبر کنگی انت ءُ چارگی اِنت کہ پوٹن ءِ اے گپانی مانا چی انت۔“
روس ءَ فوجی دزمانگیجی گوستگیں سال 2015 ءِ ستمبر ءَ بندات کُتگ ات۔ روس ءِ جنگی جہازاں امریکہ ءُ سعودی عرب ءِ اتحادی یاگیانی سنگرانی سرا اُرش کُتگ۔ بندات ءَ روس ءِ گُشگ اے بوتگ کہ روس داعش ءِ ہلاپ ءَ کاروائی کنت بلے اُرشانی بندات ئےِ چہ یاگیانی سنگراں کتگ ات۔
برطانیہ ءِ تہا انسانی حقانی گلے ءِ گُشگ ءِ ردا روس ءِ اُرشاں سک باز عام مہلوک مُرتگ۔ گوستگیں سال ءِ ستمبر ءَ بگر داں اے سال ءِ مارچ ءَ چہ روسی جنگی جہازانی اُرشان 2208 مردم بیران بوتگ۔ ایشانی تہا یک ہزار ہپت سد ءُ سی ءُ سے عام مہلونک بوتگ۔
نیویارک ٹائمز ءِ رپورٹ ءِ رد ءَ اقوام مُتحدہ ءِ سوریا ءِ ہاسیں داشتگیں سفارتکار اسٹیفان ڈی مستورا ءَ سوریا ءَ صدر بشرالاسد ءُ سوری یاگیانی میان ءَ یکبرے پدا ایمنی ءِ معاہدہے ءِ سرا اتفاق کنگ ءِ کار دوشنبے ءِ روچ ءَ دوبر بُنگیج کُتگ انت۔ اقوام مُتحدہ سک دیرانت سوریا ءِ تہا جنگ بندی ءِ جہد ءَ انت۔ اے ایمنی ءِ گپ ءُ ترانانی تہا داعش گون نہ اِنت پرچہ کہ اقوام متحدہ ءُ دُنیا ءِ گیشتریں مُلکاں داعش ءَ را یک دہشتگردیں گلے نامینتگ۔
Sajid Hussain (1981-2020) was a writer and senior journalist from Balochistan. He had a degree in Economics, International Relations and English Literature from Karachi University. He had the experience of working with Pakistani newspapers Daily Times and The News International. Sajid Hussain was also the founding editor of this online magazine.
