ساجد حسین ءِ نبشتانک تاج بلوچ ءَ چہ انگریزی ءَ رجانک کتگ۔
لہتے اشی ءَ پہ بلوچ جنزءَ دنیا ءِ دیما چہ مستریں سفارتی کامیاباں یکے گُشیت۔ لہتے اشی ءَ گوں اِسپیت پوستیں سیاستداناں بلوچ سروکے ءِ دگہ اَکس کَشّی دیوانے لیکیت۔
اکسانی تہا حمل حیدر بلوچ کہ دَرملکاں بی این ایم ءِ جہگیر انت، رُمبے یورپی پالیمنٹ ءِ باسکاں اَنگِر کتہ ءُ انچو گُمان بیت کہ واجہ بلوچ ہرچی کہ گُشگا اِنت، آ کُل پہ دلگوش گوشدارگا اَنت۔
13ءُ 14 اَپریلءَ، بی این ایم ءِ لیڈرءَ ماں فرانس ءِ شہر سٹراسبورگءَ، یوروپی یونینءِ پارلیمنٹءِ سالینی دیوانے ءَ بہر زُرت، ءُ ہودا آئی ءَ را بلوچستانءَ انسانی ہَک ءُ سایسی جاورانی سرا ہبر کنگ ءِ موہ دیگ بوت۔
رَندا، بی این ایم ءَ وتی بیانے ءِ تہا گشت کہ یورپی پالیمانی باسکاں زُبان کُتہ کہ دیم ءِ دیوانءَ آ بلوچستانءِ سرا یک کَراردادے پیش کننت۔
”ہئو، ہما اِنت کہ من اے ملکاناں، چہ نومبر 2012ءَ، اے منی پارٹی ءِ تنے وہدی مستریں سفارتی کامیابی اِنت،“ حمل حیدرءَ گوں بلوچستان ٹائمزءَ گشت۔
آئی ءَ گشت کہ اے رنگیں اہمیں ادارہےءَ رَسَگ ءِ واستا آ ءُ آئی ءِ سنگت بازیں سالاں تچ ءُ تاگ ءَ بوتگ انت۔
”اے رنگیں کار شپوئی شپ نہ بنت، ما سَرسَر جَنَگا بوتگیں۔ برے برے تو سَک بے وَس بئے۔ مئے مہلونک جَنگ بوگا اِنت، کُشگ بوگا اِنت، آہانی سرا بَمب گوارگ بوگا اِنت، ٹارچر بوگا اَنت، ءُ من چہ ہما مردماں یکے آں کہ اے درہیں چیزانی سرا توارے چست کنگ ءِ زمہ دار اَنت۔ بلے برے برے تو جیڑئے کہ کَس منی گپ ءَ گوشدارگا نہ اِنت۔ بلے اگاں تو کارکنان بہ کنئے، بے ہچ نہ بئے“۔
پاکستانءِ فوج چہ 2005 ءَ بلوچستان ءَ آجوئی جنزے ءَ را پہ بے رَحمی لپاشگ ءُ ہلاس کنگ ءِ جہد ءَ اِنت۔ سَدانی ہسابءَ سیاسی کاردار چست کنگ، ٹارچر کنگ ءُ کُشگ بوتہ۔ سَداں مردم انگہ چیریں جیلانی تہا بیگواہ اِنت، کسےءَ چندے سال اِنت ءُ کسے ءَ دہ سال ءَ بُرز اِنت۔ مزنیں دَمب درَتکگ کہ آہانی تہہ ءِ لاش پجہ آرگ نہ بنت۔ سَداں لاش بلوچستان ءِ کوہاں چگل دیگ بوتہ کہ آہانی پَشک ءِ کیسگ ءَ چِٹُّکے مان کہ آئی ءِ سرا مردم ءِ نام نبشتہ اِنت، ءُ پہ گاریں مردمانی وارثاں اے فوج ءِ نیکی یے کہ وتی گاریں مردم ءَ پجہ بیارَنت ءُ پہ آئی ءِ شوہازءَ وتا جنجال مکننت۔
ہمے جیڑہاں دنیا ءَ را سرپد کنگ ءُ چہ دنیا ءِ نیمگا پاکستانءِ فوجی اسٹیبلشمنٹ ءَ را زورے دیگ ءِ واستا حمل حیدر ءِ پارٹی ءَ آ 2012 ءَ لندنءَ دیم دات۔
”من نہ گُشاں کہ گوں یورپی پارلیمنٹءِ باسکاں اے دیوان مئے درہیں جیڑہاںیٔ گیشینیت، بلے اے پہ کارانی دیما برگا الّم ءَ یَک اہمیں گامگیجے،“ حملءَ گُشت۔ ”اے مردم سنجیدہ اتنت، آہاں منا گشت کہ ما بلوچستان ءِ بابت ءَ سر سری اِشکتہ، بلے مارا پکائیں ہبرے سر نہ بوتگ۔ دومی روچ ءِ مجلسءَ، اَلبَرٹ سیریو ءَ کہ یوروپی یونینءِ پارلیمنٹءِ باسکے بلوچستانءِ سرا پہ دل ءُ سِتک گپ جت۔“
آئیءَ گشت کہ آ دیوانءَ بہر زورگءِ واستا پارلیمنٹءِ باسک، فُلویو مارتَسّیلوءَ لوٹائینتہ، کہ آئی ءِ سنگتے ءِ سنگت انت۔ حملءَ گوں پارلیمنٹ ءِ 40 یا 50 باسک ءَ گند ءُ نند کت، ءُ گوں یَک وائس پریزیڈنٹےءَ ہم، کہ پاکستانءَ اقلیتانی ہَکّانی سرا کارانی ذمہ واری ہمائی ءَ گون انت۔ ”آہاں منا گُشت، ءُ سنجیدہ اتنت، کہ پارلیمنٹ ءِ دیمی دیوان ءَ بلوچستانءِ سرا کَراردادے پیش کنگ بیت۔“
یورپی پارلیمان ءِ دیوانءَ نندگ ءُ گوں پارلیمانی باسکاں بلوچستان ءِ جیڑہانی سرا ہال اہوالءَ ابید، آئیءَ را سُبارگ ءُ شام ءِ مجلساں ہم داوت دیگ بوت ءُ بلوچستانءُ پاکستانءِ جاورانی سرا گوں ہورتی ءَ جُست ءُ پُرس کنگ بوت۔ آئی ءَ گوں وائس پریزیڈنٹ، انتونیو تاجانیءَ دو پہ دوءَ دیوانے ہم کت۔
”اے مردم پاکستان چین باپاری دَرءُ اسلامی انتہا پسندیءِ دیما روگ ءِ سرا سک دلتپرکہ اتنت“۔
”گُڑا، نوں، چدءُ رَند؟“، من جُست کت۔
”اشاں منا، اِدا لندنءَ، جونءِ نیام ءَ، یَک شامے ءِ سرا پہ مجلسے ءَ لوٹتہ، وتی بزنس کارڈ اِش ہم داتگ اَنت ءُ ای میلءِ سرا مئے ہبرءُ ہال ہم ہست اِنت۔ اے تہنا بنداتے۔ مئے پارٹی اے کاراں دیما بَران کنت۔“
پہ آجوئیں مُلکے ءَ بلوچ ءِ جہد ءِ تہا میاں استمانی ڈپلومیسی ءِ نہ بوگ مزنیں نزوری یے بوتہ۔ گوں یورپی پارلیمنٹ ءِ باسکاں حمل ءِ اے گند ءُ نند الّم ءَ یَک مزنیں سوبمندی یے۔ بلے آ راست گُشیت کہ اے تہنا بنداتے۔ اگاں چیز دیما رَوان مکننت، تہ اے ہم بلوچ سروکے ءِ گوں لہتیں اِسپیت پوستیں سیاستداناں دگہ عکس کشّی دیوانے بیت۔
Taj Baloch is a poet and linguist. He published the first anthology of his poetry in 2016 in both Roman and Arabic scripts. Baloch is the Coordinator of Human Rights Council of Balochistan.
He can be reached at @TajBloch
من اشیا حراب نہ گشاں بلے چو زانگ بیت کہ وتی ارانی توسیپ بوگائیں چیا کہ اگن چارگ بہ بیت اے ہوں چارگ بیت کہ اشیا میڈیئٹ گون ہچ ملک وتی مفادا پہ انشار بہرو بانگیں راجی ءِ پہ یک مردم ءِ یاکہ یک پارٹی لیڈر ءِ واستہ دنیا گوں وت زہر نہ کنت
بے یک جاگھی ءَ اے بے سوت انت سرکن ءُ پرکن ءُ ہپ کن ءُ ہچ
چشین جهدان باز ستا کرز انت . بلئ منی هیال ءَ جهد ببیت که گون کردانی جهد کنوکان وتا را نریکتر بکنین و چه آهانی وَس و تجربه ءَ بهر بزورین . آهان و کردانی جهد نه یک گامئ که بلکین دهانی گام دیما انت .
مدام نیکین واهگانی بیرکدار باتیت !
سبز و آجو بات بلوچستان !