لانی سیلینگرءِ اے نبشتانک کلچر ٹرپ ءَ انگریزی ءَ چاپ بوتگ۔ تاج بلوچ ءَ پہ بلوچستان ٹائمز ءِ وانوکاں بلوچی ءَ ترّینتہ۔
زبانانی ارتقاء چو زندمانی ارتقاءءِ پیما اِنت کہ پہ اہوتی، نسل پہ نسل، دیما روان کنت، ءُ چشیں ہچ چیدگے نیست کہ تو بُگشئے ادا یک زبانے چہ دومی زبان ءَ جوڑ بوت۔ پمیشا چو گُشگ نہ بیت کہ یک زبانے چہ دومی ءَ حق ءُ دل ءَ کوَہن تِر اِنت، اے درست ہمینچو کوَہن اَنت، ہمینچو کہ انسانیت ءِ جند۔
بلے پدا ہم جہل ءِ اے زبانانی باروا گوَشنت کہ اے کمے خاص انت، پہ وتی کوْہنیءَ، ءُ ہمے چیز اشان ءَ چہ اندگہ کُلاں جتا کنت۔
عبرانی
عبرانی ءِ مثال اجب انت۔ اے یک برے چارسد عیسویءَ چہ عام استعمالءَ گار بوتہ، بلے دنیاءِ درہیں یہودیانی مذہبی عبادت ءُ مذہبی رسمانی زبان ءِ بستار ءَ زندگ بوتگ۔ پدا نوزدہمی ءُ بیستُمی کَرن ءَ گوں زیونِزَم ءِ سر چست کنگ ءَ عبرانی زبان ءِ دو بر زندگ کنگ ءِ عمل ہم بندات بوت دانکہ اسرائیل ءِ سرکاری زبان جوڑ بوت۔ نوکیں عبرانی چہ بائیبل ءِ کوہنیں عبرانی ءَ سک باز جتا اِنت بلے عبرانی ءِ ہبر کنوک کوہنیں عہدنامگ (یہودیانی مذہبی کتاب) ءِ تہا نبشتگیں درہیں گپءُ نبشتہاں شَری ءِ سرا سرپد بنت ءُ زاننت کہ بائیبل ءِ تہا چے نبشتہ اِنت۔ چوں کہ نوکیں عبرانی ءِ ہبر کنوکاں یک وہدے یِدِّش زبانءَ ہبر کتہ، پمیشا نوکیں عبرانی ءِ سرا یہودیانی اے زبان ءِ اثر سک باز اِنت۔
تامل
تامل، کہ اشیءَ ہپت سد ءُ ہشتاد لَکّ مردم ہبر کنت ءُ سری لنکا ءُ سنگاپور ءَ سرکاری زبانے ءِ بستار ءِ واہند اِنت، یکیں اَہدی زبان اِنت کہ نوکیں جہان ءَ پَشت کپتہ۔ اے چہ زبانانی دراوڑی خاںدان ءَ اِنت۔ دراوڑی خاںدان ءِ تہا باز زبان اَنت کہ زِرباریءُ رودراَتکی ہندوستان ءَ کارمرز بنت، ءُ تامل، (ماں ہندوستان) ءَ تامل ناڈو ریاست ءِ ہم سرکاری زبان اِنت۔ پولکاراں سے سَد سال پیش چہ عیسی ءَ تامل زبان ءِ نبشتہ دز کپتگ انت ءُ اے زبان ءَ ہما اِنت کہ یکوئی زندگ اِنت۔ تامل چو ایدگہ ہندوستانی کدیمیں زبان سنسکرت ءِ رنگ ءَ نہ اِنت کہ شش سد قبل مسیح ءَ چہ گپ ءُ رپ ءَ گار بوتءُ تہنا مذہبی رسماں پشت کپت۔ تامل زبان یکوئی دیما روان بوتہ ءُ مرچی دنیا ءِ بیستُمی مستریں زبان اِنت۔
لیتھوانی
یورُپی زُبان گیشتر زبانانی انڈویوروپی خاندان ئیگ اَنت، بلے کساس سے ہزارءُ پنچ سَد سال پیش چہ عیسی ءَ اے زباناں سِدَگ بندات کت ءُ جرمن، اٹالیَنءُ انگلش ءِ پیمیں بازیں زباناں بدل بوان بوت انت کہ اشانی تہا ہما درہیں بنیادی مشترکیں چیز گار بوان بوت اَنت کہ یک وہدے انڈویورپی خاندان ءِ زبانانی تہا یک بوتگ انت۔ پدا ہم انڈویورپی زبانانی بالتِک کُٹُم ءِ زبانے ءِ تہا ہما درہیں بُنیادی چیز مان اَنت کہ زبانزانت اِشانءَ، پروٹواِنڈویوروپی زبانانی خاصیت گوَشنت۔ پروٹویوروپی زبان ءِ باروا گوَشنت کہ سے ہزارءُ پنچ سَد سالءَ پیسر اے زبانءَ ہبر کنگ بوتہ۔ باریں کجام سَوَب بوتگ اَنت، بلے لیتھوانی زبانءَ، چہ وتی اِندگہ درہیں تروزاتک ءُ ناکواتکاں گیشت، پروٹوانڈویورُپی زبان ءِ توارءُ گرامرءِ رہبند داشتگ اَنت۔ پمیشا دنیاءِ چہ درستاں کوہن تریں زبانانی تہا شمار بیت۔
فارسی
اگں شما فارسی زبانءِ نام نہ اِشکتہ، اے زبان ءَ دگہ بازیں ملک ءَ ابید ایران، افغانستان، تاجکستانءَ ہبر کنگ بیت۔ شما بلکیں پرشیَن اشکتہ ءُ بگندئے گوں اشی ءِ اشکنگ ءَ شمئے ہیال چہ بوتل ءَ جِن ءِ دراہگ ءِ نیمگا شُتگ۔ اصلءَ اے یکین زبان اَنت، گوں دگہ دگہ ناماں۔ فارسی، اصلءَ کوہنیں پَرشِیَن ءِ حقیں اوبادگ اِنت، ءُ کدیمیں پرشِیَن، پارس امپائرءِ زبان بوتہ۔ نوکیں فارسی ءَ کِساس ہشت سد عیسوی ءَ وتی شکل گپتہ ءُ آ چیز کہ اشیءَ را چہ اندگہ بازیں نوکیں زبانےءَ جتا کنت اش اِنت کہ اشی ءِ تہا تبدیلی سک کم بوتہ۔ فارسی ءَ ہبر کنوکے مرچی ہم نُہہ سَد عیسوی ءِ نبشتہے چست کت ءُ چہ انگریزی ءِ ہما وانوک ءِ نسبت ءَ، گوں کمتر جنجالیءَ وَنت کنت کہ مرچی شیکسپئیرءِ نبشتہ ءَ بوانیت۔
آئسلینڈک
آئِسلینڈک ہم انڈویورپی زبانے، بلے چہ جنوبی جَرمَنِک کُٹُمءَ۔ انگریزی ہم جرمنِک کُٹُم ءِ زبانے بلے روکپتی جَرمَنِک کُٹُم ءَ اِنت۔ بازیں جَرمَنِک زبان ءَ وتی تہا تبدیلی ءِ درہیں راہ پچ کتگ اَنت ءُ بازیں کوَہنیں خاصیت بَبا داتگ اَنت (شما بلکیں اے رِدءَ داں ہما (وہدا چیزے نہ اشکتہ دانکہ لاتین یا سلاوِک نہ ونتہ
بلے آئِسلینڈک سَک پہ کوَہن دوستی دیما روان بوتہ ءُ بازیں خاصیتے وتی تہا برجاہ ئِے داشتہ۔ چاردہیمی تاں بیستُمی کَرن ءِ ڈینِش حکمرانی ءَ ہم زبان ءِ سرا بازیں اثرے کت نہ کتہ ءُ دنیگہ گیشتر ہما رنگ ءَ اِنت کہ نورس درآمداں اے زبان وتی ہمرائی ءَ آؤرتگ ات گوں۔ اے زبان ءِ وانوک مرچی ہم وتی زبان ءِ ہما اہدی نبشتہاں بے جناجلےءَ ونت کننت کہ سَداں سال پیسر نبشتہ کنگ بوتگ اَنت۔
میکیدونیائی
زبانانی سلاوِک خاندان، کہ اشیءِ باسکانی تہا روسی، پولِش، چیک، کروشیائی ہم ہوار اَنت گوں، رَندتِری ءُ نوکیں خاندانے۔ اشانی، چہ ہواریں پُشتپَد، یا پروٹوسلاوِک ءَ سِدَگ ہما وہدا بندات بوت وہدے سیرل ءُ میتھوڈئیسءَ زبان اسٹینڈرڈ کت کہ رندا کوْہنیں چَرچ سلاوونِک ءِ نام ءَ زانگ بوت۔ پدا نُہُمی کَرن ءَ وہدے اے پہ سلاو آن ءَ عیسائی کنگا دیم پہ گوریچانءَ شُت اَنت تہ زُبان اِش بُرت گوں۔ اے کم ءُ گیش چہ یونان ءِ گوریچان ءَ آتکگ اَنت، تقریبا ہمے جاگہ کہ مرچاں میسیدونیا یا ریپبلک آف میسیدونیا گوَشگ بیت۔ میکیدونیائی، بہ ہمراہ ء وتی نزیکیں سیادیں زبان بلگاریءَ، گوں مرچیگیں اولڈ چَرچ سلاوونِک ءَ نزّیک تریں زبان انت۔
میکیدونیائیءُ بلگاریءِ تاریخی سیادی ءِ سرا بازیں کمنٹانی بنیادءَ، ما، چہ کلچرٹرِپ ءِ نیمگا گوشَگ لوٹیں، کہ بازیں پیچیدگیاں ابید ہم چہ دَمَگ ءَ دَر اکیڈمک تران ہمیش اَنت کہ میکیدونیائی ءُ بلگاری دو آزادیں زبان اَنت کہ وتی گالواری بُنیاد اِش ہم ہست اَنت۔
باسک
باسک زبان یک مزنیں لسانی اِسرارے۔ اسپینءُ فرانس ءِ بازیں باسک مہلونک ءَ اے زبان ءَ ہبر کتہ، بلے اے چہ رومانس زباناں، چو کہ فرانسیءُ اسپینی، چَٹ جتا اِنت ءُ تقریبا چہ جہان ءِ اندگہ درہیں زباناں ہم۔ زبانزانتاں وَس کتہ کہ اے گپءَ در بگیجَنت کہ اے زبان چہ کجامان اِنت بلے ہچ تھیوریءَ اے اسرار ءِ توجیل در نہ گیتکہ۔ یکیں چیز کہ پکا اِنت اش اِنت کہ اے زبان، اے دمگءَ چہ رومانس زبانانی آہگءَ پیسر موجود بوتہ، بزاں اے دمگءَ چہ رومنانی گوں لاطینی زبان ءَ آہگ ءَ پیسر آتکگ اَنت۔ چہ لاتینی ءَ کم کم ءَ فرانسی ءُ اسپینی زبان پیدا بوتگ اَنت۔
فِنِّش
فِنِّش زبان داں شانزدہمی کَرنءَ نبشتہ کنگ نہ بوتہ، بلے بازیں دگہ زبانانی پیما، اشیءِ تاریخ باز پُشت تِرءَ روت۔ اے چہ فِنّواَرجِک زبانانی خاندانءَ اِنت، کہ اے خاندانءِ تہا اے زبانءَ ابید اِستونیائی، ہَنگَریءُ سائیبیریاءِ کَسان کَسانیں دگہ مہلونکانی بازیں کَسانیں زُبانے ہم ہوار اِنت۔ فِنِّش زبانءِ تہا بازیں بدل زُرتیں لبز ہوار کہ چہ سَداں سال ءِ دوران ءَ چہ اندگہ خاندانانی زباناں زورگ بوتگ اَنت۔ باز وہدا وَ فِنِّشءَ اے بدل زرتیں لبز ہما اصلیں رنگءَ برجاہ داشتگ اَنت کہ آ زبانانی جنداں ہم لبزانی اے اصلیں شکل باہینتہ۔ مثالءِ ہبرءَ پہ ماتءَ لبز آئتی، کہ چہ گوتھک زبانءَ اَتکہ کہ نوں اے زبان ءَ کس ہبر نہ کنت۔ یا پہ بادشاہ ءَ لبز کُنِینگَس، کہ کوہنیں جَرمَنِک لبزے بلے ہچ جَرمَنِک زبانءَ نوں نیست اِنت۔
جورجیائی
کاکاشیاءِ دَمَگ پہ زبانزانتاں جنگجاہے۔ کاکاشیاءِ سے ئیں دمگ، آرمینیا، آذربائیجانءُ جورجیاءِ مزنیں زبان چہ زبانانی سے مختلفیں خاندان، انڈویورپی، تُرکِک ءُ کارتویلیَن ءَ پیداک اَنت۔ جورجیائی چہ درستاں مستریں کارتویلی زبان اِنت ءُ اے یکیں کارتویلی زبان اِنت کہ اَہدی لبزانکے ءِ واہند اِنت۔ اشی ءِ زیبا ءُ جتائیں حرف ہم سکیں کوہنین اَنت۔ اندازہ ہمے جنگ بیت کہ سیمی عیسوی ءَ اے حرف چہ ارامی زبان ءَ زورگ بوتگ اَنت۔ باسک زبانءِ پیما، تہنا چار کارتویلی زبان ہست کہ جورجیاءِ مینارٹی مہلونک اشانی تہا ہبر کنت، ءُ اے چاریں زبان گوں جہان ءِ ہچ دگہ زبانءَ سیادی نہ کننت۔
آئرِش گئیلی
حالانکہ آئرش گئیلی زبان، آئرلینڈ ءِ یک کسانیں مہلونکے ءِ راجی زبان اِنت، بلے اشیءِ تاریخ سک کوَہن اِنت۔ اے انڈویورپی زبانانی سیلتِک کُٹُم ءِ زبانے ءُ ہما جزیرہانی تہا موجود بوتہ کہ نوں برطانیہ ءِ تہا اَنت، ءُ آئرلینڈءَ ہم چہ جَرمَنِک زبانانی اثرءَ پیسر ہست بوتہ۔
آئیرش گئیلی ہما زبان اِنت کہ چہ اشیءَ اسکاٹِش گئیلی ءُ ماکس زبان در کپتگ اَنت، کہ برطانیہ ءِ جزیرہاں ”آئل آف مین“ ءِ تہا ءَ اے زباناں ہبر بوتہ، بلے آئرش گئیلی، اے لڑءِ تہا ہما زبان اِنت کہ روکپتی یوروپ ءِ درہیں زباناں پیسر ہمے زبان ءِ تہا آ اہد ءِ مزنیں لبزانکے نبشتہ بوتہ۔ ہما زمانگاں کہ اندگہ درہیں یوروپ وتی زباناں ہبر وَ کنگا بوتہ بلے نبشتہ لاتین ءَ کنگا بوتہ، آئرشاں ہمے فیصلہ کتہ کہ ما لاتینیءِ بدلءَ وتی جندءِ زبانءِ تہا نبشتہ کنگ لوٹیں۔
Taj Baloch is a poet and linguist. He published the first anthology of his poetry in 2016 in both Roman and Arabic scripts. Baloch is the Coordinator of Human Rights Council of Balochistan.
He can be reached at @TajBloch
sakken washen nebeshtankey. bayad gesther chaap bibee ey waden article..
Dunya a zubanani chincho khandanan total?