تاریخءِ بارہا وَ جہان گُشیت اشیءِ اولی خاصیت اِش اِنت کہ نبشتہیں صورتےءَ اِنت۔ بلے بلوچءِ اصلی تاریخ ہما اِنت کہ مئے پیریناں گُشتہ۔ شعر بنت یا کِسّہ۔ دُنیا مَنّیت شَرّ، نہ مَنّیت، مِنّت ئِے گوات اِنت۔
نوں ہمینچو دپ، ہمینچو گَپّ۔ دروگ بَر گَردنء راوی۔
مردم گُشنت کہ یک وہدے بلوچ وتی سیمسرانی واہند بوتہ۔ رندءُ لاشارءِ زمانگ بوتہ۔ بلوچستان، بلوچءِ وطن بوتہ۔
سالءُ ماہ دیرءَ گوَزَنت، دپءِ ہبر زُوت۔
یک وہدے اَنچیں اَتکہ کہ گوہر نامیں زالے چہ لاشارانی ہندءُ میتگاں لَڈّ اِتہءُ رندانی باہوٹ بوتہ۔
مردم گُشنت کہ لاشاراں اے گپ دلءَ آئورتہ۔
یک روچے لاشاریاں گوہرءِ ہِرّانی سرا اُرُش کتہ۔ اے اُرُش، رِنداں دلءَ آئورتہءُ فیصلہ کتہ کہ وتی عزتءِ جستءَ چہ لاشاریاں کننت۔
جنگءُ بِجَنگ بوتہ۔ گنداوہ دورا ویران بوتہءُ ڈاڈر جُدا۔ بلوچءِ سرڈگار شِنگِتہ۔
گُشنت کہ چاکر وہدے ڈاڈرءَ یلہ دنتءُ ستگرہءَ نندیت، تہ دو گوَرانڈ داریت۔ یکےءِ نامءَ کنت رِندءُ یکےءِ لاشار۔
ہمک روچ نندیت، رندءُ لاشارءَ جنگ دنت۔
شومیءَ یک روچے لاشار، رندءَ اَنچو جنت کہ رندءِ کانٹ ہونءُ ہونریچ بنت۔
پیریں چاکر نیامءَ دور کنت کہ رندءَ بگیشینیت۔
رندءُ لاشارءِ ٹکّر ہوریءَ چاکرءَ لَگّنت۔
دہلیءِ تہتءِ گِروک، بلوچستانءِ ہندءُ سیمسرانی گیشینوک، شعرءُ کسّہانی تہا بلوچءِ ہاکم، رندءُ لاشارءِ کانٹانی آماچ بیتءُ جہانءَ یلہ دنت۔
بلوچ جُنزءَ چہ دوہزارءُ دوازدہءَ بندات بوتگیں پرُشتءُ پروش یک رندے ہلاس کت۔ چہ یکے دومیءَ مافی لوٹگ بوت۔ گوں یکے دومیءَ نزّیکی گیش بُوّان بوت اَنت۔
دلءِ تہا اتحاد بوت۔ دلءِ تہا بلوچستان آزاد کنگ بوت۔ دلءِ تہا بلوچستان یک آزادءُ وشہالیں قومی ریاستے بوت۔
ءُ یک برے پدا، رندءُ لاشارءِ کسّہ بندات بوت۔
کئےءَ چے شَرّی کتہ، تاریخءِ بَہر اَنت، بلوچی تاریخءِ۔
کئےءَ چے ہرابی کتہ، تاریخءِ بہر اَنت، بلوچی تاریخءِ۔
نبشتہیں تاریخ، کہ فیس بُک اِنت، اشیءِ تہا اگاں گُناہ ہَست وَ درست گُنہگار اَنت، کَسے کَمءُ کَسے گیش۔ اگاں گُناہ نیست وَ درُست بے گُناہ اَنت، کَسے کَمءُ کَسے گیش۔
دُنیا اے گپءَ الّم ہَیران بیت کہ گوستگیں ماہءَ درہیں بلوچ یکجاگہ نِندگی اتنت، ہمکار بُوّگی اتنت۔ اے گپ نبشتہیں تاریخءَ اَتکہ۔ بلے چہ اتحادءِ گپءَ یک ماہےءَ رَند، بلوچ پدا گوَرانڈ میڑینگءَ اَنت۔ سیاستءُ ڈپلومیسیءِ جہانءَ اے سَکّیں مزنیں عیبے۔ تئی سرا باوَر کنگ گران اِنت۔
اگاں ادارہانءَ وتی یک ماہےءِ دیمترءِ ہال مالوم نہ اِنت، تہ جہان چوں اشانی گپءِ سرا یک ملکے بہ پروشیتءُ دگہ نوکیں ملکے جوڑ بکنت۔ آ مردم کہ وتی یک ماہے پیسرءِ قولءَ داشت نہ کننت، سالانی سال جہانءِ نقشہءِ سرا چہ پاکستانءَ شرتریں، سیلولریں، وشہالیں، جمہوری ملکے چوں برجاہ دارَنت۔ اے مردم چہ پاکستانءَ گَنتِریں مصیبتے ہم بوت کننت۔ بلکیں مصیبتے مہ بنت، بلے گپ اِش اِنت کہ زانَگ نہ بنت کہ شَرّ بنت یا بَد۔
ما گُشیں کہ اگاں ما چاکرءُ گوَہرامءِ زمانگءَ ہست بوتینیں، تہ ما اے وت ماں وتی جنگءِ دیما رکاوٹ بوتگ اتیں۔ ما اے گپءَ ہم کنیں کہ چاکرءُ گوَہرامءَ کمّے دور بارِتینءُ کینَگ ایر بُرتیں، تہ بلوچ راجءِ جاوَر تاں مروچیءَ سک باز گِہتِر بوتگ اَت۔ بلے ما مرچی چے کنگا ایں۔ اگاں ما مرچی ہما وت ماں وتی نفرت، کَستءُ کینگاں دیما برَگا ایں، گڑا بلوچ قومی تاریخءِ تہا بوتگیں درہیں خانہ جنگی، درہیں کوتاہیانی گُناہءِ بار، درہیں مُرتگیں بلوچانی ہون، مئے گَردِنءَ اِنت۔
تاریخءِ سپر انگہ دیما روان اِنت۔ چہ ما ہرکَس کہ مرچی وتی ردارءِ سرا پہرءُ شان کنگا اِنت، اے گپءَ الّم بزانت کہ تاریخ ہلاس نہ اِنتءُ مئے کِردارءِ فیصلہ تہنا مئے گوَستگیں کارانی سرا نہ بیت، آ درہیں کار ہم ہساب بنت کہ ما اِش انوں کنگا ایں۔
بلوچءِ انّوگیں دور ہم ہمینچو اہم اِنت کہ چاکرءِ دور بوتہ۔ اینکَس ہون کہ پہ راجی پجارءُ راجی زندءَ اے بَری رِتکہ، تاریخءِ تہا یَک شَلءَ اینکس ہون پہ اے مکسدءَ ہجبر نہ رِتکہ۔
تو، چاکرءُ گوَہرامءِ تاریخءَ بدل کت نہ کنئے، بلے بانداتءِ تاریخءَ الّم بدل کت کنئے، اگاں مرچی شَرّ بہ بئے۔
Taj Baloch is a poet and linguist. He published the first anthology of his poetry in 2016 in both Roman and Arabic scripts. Baloch is the Coordinator of Human Rights Council of Balochistan.
He can be reached at @TajBloch
