ساجد حسین ءِ اے نبشتانک تاج بلوچ ءَ چہ انگریزی ءَ ترّینتگ۔
نریندرَ مودیءَ بلوچستانءِ سرا گپے جت۔ اصلءَ مودیءَ گپے جت ءُ ہمے گپ ءِ تہا بلوچستان ءِ ذکر مان اَت۔ آئی ءَ گوَشت کہ پاکستانءَ را گلگت بلتستان، پاکستانی کشمیرءُ بلوچستانءَ وتی کُتگیں گُناہانی حساب دئیگی اِنت۔
اے گپ ءَ یک کارے کُت۔ ایشی ءَ ریٹائرڈ فوجی ءُ بیروزگاریں سویلین دَمَگزانت ءُ ڈیفنس زانتکارانی واستا ٹی وی پروگرامانی تہا وتی دانائی ءِ ذبرّگ ءِ موہ دات۔ اِش اِنت، پاشک بوت کہ بلوچستان ءَ انڈیا ءِ دَست مان اِنت۔ من وَ سی سال پیسر گوَشتہ کہ کارانی ہراب کنوک انڈیا اِنت۔
لہتیں نیک نیتّیں زانتکار وتی نیّت ءِ نیکی ءَ شرترظاہر کنگ ءِ واستا وتی توارءَ جَہل کننت ءُ گوَشنت: بلوچستان، پاکستان ءِ تہی جیڑہے ءُ انڈیا ءَ کار نیست۔ انڈیا پیسرا کشمیرءَ وتی کتگیں گناہانی حسابءَ بدنت۔
یک روچے من فَیسبُکّ ءَ وڈیویے دیست۔ نیوزپروگرام ءِ دیواندار یک پاکستانی زانتکارے ءَ کہ مں پیسرا ہجبر نہ دیستہ، رُزوا کنگا ات۔ ”ما اِدا تئی تقریرءِ گوشدارگءَ نہ نشتگیں۔ تئی فوج بلوچستانءَ ہرچ جُرمے کنگا اِنت، ترا آ گناہانی جواب دئیگی اِنت،“ آئیءَ وتی دپ پَچ لگوشتگ ات ءُ آئی ءِ گالوارءِ تہا پہ بلوچاں گریوینگی دردے مان اَت۔
ریشّویں مرد ءَ وتی گپ ءَ سربِرءَ کنگءِ جہد ءَ وتی آواز چہ دیواندار ءِ آواز بُرز تر کُت ءُ گوشداروکان ءَ باور کنائینگ لوٹ اِت کہ بلوچستان دنیا ءِ درستاں دیما شتگین ءُ پُرایمن تِریں جاگہ اِنت، بلے کَسءَ بیچارگ ءِ گپ مان نیاؤرت۔
دومی روچ ءَ دگہ وڈیویے دیست۔ ہمے زانتکار ہما نیوز پروگرام ءَ پدا نِشتگ اَت۔ ”شُما بیگُناہیں بلوچاں کُشگءَ اِت ءُ لاشاں جتک ءُ جون کنگءُ دور دئیگا اِت۔ نالَت اِنت ترا، نالَت اِنت تئی ملکءَ،“ اے بری دیواندار گیشتر گروناک ات۔
من حیران اتاں کہ اے بے عِبرتیں زانتکار کہ من نام ءِ نزاناں، چیا اے نیوز پروگرام ءِ آہگ ءَ بَند نہ کنت۔ پرچہ آ بار بار اینچو بے عزّتی ءِ سگّگ ءَ لاچار اِنت۔ من دگہ گپےءَ ہم حیران اتاں کہ اے شررنگیں ورنائیں زال، دیواندار، چہ مودی ءِ گپ ءَ پیسر بلوچستانءِ ہالاں سَہی نہ بوتہ؟
پہ من گرانتریں ساہت ہما وہدا اَتک کہ منی سیاسی ءُ ہالکاری سنگتاں منا زور پِردات کہ من چیا اے اہمیں بُنگپ ءِ سرا ہچ گوَشگ ءَ نیاں، وہدے کہ من بلوچستان ءِ مردماں ءُ مدام بلوچستان ءِ جیڑہانی سرا نبشتہ کناں۔ مسئلہ ایش اِنت کہ من نبشتہ کت کناں کہ بلوچستانءَ چے بُوئگا اِنت، بلے من چشیں دانائیں سوج ءِ دئیگ نزاناں کہ پاکستان ءُ انڈیا چے بکننت ءُ چے مکننت۔ بگندئے من زاناں کہ چے بکننت، بلے من زاناں منی گپ ءَ نہ گِرَنت۔
من زاناں کہ بلوچستانءَ فوج مردماں چِست کنگا اِنت۔ اے برتگیں مردمانی تہا بازینے منی سیاد ءُ لہتے منی سنگت ہوار۔ لہتیں نیک بحت چہ رؤکیں فوجی ٹرَکاں زندگ ءَ دور دئیگ بوتگ اَنت۔ اِندگرانی لاش دَست کپتگ اَنت گوں کیسگ ءَ کسانیں نوٹے ءَ کہ آئی ءِ سرا آہانی نام نبشتہ بوتہ، چیا کہ لاشءِ جند دگہ ہچ رنگءَ پجّاہ آرگءِ وڑا نہ بوتگ انت۔ مئے دلیریں فوجی مُلک ءِ دشمن ءِ کُشگ ءَ چَک ءُ پد نہ بنت، بلے آہاں اے سنگینی ہست کہ دشمن ءِ لاش ہم اسلامی رسم ءُ رواجانی حسابءَ جنازہ دئیگءُ کَل کنگ کَرزیت۔
انڈیا ءِ فوجیانی تہا اے سنگینی نیست۔ دشمنءِ لاش ءَ دریائے جہلم ءَ دور دئیَنت کہ کس اِش مہ گندیت، کَس اِش اسلامی رسمانی حساب ءَ قبرءُ کَسارَت مکنت۔ من وِشال بھارَدواج ءِ فلم حیدر گوں وتی لوگ ءِ لہتے مردماں چارِت۔ من دیست فلم کہ دیما روان بوت منی ناکو ءِ جنوزام ءِ چمانی اَرس لہڑ گران بوتنت۔ فلم ءِ تہا گاریں مردمانی سیاد ءُ وارِسان ءَ فوٹو دست ءَ اَنت ءُ پہ وتی مردم ءِ شوہازءَ برے جاگہے مظاہرہ کنگا اَنت۔ وکیل ءِ دپتر ءَ پانگ انت ءُ وکیل آہاں تسّلا دیگا انت کہ آ وتی زورءَ جنئگاایں۔ پدا گاریں مردم ءِ لاش اناگہہ ءَ کورلمب ءَ دَست کپیت۔ من، ءُ منی تری ءُ آئی ءِ چک، کہ فلمءَ چارگااتیں، انچو بوتگیں۔ مارا ہم منی ناکو ءِ فوٹو دست ءَ بوتہ، برے کراچی ءُ برے اسلام آباد ءِ پریس کلبانی دیما۔ ما ہم وکیلانی دپتراں وانڈا بوتگیں۔ مارا ہم وکیلاں گوَشتگ کہ ما وتی وسءَ کنگاایں۔ پدا ہال اتک کہ ناکو ءِ لاش دَست کپتہ۔
ا”ے فلم پورا بلوچستانءِ سرا اِنت، گِندئے؟“۔ فلم کہ ہلاس بوتءُ اسکرین سرا ءِ کارستانی نام زاہر بوت انت، ناکو ءِ جنوزام ءَ گوَشت۔
آ رَد اَت۔ انڈیا ءِ فوجیاں لاش کورءَ دور داتگ اَت کہ گِندگ مبیت۔ مئے پاکستانی سپاہیاں لاش بلوچستان ءِ کوہاں دور داتگ اَت، بلے تربت شہرءِ نزّیکءَ، کہ لاش گندگ بہ بیت ءُ قبرءُ کَسارَت کنگ بہ بیت۔
بلوچستان ءُ کشمیرءِ جاوارانی تہا دگہ فرقے ہست۔ صباء دشتیاری کُشَگ بیتءُ وِشال بھارَدواج زندگ اِنت؟ حامد میر تیربار کنگ بیت ءُ ارون دھتی رائے نہ بیت؟
منی حیالءَ مودی ءِ سیکورٹی سلاہکاراں وہدے پاکستان ءِ خلاف ءَ بلوچستان کارڈ ءِ کاربندگ ءِ رازی کنگ ءِ واستا آئی ءَ را بلوچانی جَتک ءُ جونیں لاشانی فوٹو پیشداشتگ اَنت، مودی ءَ ترمپے اَرس ہم نہ ریتکہ۔
سیاستدان نہ گریوَنت۔ مارِشت آہانی فیصلہانی سرا اثر نہ کنننت ءُ مودی وَ مرد ء آہن ءِ نام ءَ زانگ بیت۔ مودی نہ بلوچستان ءِ جیڑہ ءِ سرا دل ءَ نزور کنت نہ کشمیرءِ۔ نازرک دلیں سیاستدان رَئو نہ کنت ءُ مودی تاں مزنیں مدّتے ءَ جلّگ لوٹیت، تاں ہما وہدا کہ ہندوستان ءَ را دنیا ءَ اقتصادی ءُ فوجی طاقتے جوڑ بہ کنت۔
بلے پاکستانءَ را چون اِنت؟ براہمدگ بگٹی ءِ پوسٹرانی سوچگ ءَ وتی وہدا زوال کنگا اِنت۔ حیربیارمری ءُ کریمہ بلوچ ءِ خلاف ءَ غداری ءِ کیس کنگا اِنت، پورا غداری ءِ پیسری کیس بَس نہ اَنت۔
من نزاناں کہ بلوچستان ءِ بے ایمنی ءَ انڈیا ءِ دَست مان اِنت یا نا۔ بلے من زاناں کہ بگٹی، مَریءُ کریمہ ءَ اے حبر وَش بیت کہ پاکستان اشاں وتی غدار بگشیت۔ چریشی ءَ وتی منّوکانی دیما اشانی ایمانداری مہکم تِر بیت۔
https://soundcloud.com/user-871791679/ahb6bfizwxna
ا ”اللہ نزرءِ خلافءَ چیا کیس ئِے نہ کتگ گوں؟ آ وَ ملکءَ نشتہ ءُ گوں پاکستانی فوجءَ جنگ ءَ اِنت؟“ بلوچ سِلہ بندیں رہشون ءِ شیدائی یےءَ منا جُست کت۔ آ ہمے گپ ءَ پریشان اَت کہ چریشیءَ بلکیں ہمے ظاہر بیت کہ پاکستان ءِ دل پہ اللہ نزرءَ نَرم اِنت ءُ اے چیز اللہ نزرءَ چہ اِندگراں کَستِریں رہشونے جوڑ کنت۔
ت ”تئی حیالءَ انڈیا ءَ دل کُتہ یا انچو بس گپے جتگ ئِے؟“۔ سنیئریں آزادی پسندیں رہبرےءَ کہ ٹی وی پروگرامانی تہا مودی ءِ منّت ئے گپتگ ات، منا جُست کت۔ آ منی ایکسپرٹ اوپینئین ءَ زانگ لوٹگا اَت۔
چ ”چوناہا من اے چیزانی سرا زیادہ نزاناں۔ بلے پاکستان ءَ، کشمیرءِ سرا انڈیا ءَ دار ماں کتہ۔ نوں گشئے مودی دار ءِ دیم ءَ ترّینگ لوٹیت۔ منی حیال ءَ،“ من گوَشت۔
آ کمّے دگہ پئیم بوت۔ کمے بیوانکی ءَ رَند آئی ءِ آواز پدا پُر اُمّیت بوت۔ (ما فونءَ گپءَ اتیں)۔
و”وہد بدل بوان اِنت۔ دنیا نوں سرپد انت کہ پاکستان وتی شیطانیاں یلہ نہ دنت۔ پاکستان دنیاءِ ہر جاگہ ءَ دہشتگردی ایکسپورٹ کنگا اِنت۔ دنیا بائد اِنت بلوچانءَ آزادیں بلوچستان ءِ جنزءَ کُمک بکنت کہ آزادیں بلوچستان، پاکستان، ایرانءُ افغانستانءِ نیامءَ یک بفر اسٹیٹے ءِ کارءَ کنت۔ ءُ وہد ہمیش اِنت کہ ما دنیاءَ حال بدئیں کہ بلوچستان، پاکستانءِ داخلی مسئلہ نہ اِنت۔ اے یک وہدے آزادیں ملکے بوتہ۔۔۔۔“۔ آ لبَجان ءُ روان اَت۔
من آئیءِ ایدگہ تجزیہ ءَ دلجم نہ اتاں۔ بلے من اے زاناں بلوچستان پاکستانءِ تہی جیڑہے نہ اِنت۔ ملک سراج اکبر چیا چہ پاکستان ءَ تَتک ءُ امریکہءَ پناہگیر بوت وہدے کہ بشارت پیر، کہ آئیءِ کتابءِ سرا فلم حیدر جوڑ بوتہ، امریکہءَ بے پناہ ءَ نِشتہ؟
Taj Baloch is a poet and linguist. He published the first anthology of his poetry in 2016 in both Roman and Arabic scripts. Baloch is the Coordinator of Human Rights Council of Balochistan.
He can be reached at @TajBloch
