دور
سَک دور چهرگێن
دئورانی وابان
سَکَّ بنت
اهدئے ودارانی چَم
بارێن کدی دۆرانی باری مَٹَّ بنت؟
اے زندگی،
اے یَکّ و تهناێن سپر
هر دو سئواسان سِستگێن
گُکّ بَستگێن پادینکێا
گرّان اِنت جاهے رۆچێا
جاهے شپا بڈّا کُتگ۔۔۔
جاهے شُدا واپێنتگ و شَر ٹَپِّتگ
تان اندگه سهبئے سرا
چمانی سیاهی آرگی سُرمگ کتگ
لنٹانی تَل بچکندگان گۆن تْرَکِّتگ
هۆنانی پَنّے شێپتگی۔۔۔
کئیدانی جاہ مرواردێن زُلپان سرا پِر شانتگ‌اَنت
رنگے انارکان مَٹِّتگ
اَنچۆ دلئے زنگئے وڑا
پاسَگ نبنت
سَهتانی درۆشم مَٹّ بنت بارێن کدی؟
بارێن کدی اے دوریان سر بیت اهدئے زندگی
وازمندگێن ماهئے سرا
لۆٹے دلئے بێهاجتێن
تهناێن بژنے بێوَسێن
هر شپ یک چَمّے نزَّ کنت
گۆن لنکُکا استال و ماها دست جنت
هر شپ همے رنگا هزاراں واهگ اَنت
لێٹنت و چَمّان مُچ کننت
بارێن کدی واهانی هستی مَٹّ بنت؟
واهگ مبنت
دزرس ببنت۔۔۔
هالے بیاتکێن رۆچێا
گواتا پتاتگ زندگی یکجاہ کتگ
اَنچۆ زمینچَنڈا گشئے
کبرانی مَهرم آرتگ و نامَهرمان لێس داتگ‌اَنت
اَنچش هئوار انت زندگی جاهے دِگر
بارێن کدی دۆران چه دورێن دئور بنت؟
https://soundcloud.com/user-871791679/mehlab-poem
Mehlab Naseer has done her Masters in English Literature from the University of Balochistan and has been teaching English Literature and Functional English at the Government Girls' Degree College Turbat and the University of Turbat since 2010.
Mehlab composes Balochi poems, writes short stories and is also a regular translator.
