ہئو، من مُرتگاں

دور میتگانی نیامءِ ہورکیں زندگانیءِ
ہمک شَمیں، کدام بستگیں دریگءِ تاکءَ لنککانی تند بستگیں ودارءِ ناکُنانی نیم ہنی ئیں سپر
در آہگا اِنت اَچ منا

تاں دیرءَ دوشی درد کیکّلی کُتگ
نہ وپتگیں
دلءَ دوبر در آتکگیں ہیالءَ واب نئیشتگءُ من جیڑاِتگ
نہ جیڑاں گیش میتگءَ
نہ مردماں
نہ بزّگاں
نہ بے وتاں
نہ بےوساں
نہ تہزدیں شپانی نارَگاں
نہ روچ بریتکگیں سراں
نہ ارس جَتکیں ٹیلگاں
نہ سُتکگیں مچاچءُ زُلپی ٹالءُ سونیاں
نہ دِرتگیں گشانُکاں
نہ سِستگیں سواسکاں
نہ ہون شنزیں پادُکاں
نہ درد مَٹّیں کندگاں
نہ زارءُ موتکءُ گریوگاں
نہ ٹنگ ٹنگیں سینگاں
نہ ہڈّ ءُ ہوڑیں مُردگاں
نہ کوپگانی مانشاں
نہ بژّناکیں ترانگاں