حُداءِ میتگ

1

دُور
سک دُور چہرگیں
دؤرانی واباں
سک بنت
اہدءِ ودارانی چم
باریں کدی دورانی باری مٹ بنت؟

اے زندگی!
اے یک ءُ تہنائیں سپر
ہر دو سواساں سستگیں
گُک بستگیں پادینکےءَ
گرّان اِنت جاہے روچےءَ
جاہے شپءَ بڈّءَ کُتگ۔۔۔
جاہے شُدءَ واپینتگ ءُ شر ٹپ اِتگ
تاں اندگہ سہب ءِ سرا
چمانی سیاہی آرگے سُرمگ کتگ
لنٹانی تل بچکندگاں گوں ترْک اتگ
ہونانی پنے شیپتگے۔۔۔
کیدانی جاہ مرواردیں زُلپاں سرءَ پِر شانتگ انت
رنگے انارکاں مٹ اتگ
اَنچو دلءِ زنگءِ وڑا
پاسگ نہ بنت
سہتانی دروشم مٹ بنت باریں کدی؟
باریں کدی اے دُوریاں سر بیت اہدءِ زندگی
وازمندگیں ماہءِ سرا
لوٹے دلءِ  بے ہاجتیں
تہنائیں بژنے بے وسیں
ہر شپ یک چمے نز کنت
گوں لنکُکءَ استالءُ ماہءَ دست جنت
ہر شپ ہمے رنگءَ ہزاراں واہگ انت
لیٹنت ءُ چماں مُچ کننت
باریں کدی واہانی استی مٹ بنت؟
واہگ مہ بنت
دزرس بہ بنت۔۔۔
ہالے بیتکیں روچےءَ
گواتءَ پتاتگ زندگی یکجاہ کتگ
اَنچو زمین چَنڈءَ گشئے
کبرانی مَہرم آرتگءُ نا مہرماں لینس داتگ انت
اَنچش ہوار انت زندگی جاہے دِگر
باریں کدی دوراں چہ دُوریں دؤر بنت؟