Sameer Mehrab

امریکی پئوج، افغانستان و بلۆچ

اَمریکی سَدر جو باییڈنا جار جَتگ که ما وتی پئوجا چَه افغانِستانا کَشّێں. کَشّگئے رۆچی هم گیشّێنتگ، 11 ستمبر 2021.

11 ستمبر 2001 آ القاعدهئے مزهبی بنیادپرستاں، چار امریکی جهاز هاییجێک کت و امریهئے تجارتی مرکز (ٹوِن ٹاوَرز) و پئوجی مرکز (پێنٹاگان) ئے سَرا دئور دات. چه پَرل هاربَرا رَند، اے ائولی رندَ بیت که یک پئوجی تنزیمے، امریکهئے تها رئوت و امریکهئے سرا اُرُشَ کنت. چه اے جهازانی کپگا یکێں جاگها سئے هزار مردمَ مریت و دگه بازێنے ٹَپّیَ بیت. بوتَ کنت که باییڈن، امریکی تاریخئے اے دَرا هما رۆچا بند کنگَ لۆٹیت، هما رۆچا که بِندات بوتگ. بوتَ کنت سَدرَ نلۆٹیت که امریکی، وتی تاریخئے اے سیاهێں رۆچا بێهال بکننت، چیا که زندگێں کئوم وتی تاریخا په بانداتئے رُژنا کنگا کارَ بندنت. هر جێڑه و جنجالے که گیپتِش، چارَنت که پێسَرا چشێں کارے بوتگ یا نه؟ اگن بوتگ، وه چارَنت که پێسرا ما چۆن کتگ و نتیجه چے بوتگ؟ پمێشکا گوَشنت که تاریخ تهنا بوتگێں سرگوَستانی دَپتَرے نه‌اِنت، په بانداتا رُژنایی و رهدَربرَیئے چێدگے.

چه ناین اِلێوَنا رَند امریکی هکومت و جاسوسی اداره اے آسَرا سرَ بنت که اے ارُشئے شئور و سَلاه و تئیاری افغانستانا بوتگ. القاعدهئے سرۆک، اُسامه بِن لادن هم افغانستانا جهمِنندَ بیت و گۆں طالبانانی سرۆک، مُلّا عُمرا نزّیکَ بیت. امریکه گۆں طالبانانَ گوشیت که شُما اُسامه و آییئے همراهاں چه وتی مُلکا کَشّێت و مئے دَستا دئیێت. مُلّا عُمرَ گوشیت که اے افغانانی دۆدئے هِلاپێں کارے که وتی مئیار و مهماناں دُژمنانی دَستا بِدَنت.

امریکه، گۆن میان‌اُستمانی واک و یو اینئے رَزامندیا افغان طالبان و القاعدهئے سرا ارُشَ کنت. شمالی اِتّهادئے کُمَکّا، دو ماهئے تها اِشانی سرکارا هلاسَ کنت.

چه ناین الێوَنا پێسر پاکستان، طالبان سرکارئے مَستِرێں پُشت و مستِرێں کُمَکّارَ بیت. بله آ وهدئے امریکی سَدر بُش که پاکستانئے پئوجی هاکِم مشَرّفا ٹیلپونَ کنت و گوشیت که یا وه تئو مئے همراه ائے، یا مئے دژمن ائے. اگن مئے دژمن ائے وه ما تئیی مُلکا سِنگئے دئورا بَرێن و سرَ کنێں، تئیی مُلک هما هالا سرَ بیت که جهان، هزاراں سالا پێسر بوتگ.

مشرّف و پاکستانئے اے دگه پئوجی جرنَل اے گپّا شَرّیا زاننت که پاکستانارا امریکهئے پئوجی تاکتئے دێمئے دارَگئے زۆر و گُنجایش نێست. گڑا پئیسلهَ کننت که دێما امریکهئے همراهَ بێں. میان‌اُستمانی لشکر و امریکی پئوج که اَفغانستانا کئیت و نندیت، گۆں اِشاں انچُشَ کنێں که علیا گۆں کاپِراں نکتگ.

مرچی که امریکه گۆں هما طالباناں نشتگ و گپّ و سَلاه کنگا اِنت که چه 2002 آ چه افغانستانا په لَٹّی کَشِّتنت. اِشانی سَرا همینکس بَمبی گوارێنت که هئورا رَند اینچُک مۆرَ نَرِچیت. اے هم پاکستانئے جرنَلانی کَمال اِنت که امریکهی مجبور کت. وتی چێر اَندَری کُمَک و طالبانانی گوریلا جنگئے سَرا، په امریکها اے جنگئے کَٹّگی نامُمکن کُت.

گوَستگێں بیست سالا اَسل جنگ پاکستانی جرنَل و امریکهئے نیاما بوتگ. اَسلا اے جنگ طالبانان نَکَٹِّتگ، جی ایچ کیوا نشتگێں پاکستانی جرنَلاں کَٹِّتگ.

وهدے ناین الیوَنئے هال جهانئے هالتاکاں شِنگ بوت ته بلۆچ سیاسی تجزیه‌کار و سیاستئے نۆدربَراں گوَشت که نوں پاکستانئے رۆچ کَمُّک اَنت. امریکه، پاکستانارا طالبانانی همراهداریئے سِزایا دنت و ٹُکُّر ٹُکُّریَ کنت. بلۆچ و اے دگه اێردستێں کئوم که پاکستانئے دستئے چێرا اَنت، اے درُستاں آزاتَ کنت و مُلکِشَ دنت.

پدا، اے همے وهد اِنت که پاکستان، یَک نێمَگے وتی نیوکلیَر سِلاهانی سئوبا جهانئے دێما بےوار اِنت و تهنا اِنت، دومی نێمَگا مشرّفئے گئیرجمهوری هکومت هم آتکگ و چه اِشیا هم، جهانئے دێما مَلامَت و بێوار اِنت. اے هالتاں پاکستان، میان‌اُستمانی سورتا تهنا اَت.

بله منی هئیالا ما بلۆچاں، پاکستانی جرنَلانی وتی جانئے کَشّگئے هُنَر (سَروایوَل اِنسٹِنکٹ) و چالاکی شَرّ نپَهمِتگ. اے نه‌اِنت که پاکستانا وتا چه اے گَزایا رَکّێنت، انگت چه امریکی پئوجا 21 بلیَن ڈالرئے پئوجی و سِوَل کُمَکّی هم گپت، وتا نان نئیٹۆ اِتّهادیئے اِسٹێٹَس هم دئیاێنت و وتی جندی چه میان‌اُستمانی تهناییا در کُرت. وتا مگرِبی جهانئے وار آن ٹِرَرئے یک اهمێں اتّهادیے جۆڑی کرت. پێسرا میان‌اُستمانی سورتا تهنا اَت، نوں اے جنگئے تها، په ویسٹرن دُنیایا یَک سکّێں اهمێں مُلکے جۆڑ بوت. کابُلا نشتگێں میان‌اُستمانی لشکر، طالبانانی جاسوسیا بگر تانکه وتی ورد و وراک و پئوجی سامانانی رسَدا پاکستانئے وازمَندَگ اَت. افغانستان، زمین‌بَند  (Land locked)اِنت و هِچ نێمَگا گۆں زِرێا نَڈُکّیت. کابُلا نشتگێں پئوجئے ورد و وراکا بگِر تانکه سِلاها، سجهێں چیز چه کراچیئے پۆرٹ قاسما آیان بوتنت، که پاکستانئیگ اِنت.

پاکستانی جرنَل چه اے گپّا بێهئیال نه‌اتنت که مارا وتی پایده چارَگی اِنت. امریکه وه باندا پِرَ تَرّیت و وتی راها رئوت و ما هما جاگها سرَ بێں که افغانستانا روسئے شکِستا رند بوتگێں. وهدے کمیونِسٹ روس افغانستانا بیت ته پاکستان چه امریکه، عرب و مگرِبی مُلکانی کُمَکا مُجاهدیناں جۆڑَ کنت. مُجاهدین که افغانستانا روسا شکِستَ دئینت ته امریکه و مگربی مُلک افغانستانا بێهالَ کننت و پاکستانا ایٹمی سلاهانی سئوبا میان‌اُستمانی سورتا تهنا کننت و بازێن پابَندیے جننت.

پاکستانئے پئوجی جرنَل، دێما بِلّ که نان نیٹو اتّهادیَ بنت، بله پُشتا، اُسامه بن لادِنا جاگهَ دئینت، طالبانان پدا ری آرگناییز کنانَ بنت. پاکستان، چه طالبانانی دَستا افغانستانئے تها امریکه، جهانی پئوج و چه میان‌اُستمانی کُمَکا جۆڑ بوتگێں افغانستانئے سرکار و مردمانی هِلاپا جنگے بنداتَ کنت. همے جنگ مرچی وتی مَنتَکی آسَرا سر بوتگ. مرچی دنیائے سیاسی و پئوجی تجزیه‌کار، اشیا پاکستانئے کامیابی و اے دمَگاں امریکه و مگرِبی مُلکانی ناکامی گوَشگا اَنت.

پاکستان و آییئے جرنَلاں چه ائولی رۆچا، افغانستانئے بارئوا وتی پالیسی گیشێنتگ و آییئے نام اِنت ‹استریتجِک ڈِپت›. استریتجِک ڈِپت (Strategic depth)، پئوجی لبزے. اشیئے متلب اِش اِنت که تئیی جنگجاه چه تئیی بُنیادی مرکزا دور ببیت. تئیی هکومتئے مرکز، هما جاگه که مُلکا چَلاێنَگا اَنت چۆ که پارلیمان، پئوجی هیڈکوارٹر، اَدالتی نِزام، کارخانه، بَندِن، ائیرپۆرٹ و اے دگه اهمێں چیز چه جَنگجاها دور ببنت. جاوَر که اِشَ بنت ته ترا اِستریتجِک ڈِپتے رَسیت.

پاکستان چۆن افعانستانا استریتِجک ڈِپتے گیپت؟ هما وهدا که افغانستان وتی دۆست و دژمناں وتی تَبا گچێن کرت مکنت. اِشیئے راه اِش اِنت که افعانستانا مُهکمێں فیدرَل سرکار و مُهکم و مُنَزّمێں پئوجے مبیت، آییا چُشێں خُدمختار و وتواکێں راجی سرکارے مبیت که وتی خارجه پالیسیا آزاد ببیت. پاکستانئے واهگ اِنت که افغانستان هر وهدا نِزۆر دارَگی اِنت، افعانستانئے تها سَرکار، پاکستانئے مَنّۆگِر ببیت و پاکستانئے دستا ببیت. بَس افغانستانئے بارئوا پاکستانئے خارجه پالیسی همش اِنت که افغانستانئے خارجه پالیسی، پاکستانئے خارجه پالیسیئے ساهِگ ببیت. پاکستانئے گێگان ببیت، وتی جندئے جتا و آزادێن خارجه پالیسی مبیت.

اشیئے مسترێں سئوب ڈیورِنڈ لاین اِنت که دنیگه افعانستان و پاکستانئے نیاما اَڑۆکی اِنت. افغانَ گوشنت که ما ڈیورانڈ لاینا مَرزے نمَنّێں، و پاکستان اشیا میان‌اُستمانی مَرزے لێکیت. پدا پاکستانئے جنگ گۆں وتی ازَلی دژمن هندوستانا اِنت. اگن کابُلا پاکستان نادۆستێن و آزاتێں سَرکارے ببیت، گڑا پاکستانارا جنگ دو جَنگجاها دارَگی اِنت. یکے هندوستان و دومی افغانستان. اشیئے متلب پاکستان وتی استریتجِک ڈِپتا گارَ کنت. پمێشکا پاکستان بِه افغانستانا یک مُهکمێں مُلکے گِندگَ نلۆٹیت. بِل تُری پاکستانئے جرنَلاں هرچے کت، بله وتارا رَکّێنتِش و سۆبێن بوتنت. بله بیا که نوں ما وتا، بلۆچاں تَپّاسێں که ما چے کرت و چه ناین الێوَنا رندئے جهانا ما کجام پایده گِپت و چے تاوان کرت؟

وهدے که امریکه افغانستانا آتک، گڑا بلۆچ راجدۆستانی گَپّ اِش اَت که مرچی اِنت باندات اِنت امریکه و ویسٹ بلۆچا دستا گِرَنت و دو سَد و هپتاد ملین مردمئے مُلک و ایٹمی سِلاهانی واجهێں پاکستانا پرۆشَنت و مارا مُلکے بَکشایَنت. و گپ اِش اَت که مارا دگه هِچ کنگی نه‌اِنت، بَس ٹُکٹُکّے کنگی اِنت و امریکه هال دئیگی اِنت که ما هست اێن.

اے لێکهئے مَسترێن مَنّۆگِرانی تها لهتێں سَردار و لهتێں انچێں راجدۆستێں رهشۆن هئوار اَت که چه مڈل‌کلاسا اتنت. بله پئیسله‌سازی و میان‌استمانی جهگیری انگت لهتێں سَردارزادَگا گۆن اَت. پئیسله‌ساز هما مردم اتنت که هچ سیاسی پراسِسئے بهر نبوتگ‌اَنت، پمێشکا سیاسی تربیتے هم نبوتگِش و هچ سیاسی مزاجِش هم نبوتگ. اِشانی لاهِکی بَس یکّے بوتگ که اے سَردارانی چُکّ و نماسگ بوتگ‌اَنت.

مڈل‌کلاس رهبراں مُلکا کار کرت و مرکزی رهبر سَردارزادَگ اتنت. پئیسله‌سازی، پالیسی‌سازی و جهانئے دێما بلۆچئے نمایندگیئے هَکّ سردار و سردارزادَگاں گۆن اَت. مڈل‌کلاس رهبراں هم هچبر چه سَردارزادَگاں جُست نکرت که واجه شُما چے کنگا اێت و پرچا کنگا اێت؟ شمئے پالیسیانی پُشتا هِکمَت چے اِنت؟ مسالئے هبرا بلۆچاں وهدے پئیسله کرت که امریکهارا وتی هال سَر کنگی اِنت، ته بلۆچ یوناییٹڈ لبریشن فرنٹ نامێں تنزیمێا اقوامِ متحدهئے کارِنده، جان سۆلیکی، که امریکی شهریے اَت، چِست کت و آییئے ڈرێوَر کُشت. اے هبر تاں رۆچِ مرچیا زانَگ نبوت که بلۆچ وه امریکهارا وتی وجودئے اِهساسا دئیگی اتنت، په اے کارا اَلّم اَت که امریکی شهری، که یو اینئے پناهگزینانی کارئے سَرۆکے، همِشیا چِست بکنئے و بِبَرئے؟ جندئے آوار بجنئے و ڈرێوَرئے بکُشئے؟ پدا په گارێں امریکی شهریئے دَر گێجَگا بلۆچ راجدۆستان یک کمیٹیے اَڈ دات. کمیٹیئے سجّهێں مردم هما آزادی پسندێں بلۆچ راجدۆست اتنت که مُلکا نشتگ و بلۆچستانئے آزادیئے گپّا کنگا اتنت. اے کمیٹیئے کِساس سجهێں مردم پاکستانا چِست کرتنت، بازێنے کُشت و دئوری دات.

لهتێں وه گوَشیت که په جان سۆلیکیئے یله کنگا یو اینا که بلۆچانی شَرت لۆٹِتگ‌اَنت ته یک واجهێں سرۆکێا اے هم گوَشتگ که بلۆچستانا آزاد کنێت و منا گئورنَر کنێت.

اے وڑێں گَپ باز بیت. منا باوَرَ نکنت که مئے سیاسی رهبَر چشێں ناسَرپد ببنت. بله اے راستے که جان سۆلیکیئے چِست کنگا رند پاکستان، بلۆچانی کُشَگ و دئور دئیگا بنداتَ کنت. زاَنگَ بیت که ما امریکهارا وتی وجودئے اهساس وه دات، بله اشیئے  همراهیا دنیایارا اے گپّ هم باوَر کناێنت که ما بلۆچ یک گئیر زِمّه دارێں سیاسی و پئوجی تاکتے اێں. په گئیر زمه داریئے سابِت کنگا همینکَس بسّ اِنت که تئو یو اینئے اپسَرے چِست کرتگ و یو اینئے ڈرێوَرے کُشتگ. هما ویسٹ که ما وتی دلا وتارا آییئے مسترێں سیاسی اتّهادی سرپد بوتگێں، هما ویسٹ و امریکه که ما گوشتگ‌اَت که مارا مُلکے دئینت، همے مُلک پوره پاکستان و آییئے پئوجا رَزا دئیَنت که گۆں اِشاں هرچی کنێت، بکنێت.

بلۆچَ گوَشنت که وهدے کُرۆسئے مئوتَ کئیت…

په بلۆچا بلکێں چه ناین الێوَنا رندئے جهانا مۆکه و اِمکانے هست‌اَت، بله مئے سیاسی رهبراں یا وه چه وتی رَدێں پئیسله یا وه چه وت‌ماں‌وتی جَنگ و بِجَنگا اے مۆکه باهێنت. سَردار و سردارزادگ وه چه پێشا مسیتئے دار بوتگ‌اَت بله مڈل‌کلاس رهبر، که بزّگێں بلۆچئے ناما سیاست کنگا اَت، آیانی اَنا هم چه سرداراں کَمتِر نه‌اَت. یک سرجمێں نَسلے همے جنگئے آماچ بوت، گار کنگ و کُشَگ بوت. پشت کپتگێں سیاسی ورکرانی تها چَمچه‌گِری، وتی وتی ٹۆلی و لیڈرانی چۆ پیرا رَندگیری سیاسی کلچرئے بهر جۆڑ کنگ بوتنت. رَسمے بوت که دگه هرکس که سیاست کنگا اِنت، اگن گۆں تئو اختلافَ داریت، همینکس زاه و بدی بکن که وتی پێدا بئیگا پشۆمان ببیت. سیاسی ورکر و سردارانی دَست‌دَلُّکاں بلۆچ واننده گَلانی تها بلاک جۆڑ کت و مردمانی نام، لۆگ و جاگه پاشک کرتنت. جنگی تنزیماں وتی جندئے مردم هم جت و کُشتنت، خانه‌جنگیئے پَلّه‌مَرزی کرت، بی ایس اوئے سَرکَماش هم ٹیلپون کرت و پادتراپ دات. بله لیڈرانی گۆشاں مۆرے نئوارت. انگت ماهۆل هما اِنت. گۆں هرکَسا که اختلاَف دارئے، زاتی اختلاف بِدار و سیاستئے ناما مردمانی کِردارکُشیا بکن. سیاسی کلچرئے تها، شرَپ دارێں وڑێا سیاسی بِهس و سیاسی اختلاف دارگئے هچ گُنجایش مئیل. هرکَس اگن کَسانێں هم سیاسی اختلافے داریت، آییا کئومی مُجرِم و گَدّارے سابِت کن. سیاسی تنزیماں وتی زاتی دُکّانئے دابا چَلاێن. و هرکس که همے سیاسی تنزیمانی تها اختلاف بداریت یا سرۆکئے دێما درئیت، همے تنزیم و تنزیمانی مردمانی دستا کَم‌شرَپ و بےازّت بکن.

اے مئے سیاستئے اَسل هالت اِنت. بله اگن کَسے اِشیئے نشاندهیا بکنت، همے کِردار، بےنامێں فئیسبُکی اکاوونٹانَ کایَنت، ترا الّم گَدّارے سابِتَ کننت. پدا بدبهتی اِش اِنت که سجهێں مردم یکے دومیا زاننت. بےنامێں اکاوونٹ هم هرکس زانت که کئے، کئے اِنت. ما وهدے زاهئے دئیگا بِنداتَ کنێں، جهانئے هچ کئوم مئے مُکابلها کرتَ نکنت. پدا ما اے داواها هم کنێں که ما جهانئے مَسترێں گئیرَتمندێں کئوم اێں.

سیاسی جُنزانی تها رَدێں پئیسله و رَدی بیت، کئوم خانه‌جنگی و وت‌ماں‌وتی جنگاں هم کپنت، بله اے دگه کئومانی سیاسی رهبر چه وتی رَدیاں سبَکّ درَ برنت و په دێمترا نۆکێں سیاسی و کئومی راه درَ گێجنت و هکمت امَلی جۆڑ کننت. رهبَر، اگن تهنا درباردی و تاریپ کنۆکێں مردم بلۆٹنت، ته کَم کَمّا سیاسی پئیسله هم همے درباریانی دستا بنت و زاهِر اِنت، زاه دئیگ و گَدّار سابِت کنگ وت یک مزنێں سیاسی کارے جۆڑَ بیت و وَشگَپّ و دست‌دَلُّکێں نبشته‌کار مسترێں رهشۆنَ بنت.

بله سیاسی رهبر باید اِنت چه وتی چمچَهاں دورتِر بچاریت. بله اُمێد سَک کَمّ اِنت که چُش ببیت. مرچی جهان، و مئے دمَگ، پدا چه ناین الیوَنا پێسری دئورا پُتِرَگا اِنت. چه ناین الیوَنا رند، گوستگێں بیست سالا، که بلۆچ سیاسی سرۆکانی کِرّا یک مۆکَهے هست‌اَت که په وتی مردماں کارے بکننت، آ ما گوازێنت. بله انچۆ که پاکستانئے جرنَلاں، یک انچێں هالَتے که ناین الیوَنئے سئوبا پێدا بوتگ‌اَت، که آیانی هَلاپا اَت، آیاں تهنا وتی هَکّا نَبُرت، جنگئے جندِش کَٹِت، و مرچی وتی پروکسی، که طالبانئے شکلا اَنت، جهانئے دێما یک تاکَتے سابِت کُرتنت. و بانداتێں افغانستانئے تاکَتا شریکدار اِنت هم. آیۆکێں وهدا پاکستان و آییئے پئوج، کابُلا نشتگێں سرکارارا وتی تَبئے پئیسلهئے کنگا هم مجبورَ کنت. کابُل یا افغانستان پدا هما نێمگا رئوگا اِنت که پاکستانی پئوجئے پَنچُمی سوبه ببیت.

بلۆچ سیاسی رهبران چه وتی گوَستگێں رَدیاں چے دَر بُرتگ و اے نۆکێں هالت، که امریکی پئوجئے چه افغانستانا در آیَگا رند جۆڑ بیت، اِشئے تها ما وتا کجا گِندێں؟ گِندَگا اے آیۆکێں رۆچ په ما شَرَّ نبنت.

وهدے کابُل پاکستانئے دۆستیگێں طالبانانی سرکار ببیت، په ما سَک گرانَ بیت که ما سَرئے چێر دئیگا افغانستانا برئوێں. سئوال اِش اِنت که کُل بلۆچ سیاسی رهبر، اے نۆکێں جاوَرانی سرا چیزے جێڑَگا اَنت یا نه؟ اگن چیزے کنگا اَنت، ته کدی وتی نۆکێں راه و دَراں مهلوکئے دێما کارَنت؟ و گوستگێں بیست سالئے ناکامیانی سئوَب چے اَنت؟ و اے گپئے زمانَت چے اِنت که اے سرۆک وتی گوستگێں رَدیاں پدا نکننت؟ یا نه، بَس همے دابا که ما گوستگێں بیست سال یکے دومیئے مات و گوارانی زاه دئیگا گوازێنتگ، اے نۆکێں جاوَراں هم ما یکے دومیئے مئیاربار کنگ و زاه دئیگا گُزارهَ کنێں؟

آ وهدا که امریکه و ویسٹ افغانستانئے سرا ارُش کنگی اتنت و اُمێد همِش اَت که پاکستانا پرۆشَنت، ما وتارا گۆں امریکه و ویسٹا همگرَنچ کنگا اتێں. نوں که امریکه گۆن طالباناں مزاکرات کنگا اِنت، نوں ما چه طالباناں متاسِر اێن و بلۆچا وتی جنگ طالبانانی رَنگ کرتگ که جنگا هِچ شَرّ و گندَگ چارَگی نه‌اِنت، اخلاکیات چارَگی نه‌اِنت. گپ مُدام همے بوتگ که سیاست اخلاکیاتئے سَرا نبیت، درۆگ هم بندگ کپیت، بله اگن سجّهێں سیاستئے جِند هُشکێں درۆگے ببیت، ته گرانَ بیت. هر وهدا که رَدیانی سَرا هبرَ بیت ته گوشگَ بیت که انوں وهدئے گپ نه‌اِنت که مارا جنگێا گِپتگ، بله مردم نزانت که گپّئے وهد کدی کئیت؟ وتی رَدیانی چارَگئے وهد کدیَ کئیت. گوستگێں بیست سال اِنت جنگ اِنت، و گپ هما یکّێن اَنت.

هرکَس وتی پیر و مُریداں شَرَّ گوشیت و اے دگراں کئومی مُجرِم و گَدّارَ لێکیت. کئومی آزادی، راج‌سازی و راجی راه دَر (Road map)، په اے دابا نبیت که پئیسبُکا بنندێں، بےنامێں اکاوونٹانی سَرا یکے دومیا زاه و بد بکنێں. اگن مئے سیاسی سرۆکاں انگت اے گپ سمجا نئیاتکگ گڑا په بلۆچا هُدا وت رَهم بکنت، پرچا که سردار، سرکار و رهبر و مریدانی وڑ و ڈئولاں که گِندێں، انچۆ مارێں که بالگِتَر بۆرانی چراگجاه اِنت.

Don’t miss posts from Balochistan Times!

We don’t spam!

+ posts

Sameer Mehrab is a writer and co-founder of Balochistan Times. He often depicts Balochistan's socio-political dilemmas in his fiction and poetry. He is based in Canada.

Leave a Comment