گُشئے اے عشق زیکّین اِنت
ہمینچو نوک ءُ پُربال اِنت
ہمینچو درد آزات اِنت
گُشئے من زی ترا دیستہءُ مرچی بال رودینتہ
گُشئے مں درین شِنگینتہ ءُ گواتءِ لنکُکاں گون اِنت
مں رنگیناں تئی رنگ ءَ
گُشئے بچکند ءِ آدینک اِنت منا چاریت، مں بچکنداں
گُشئے دُنیا تئی اَکسے، منی چمّءِ تہا درَتکہ
مں ہر چُنت اَچ ترا گِستا وتا چاراں، ترا گِنداں
گُشئے من پُکّی آں برف ءِ رِچاناں اَنچو بے باراں
گُشئے دل چاتے، آپ کپتہ ہمے زوتاں
منی ہوشام ئِے نَمبینتہ
گُشئے من ترمپ ترمپ ءَ آپ بُوّاناں
جُڑانی پُٹّہاں گوناں
گُشئے وشبو نوں بچکندَنت
ءُ زیمل ساہ کشّنت
زندگی سازے
گُشئے ہر کس تئی آوازءَ گپءَ اِنت
گُشئے من نوک اِشتاپاں
شَپاں پانَگ بئیگ لوٹاں
منا لبزانی ڈُکّال اِنت
ہمینچو گوں ترا گپ ہَست
نزاناں چے گُشگ لوٹاں
گُشئے من نوک بے چاڑاں
نہ لوٹاں ہچ کَسی نیاداں
مں بَس گوں تو بئیگ لوٹاں
گُشئے من ہورکاں اَنچو کہ دُنیایے تہا داراں
گُشئے من سَرجماں اَنچو کہ جندءَ ہم نہ واہاں
تو اَنچو نوک وَدّان ئے
گُشئے من زی ترا دیستہءُ مرچی زند برَہدار اِنت
گُشئے ہچّی زمینءُ آزمانءَ پَشت نہ کپتہ
تو تہنائے مں تہناآں
آ وَشّی زی پَدا اَتکہ
مں زندءَ دوست داراناں
مں جندءَ دوست داراناں
Mehlab Naseer has done her Masters in English Literature from the University of Balochistan and has been teaching English Literature and Functional English at the Government Girls' Degree College Turbat and the University of Turbat since 2010.
Mehlab composes Balochi poems, writes short stories and is also a regular translator.
