آزمان جَهلءَ اێر کپگءِ هاترا چے کارمَرز کنت

پُهل، یا پَدیانک؟

اِنّه، بَس یک لچّهے.

لَچّهے هر وهدا بلۆٹیت آزمانءَ جَهلءَ اێر گێجیت

ءُ زمینے جۆڑ کنت

لَچّه لنکُکانی نیامءَ انچێں چؤلے که مئیم نبیت

انچێں چؤلے که دریاءَ پَجّاه نئیاریت

لَچّهے هر وهدا بلۆٹیت

زمینءَ انچۆ بُرز بارت

که اِستال آئیءِ چارگءِ هاترا

وتی پاگاں رَهن کننت

لَچّه پاد ءُ سانکلانی انچێں سیادی‌یے

که اِشانی نیامءِ زێمرءَ وتی نام گار کته

ءُ لبزانی شۆهازءَ در په در اِنت

*****

لَچّه انچێں وابے

که آئیءِ هر دریگءِ دپءَ پُلّدانے اێر اِنت

هر پُلّدانءِ تها چَمّ سْرَپتگ‌اَنت

هر رنگ ءُ هر تَهرءِ چَمّ

انچێں چَمّ که هچبر دَرس‌جاهءَ نَشُتگ‌اَنت

انچێں چَمّ که وتی ماناءَ چه کَسّءَ نَپُرسنت

لَچّه انچێں وابے که وتی مَلارءِ گئیابانءَ گِسر کپته

کَسّءَ شۆهازَگا نه‌اِنت

کَسّ آئیءَ پَجّاه آرَگا نه‌اِنت

لَچّه بوّگ ءُ نبوّگءِ هۆرکێن جاگهءَ پَهمیانێں بێوانکی‌یے

وتی گۆش دارگءِ جُهدءَ کیامت اِنت.

*****

هما هَدّءَ که شپانکے

چه اَبرمءَ بےکِمار بوت کنت

هما هَدّءَ که دلوَتے

په وتی درشانءَ زُبانےءِ ودارءَ کت کنت

بَس، همینچُکءَ

گێدی چه لچّهءَ دور بوت کنت

چِد ءُ رند پدا هؤار کپنت

رنگ، اِسرار، شَهم، هلوَت، بۆ

ءُ کَسّے بیت که اِشاں

مێنیت ءُ جَنگلے سازیت

ءُ جَنگلءِ هامۆشی وهدے گۆں وتی تُرسءَ

دُچار کپیت

ته دور کَسّے آسے رۆک کنت

برے دست تاپیت

ءُ برے چاپ جنت

*****

شهر وتی باتنءِ رنگاں

کِشکانی سرا که رێچیت

ته دگّ ودی بنت،

ءُ دَگّانی ودی بوّگءِ رۆچ

شۆهازءِ مانِشءِ شَکّ اِنت

اے شَکّءِ سرءِ نبشته

هِچ زُبانءِ میراس نه‌اِنت

لچّه…

مرۆچاں جُهد کنگا اِنت که

همے شَکّءِ نبشتهءَ گۆناپے بِدنت

پدا هر دو سۆبمند بنت

شَکّ لچّهےءِ وڑا تالان بیت

ءُ لچّه، شَکّےءِ پئیما چێدگ بیت

زمانگ لاچار اِنت

که چه هردُکاں بےکِمار ببیت

بلے کَبرے همینچو هم آجۆ ببیت

وتی شَکّءَ شَمُشت نکنت

درۆگ همینچو راست اِنت

همینچو که راست درۆگ اِنت

لچّه همے کِساس پارسا اِنت

که وتی مانِشءِ سرونءَ اۆشتات بکنت

ءُ شَکّ همے هَدّءَ گُنهگار اِنت

که گواتءِ بدنءِ تها اێر کپگءَ رند هم وتی بۆءَ بکنت.

*****