ملار

2

مارا زیبائیءِ بَنگانی ملاراں گپتہ
جاگہے ساز سَواساں گوں مئے مان اَڑنت
جاگہے رنگ مئے دامن ءِ لمب ءَ دارنت
چم کِشکانی دمانے اگں پمّا بہ کپنت
کاینت تئی مہپرءِ پیچانی تہا چیر بیَنت
مارا زیبائی ءِ بَنگانی ماراں گپتہ
لبز شپ کپتگیں اے ہلک ءِ موالانی وڑا
اچ وتا دور رَوَنت ءُ وتا شوہاز کننت
جیڑگاں پرشتگیں درپے وتی ہنکین کتہ
دُور اوشتاتگیں گویاک ندارہ چاریت
مارا زیبائی ءِ بنگانی ملاراں گپتہ
کَد زمانگ تئی دوچانی وڑا زیبا بیت
بیگہ ءِ نود تئی زُلفانی سلام ءَ بیائنت
گوات ہرروچ بہ سندیت وتی کوشی تایے
پہ تئی بوءُ بُساں جانءَ گُباراں بہ مُشیت
مارا دیوانگیں چاگردءِ ہزانہ گون اِنت
وہدءَ دست بَستہ ءُ سر جہل کتہ اوشتاتہ
درد بچکندگے تواپ کننت، دَم نہ بَرنت
مرچی چہ دُورءَ گِدارے ما وتا مئیم کتہ
مارا زیبائیءِ بنگانی ملاراں گپتہ
دریا گیگان کنان اِنت تئی کرامءُ داباں
منی دنیا منی ارسانی وڑا رُشنا اِنت
نود ساچان اَنت تئی اَمبوئیں اَہدانی وڑا
کانگڑوانی وڑا عاشقی زئیپیں دعا اِنت
رہسرءُ دمکاں گشئے بال داتگ اَنت زہگاں
پاد آزمانءِ سرا اَنتءُ زمینءَ چاریں
مارا زیبائیءِ بنگانی ملاراں گپتہ
جاگہے ساز سواساں گوں مئے مان اَڑنت
جاگہے رَنگ مئے دامنءِ لمبءَ دارَنت۔

+ posts

Muneer Momen is the finest modernist poet of his age. He has changed the way Balochi poetry was once composed.