مُدّتےءَ رند من چُٹّیاں لۆگءَ اَتکگ‌اَتاں. جُمَهی رۆچے اَت. لئین وَ مئے کرّا چۆناها نێستیءِ هساب اِنت. چه بےلئینیءَ لۆگ انچۆ تَپسَنت که پَاهار کشّنت. جرنیٹر ءُ سولَر، هُداءِ شُگر اِنت مئے وَسءَ نه‌اَنت. من هدائی گْواتےءِ ورگا لۆگءِ پێژگاهءَ ساهگےءَ نِشتاں.
هُداءِ وشّێں گْواتءَ ژیپّ ژیپّے مان اَت، بلے سَهتُکےءَ رند مُلّاهانی اِسپیکرانی ژیپّ ژیپّ چه هُدائی گْواتءَ زۆرتِر بوتنت. مئے لۆگانی دێم په دێمءَ مدرسهے. مدرسهءِ تۆکا مسیتے، ءُ مسیتءِ بُرزءَ بلاهێں مینارے. مینارءِ چپّ ءُ چاگردءَ بےهساب اِسپیکر اَنت. مدرسه چه اَربانی داتگێں زَرّاں سێر اِنت. جرنیٹر ءُ سولر اِنت.
ما که کَسان اَتێں، هر جُمهءِ نێمرۆچءَ ماتءَ مارا سر ءُ جانءِ شۆدگ ءُ مُزواکءِ جنَگ پرمات. ما دْراهێں چُکّ تئیار بوتێں ءُ گۆں وتی مسترێن ءُ پیرێناں پێژگاهءَ نِشت ءُ واز گۆش داشت. سَمجئے شَرّ، نسَمجئے شَرّ، گۆش دارَگی اِنت.
آ زمانگءَ اے بَس مدرسهے اَت. مدرسهءِ تها مَسیت نێست‌اَت. مَسیت چه مئے لۆگءَ کمّے آ کشتِر اَت. کَسانێں مسیتے اَت. مَسیتءِ بُرزا لُکّێں مینارے اَت ءُ مینارءِ سرا کْوهنێں اسپیکرے، که برے تئوارئِے کُت ءُ برے نکُت‌ئےِ.
وانَگءِ کلچر نۆکی همێش اِنت بُنگێج بوتگ‌اَت. جنکّانی جتائێں پرائمری اسکولے اَت. دگه یک اسکولے هست‌اَت که اودا جنکّ ءُ بچکّ هۆر وانَگا اَتنت. اے اسکولءِ وانَگ شَرتر اَت. اُستاد لائکێن اَتنت. مات ءُ پِتاں وتی چُکّ گێشتر همے اسکولءَ داخل کُتنت. آ زمانگءَ هم لهتێں مُلّا جنکّ ءُ بچکّانی یَکّێں اسکولءَ وانَگا وشّ نه‌اَت، بلے مُلّاهاں دپءِ پُرّءَ هچبر مردم گُشت نکُتنت که اے اسکولءَ مئوان‌اِت، یا بندئِے بکن‌اِت. ءُ نئے که مُلّاهاں پَرے هبرءَ کَسےءِ جنَگا لانک بَست. اسکولءَ دو وَه مُلّائێں ٹیچر هست‌اَت، ءُ اے دوئێن، جنکّانءَ گێشتِر دلبڈّی دئیَگا اَتنت.
ما اے مُلّاهانءَ چۆنێں چۆنێں گپّ نَگُشت، چه شئیتانیءَ. هرچی مئے دلءَ گُشت، ما اے مُلّاهانءَ گُشت. دینءِ سرا، دُنیاءِ سرا، هر وڑێں سئوال ءُ جئواب کُت. بلے نه آ زَهر گپتنت، نه مارا چراهاں تُرسِت.
نوں، باز وهدا رند مں لۆگءِ پێژگاهءَ نِشتگ ءُ واز اِشکنگا اَتاں، ءُ دلگۆش هم دئیَگا اَتاں. مُلّاءَ تهنا بسمِلّاه په نَرمی کَشّت. همے یَکّێں گپّ‌ئےِ آرامێں گالوارےءَ جت ءُ دَمانءَ چۆ پیشُّکءَ رۆک بوت. ڈۆبارَگ ءُ بد ءُ رَدئِے بندات کُت. سائنسی تَرکّیاں بِگر تاں جنێنانی گُد ءُ اَمبۆڑاءَ دَر آ، هر چیزّءِ مُخالفت‌ئِے کُت. جنێن، اسٹوڈنٹ، سائنسدان، شائر، گُشنده، مِستری، بان‌بَند، دَرزی، دُنیاءَ هرکَسے که هست‌اَت ءُ مُلّا سَهی اَت که هست، دْرست‌ئےِ شُشتنت. درُستانءَ دۆزهءِ بَشارت‌ئےِ دات ءُ دۆزهءِ آس‌ئےِ پێش داشتنت ءُ نوں بَسّ‌ئِے کُت. مُلّاءَ وتی سجّهێں وازءِ تها دگه هِچّ ءُ دگه کَسّ پَشت نَگێتک، بێدء دو مهلوکءَ: پئوج، ءُ مُلّاهانی جند.
مُلّاءِ چُشێں بْرانز گِرگ ءُ اے هبرانی اِشکنگا، منی وَه جانءِ پُٹ پاد اَتکنت. بلے من تهنا پرے هبرءَ گَل اَتاں که مئے نێمگءِ مُلّا تنینگه بَسّ دپءِ سرا تُرسێننت، تُپنگِش گۆن نێست. بلے رئوفءِ کُشگا رند، نوں من زانگا آں که اے گَلیءِ رۆچ کَمُّک اَنت.
