معاویہ بلوچ ءِ اے نبشتانک’’ حال حوال‘‘ءَ اردوءَ چاپ بوتگ۔ کیّا بلوچ ءَ رجانک کتگ۔
منّاں کہ تو ہم آئیءِ وڑا یک لاچاریں جنین آدمےئے۔ آ ہم مسلمان ءُ تو ہم مسلمان ۔ آئیءَ گوں بے دردیءَ کشوک ہم یک ظالمیں فوجی یے۔ ترا ہاک ءُ ہونءَ مین کنوک ہم فوجی یے۔ اے ہم منّاں کہ چہ تیرءِ سُمبگءَ ہمینچو سوز آئیءَ بوتگ ہمینچوترا۔ انچو آ تلوستگ انچو تو ۔ سوشل میڈیا ءَ ہون ءَ میچلتگیں اکس تئی ہم تورینیت آئی ءِ ہم۔ آئی ءِ کماشیں ماتءُ پت، بزگیں برات ءُ گہار ہما رنجءَ گوستگ اَنت کہ تئی۔
بلے منی گہار، تئی ءُ آئیءِ تہا کسانیں پرکے است۔ آ کشمیرءِ لاچارے، درستیں مسلمانانی گہار اِنت ءُ تو بلوچ سرمچارے ءِ گہارئے۔ آئی ءَ شست سالءَ پد ورگی آپءِ وڑیں لوٹےءِ مزنیں ردی کتگ۔ تو الندورءِ وڑیں پدمنتگیں ہندءَ بجلی ءُ گیسءِ واب دیستگ۔ آئیءَ وتی شپادیں چکانی پنجابءُ اسلام آبادءِ ساپءُُ پلگاریں آپ ءُ الکاپیں وانگ ءِ ناسرجمیں واب دیستگ۔ چد ءُ مستریں پرک ایش کہ کشمیرءِ مسلمانیں گہارءِ کشوک فوجی کافر ے ءُ تئی تیر بار کنوک پارسائیں مسلمانیں فوجی ورنایے۔ آئی ءِ واستا کمے گپ جنگ ءُ کمے نبشتہ کنگ بیت، بلے پہ ترا گپ جنوک تیر وارت۔ آئی ءِ واستا توار چست کنگ ءَ وتن دوست ءُ مجاہد گشگ بئے ءُ تئی ہاترا کسے کہ ہبر بہ کنت غدار ءُ ناشَرکار گشگ بیت۔
نوں تو منی بلوچیں گہاربگش کہ تئی ہاترا نبشتہ کنگ ءَ وتا غدار بہ کناں؟ تئی واستا من توار چست بہ کناں ءُ ٹارچرسیلاں تاں ہما وہدا دست ءُ پاد بہ جناں کہ بہ مراں ءُ وتی چکاں چورہ بہ کناں؟
نا منی گہار، نا۔ منا پہل کن۔ من تئی واستا اے وڑا وتا زوال کت نہ کناں۔ پدا منی گپ جنگ ءُ نبشتہ کنگ ءَ چے بیت؟ اگاں بچارئےردی تئی اِنت ۔اگاں ترا تیرانی ہرجان بوہگی اَت گڈا تو کشمیرءُ فلسطین ءَ ودی بوتین ئے۔ یک ہندو یا یہودی یے ءِ دستءَ شہید بوتین ئے۔ پدا تو بچارتیں کہ کجام وڑا تئی براتاں تئی لاچاریءِ کسہہ ءَ گوں تاکانی تاک پُر کتنت۔ کجام وڑا تئی درد ءُ سوزاں گوں سرریچیں اکس مردماں پیش داراں کتنت ءُ انڈیا ءُ اسرئیل ءِ ہلاپ ءَ زہر شانتگ اَت ءُ آہانی ظلم چوں دنیا ءِ دیما پیش کتگ ات۔
منی دست ءَ چے بیت کہ بلوچستان ءَ ودی بوتگ ئے۔ تو تیر ہم مجاہدیں فوجی یے ءِ دست ءَ وارتگ کہ آئیءَ پہ مئے رکینگ ءَ مدام کپن وتی سرا بستگ ۔ من کجام دپ ءُ آپءَ راجءِ اے پاسپانءِ ہلاپءَ گپ بہ جناں۔ اے شیدائیءِ ہلاپءَ نبشتہ کنگ ءِ واستا زانت چہ کجا بیاراں؟ تئی ہک ءَ ءُ اے مجاہدیں ورنا ءِ ہلاپءَ نبشتہ کنگءَ کس منا مجاہد ءُ وتن دوستیءِ نامءَ نہ دنت ءُ نیکہ کسے منی بڈّءَ ٹپّیت ءُ منا ساڑایت۔ گڈا پرچہ من چوشیں بے پائدہیں کارے بہ کناں؟
تئی لاچاریءَ گنداں ،تلوساں۔ ترا بے مرگیں مرگءَ گنداں دل راڑ راڑ بیت۔ گم ءُ دردانی کسہاں آروکیں تئی حوناں میچلتگیں دیم ءُ دلبند ءَ گنداں گریواں۔ بلے گہار،من ہم بے وساں۔ منا ہم زندگ بوہگی ایں ۔ وتی واستا،وتی چکانی واستا۔ من زاناں تو منی بے وسیءَ سرپد بئے ءُ منا پہل کنئے۔ من نہ پہ تو گپ جت کناں ءُُ نیکہ نبشتہ کت کناں ۔
پہل کن گہار پہل کن
تئی بے وسیں برات
Keyya Baloch is the president of the Baloch National Movement's Netherlands zone. Additionally, he works as the Web and Social Media Manager of the party's media wing, Zrumbesh. He also hosts a talk show on Zrumbesh's Youtube channel.
