من پئیسبُکپا ساجد هسئینۓ گپ و ترانے اشکت. یکّے آییا سویڈنۓ بارئوا جستَ کنت که چۆنێن ملکے؟ گوشیت که اے ملکۓ مردم وتی جاگها ادۓ کُچکّان هم کس دست جتَ نکنت. کچک هم مهپوز اَنت.
تربت تهسیلۓ سۓ ورنا، کَدّ و اُمرا سَر و نێمسرَ بنت. ساجد هُسئین، شاهمیر بلۆچ و سئیمی کیّا کادر.
اِشان چه وتی بودناکیا زوت اِنگلش جرنلزمۓ تها په وتا نام پێداک کرت. اِشانی آرٹیکل و رپۆرٹنگ پاکستانۓ نامیێن انگرێزی رۆتاک ڈان، ڈئیلی ٹایمز و دا نیوزا چاپ بوتنت.
پدا الجزیره و گارڈینا هم اشانی نبشتانک زُرتنت. اے هر سۓ انٹرنئیشنل جرنلسٹانی سْرَپا پجّارگ بوتنت، بله چه کیّا و شاهمیرا ساجد سینئیر اِنت و زانت و نبشتها هم دێماتِر اِنت.
اِشانی پِگری ردۆم بلۆچستانۓ پُرآشۆبێن دئورا بوتگ. اے کُدرتی گپّے اَت که یک کلمکارے چمِّ وت چێزان بگندیت و انگت هم کلَما کار مبندیت، اے کار جرنلزمۓ رهبندا رَد اِنت. اِشان بلۆچۓ سرا بوتگێن زُلم و ناانساپیانی نبشته کرتنت. ملک و در ملکۓ مردم سرپد بوتنت که بلۆچ وتی هَکّ و وسایلانی لُٹ و پُلۓ هلاپا جُهدا اِنت.
بلۆچستانۓ جاورانی سرا پاکستانۓ وتی رسانکدر چه بنداتا تُکّ و نُکّ بوتگ، بله وهدے ساجد هُسئینا چه وتی جندۓ بود و کمالا مزنێن رۆتاکان جاگه کرت، ته آییۓ نبشته همینکس پُراَسَر اتنت که اندگه مردمان هم چه بلۆچستانا وتی دێم گپت نکرت.
یک وهدے انچێن آتک که هر سۓ در ملک بوتنت. شاهمیر بلۆچا لندن اسکول آف اکنامکسا اسکالرشپ رست و لندنا شت. کیّایا شارٹ کئورسێۓ کنگا ناروئیا ویزا رست بله ساجد؟ ساجد هُسئین وهدۓ نگێگیان چه ملکا درانڈێه کرت. 2012آ چه ملکا در آتک، بری ملکێا اَت. بله همے در په دریانی تها بلۆچستان‌ٹایمز نامێن آنلاین هالتاکے بنداتی کرت که تان رۆچِ مرۆچیا کارا اِنت.
ساجد سر جنان سر جنانا 2017آ سری سویڈنا کپت. همۆدا آییا سیاسی پناه رسِت. پناهۓ همراهیا بلۆچیۓ زبانزانت بانک کارینه جهانیۓ همکۆپگ بوت و وتی سجهێن بود و کمالی په بلۆچی زبانۓ دێمرویا کار بست.
ساجد هسئین چه دو مارچ دوهزار و بیستا چه اپسالا، سویڈنا بێگواه اِنت. آییۓ بێگواهیا نه تهنا آییۓ چک و هاندان تکانسر و پرێشان اِنت، هر کنڈ و ملکێا بلۆچے نشتگ، گمیگ اِنت، دنیاۓ سهاپی برادری دلپدرد اِنت.
سویڈنا مردم وتی جاگها کچکان هم هَک هست، ته سک شَرّ اِنت. بله په هما بێگواهێن مردمان که ساجدا وتی سجهێن ورنایی په نبشته کنگ گوازێنتگ، نون ملک هما اِنت بله ساجدا سی رۆچا گێش اِنت که بێگواه اِنت.
اندگه درهێن بلۆچانی همراهیا منی هم گۆن سویڈنۓ سرکارا دزبندی و اپیل اِنت که وتی درهێن در وسیلهان په ساجدۓ شۆهاز و در گێجگا کار بگیپت.
آییۓ درگێجگ و پَد جنَگ په سویڈنا مزنێن نێکنامیے و بلۆچانی سرا سویڈنۓ مزنێن نێکیے.
Senator Akram Dashti is a senior politician from Balochistan
Akram Dashti is a senior nationalist politician from Balochistan. In a political career spanning more than three decades, he has held important positions, including that of Minister of Information in Balochistan and Speaker of the Balochistan Assembly. He has also served as a senator.
Dashti has authored three books. He lives in Kech.
