مئی 25، 2010 ۔ منا وتی دوا بٹوا ءِ تہا ہر وخت ءَ گون اتنت۔ من اے روچ ءَ ڈیوٹی ءُ ٹریننگ ہلاس کرت، یک ءُ نیم ءَ منا لیبارٹری ءَ ہون دیگی ات۔ منی تُروُ یے بیمار اَت ءُ ہمودا داخل ات ءُ ہون ءِ زلورت ات ئےِ۔ من ہون دات ءُ وارڈ ءَ شتوں تُرو چاراِت۔ ناکو زہگ الیاس ءُ یاسین ہمودا اتنت، من آوان ءَ زرت ءُ لوگ ءَ روگا اتاں۔ بی ایم سی ءِ دیما میڈیکل اسٹورءَ اوشتاتاں کہ دوا گرگی ات۔ من میڈیکل اسٹورءِ تہا اتوں کہ پنچ شش ایف سی ءِ گاڑی میڈیکل اسٹور ءِ دیما اہت ءُ دو ایف سی والا تہا پُترت۔ منا گوْشت اِش شناختی کارڈ ءَ بدئے۔ شناختی کارڈ ءَ پیسر مُلاہیں سپاہیگے ءَ گوْشت: ’’یہی ہے‘‘۔
آہاں منا بُرت گاڑی ءِ کرّا ءُ گْوشت ترا کسٹم والا لوٹنت کہ تئی گاڑی ءِ ڈاکومنٹ جعلی اَنت۔ من زانت چے بوگااِنت۔ من دومی رندا آوار جَنگ بوگا اتاں۔
خاکی رنگیں ایف سی گاڑی ءِ پشت ءَ منا دَوراِش دات، پدا چم بست اَنت۔ چد ءُ ساری منی موبائل اِش زُرت۔ یکے ءَ گْوشت: ’’ اب یہ ہماری ملکیت ہے‘‘۔
گاڑی ءَ اسپیڈ زُرت، بیست منٹ ءِ کساس ءَ پد منا ایراِش کرت ءُ گاڑی بدل بوتنت۔ دگہ پنچ منٹ ءَ پد جاگہے ءَ ایر اِش کت۔ منی اندازہ ءَ اے کوٹی یے نہ اَت۔ پچیں جاگہے اَت۔ گرمی ءِ سبب ءَ تُن سک زور اَت، من زانت آپ بہ لوٹاں لٹ وراں۔ من ہچ نہ گوْشت۔ پدا من جیڑاِت ترا دعوت ءُ نان ورگ ءَ نیارتگ اِش، لٹ وَ چونا ہست۔ من نزانت منی نزیک ءَ کس ہست یا نیست ۔ من گوْشت: ’’ پانی چاہیے‘‘۔ انچو یکے ءَ منا پُشت ءَ لگّتے جت ءُ گْوشت:’’ پانی لاؤ ڈاکٹر کے بچے کیلئے‘‘۔ من انگہ نزاناں کہ زہر ءَ منا ڈاکٹری ءِ شگان اش جت یا یا دگہ گپے ہست اَت ۔ بلے آپ رست۔
وخت ءِ معلوم نہ اَت بلے منی ہیال ءَ مغرب ءَ پد کوٹی یے ءَ بُرت اِش۔ دست بُرزءَ انچو بست اَنت کہ من پاد لنککانی اوشتات کرت بس۔ منی کش ءَ چہ گوشاں ماراِت کہ دگہ مردمے ہم انچو منی وڑا بندگا اَنت۔ کمو رند ءَ دگہ دو مردم اہت، گوشی: ’’ان کے شلوار اُتارو‘‘۔ آئی حکم ءِ سرا عمل بوت۔ پدا گوشی چِتّر۔ یکے ءَ دل ءِ پُر ءُ دل ءِ سیر چتِر جت۔ ہمدا واؤ ءُ پریات ءُ اللہ اللہ کنگا من زانت منی ناکو زہک الیاس ہم آرتگ اِش۔ آ ہم دْرنجوک اِنت ءُ منی وڑا لٹ ءُ چتر ورگا اِنت۔ ہرچ دہ، بیست یا سی منٹ ءَ پد چتر والا اہت ءُ وتی کارے کرت۔ کمیں کہ خاموشی بوت، من برزءَ بستگیں دستاں گوں سر لگاشان ءَ دیم ءِ بستگیں سیاہیں پٹی سُرینت۔ من چارت دیم ءِ دیوال ءَ پما وڑا سیاہ ءُ اسپیتیں ٹائل جتہ۔ یک بلاہیں سرچ لائٹے دیما جتہ۔ لائٹ روک اَت۔ من گْوشت: ’’پانی‘‘۔ چار چتر لگّ اِت ءُ آپ ہم رست۔ مردءَ بوتل دپ ءَ دات من آپ وارت ۔
من گوْشت پیشاپ۔ گوشی:’’کل ، ابھی صاحب ادھر نہیں ہیں‘‘۔ ’’کل ‘‘ ءِ رَسگا سال لگّنت، من زانت، پرچہ کہ منا 2005 ءِ تجربہ گون اَت۔
باریں چکّہ وخت ءَ پد’’کل‘‘ بوت۔ تنا وہدے اے مردم ءِ ڈیوٹی بدل بوتگ اَت۔ یکےءَ منی پشت دست جت ءُ نوکیں توارے ءَ منا گْوشت:’’ تو پیشاپ ءِ ڈیمانڈ کرتہ“؟ ہاں ۔ درنجگ ءِ سادئےِ پچ کت ءُ منا ڈن ءَ برت۔ گمان بوت روچ ات۔ ٹوائیلٹ یکیں جاگہ ات کہ آئی تہا چمانی پچ کنگ ءِ اجازت ہست اَت۔ پشت ءَ درستیں بدن سچگا اَت۔ دگہ ہچ گندگ نبوت، بلئے پشت ءِ دُمبل ہونین ات۔ دست ءِ بوگ ءُ پاد گْوات گتّگ اتنت۔
ٹوائیلٹ ءَ پد پدا ہما سیاہ ءُ اسپیتیں ٹائل والا کوٹی، ہما وڑا دْرنجگ ءُ چتر۔ ہمے وڑا دو روچ گْوست ۔ گرمی، آپ، چتر، پیشاپ۔ ہنچو گوں الیاس۔ برے منی چیہانٹ، برے آئی۔ مردم زندگ ءَ کبرءَ ات گوْشئے۔ دگہ روچے شپے ہنچو گْوست۔ کساس سیمی شپ اَت منی دْرنگ ءَ چہ منی دست اِش پچ کرت اَنت۔ بے وابی ءَ سر کارءَ نہ ات چے بُوگا اِنت۔ دگہ کوٹی یے ءَ بُرت اِش، کرسی ءِ سرا نندارینت، چم اِش پچ کرتنت ۔ گوْشی: ”دیما لیپ ٹاپ ءَ پچار ءُ اگں اِنگو آنگو چارت ئے موت اِنت تئی“۔
منی کشءَ یکے نشتگہ۔ ”منا زانئے“؟ جُست ئےِ کُت۔ من چارت ہما مُلا اِنت کہ میڈیکل اسٹورءِ تہا پترت ءُ منا برت ئےِ۔ من گوْشت ”نا“۔
لیپ ٹاپ ءِ تہا فوٹو اتنت ۔ کساس چل فوٹو۔ ایشانی تہا انڈین ایکٹریس کرینہ کپور ءِ عکس ہم مان ات۔ گْوشی کئے اِنت۔ من گْوشت کرینہ۔ گْوشی ایشی گُٹ ءَ چے یے؟ منی سر کار ءَ نہ اَت شر، من جواب دات نہ کت۔ پریشی ءَ کرنٹ ءِ سزا؟
من ہمدا کرنٹ والا مشین دیست کہ سبز بلیو رنگ ات۔ مُلّا ءِ دستءَ ات، بٹن ئےِ سُرینت ءُ گوشت: ”نوں ایشی وولٹیج سد اِ نت ءُ اے چار سد ءُ پنجاہ ءَ تاں روت، اگن تو ہبر نہ زُرت“۔
بازیں کرنٹ ءِ جنَگا من بے ہوش بوتاں۔ پدا نہ زانت چے بوت۔ سہب ءَ من پیشاب ءِ اجازت لوٹ اِ ت، ٹوائلٹ ءَ من دیست پشک ءِ دُمبُل ءُ شلوار ہون ءَ یک اتنت۔
اے بند گ ءُ دْرنجگ ءُ بے وابی یک ہپتگے چل اِت۔ شپءَ سپاہی یے ءِ ذمہ داری ات کہ چِتّر ءُ کرنٹ بجنت۔ اے سپاہی ءَ جان ءِ نازر کیں جاگہ ءُ سَرگ ءَ کرنٹ جت۔ نفسیاتی دباؤ دئیگ ءِ واستا منی کزن ءَ ہم ہمے سیل ءَ ٹارچرکنگا اتنت کہ من آئی ءِ کرنٹ جنَگ ءُ کوکارانی توار ہشکت۔ کمے واؤ زاری ءَ پد ہاموشی ءُ اے گپ کہ’’چھوڑو بے ہوش ہوگیا، مر جائیگا‘‘۔
یلہ بوگ ءَ پد منی کزن ءَ منا ہم ہمے گوْشت کہ ترا ایشاں کہ کرنٹ جتہ من ہمے توار ہشکتگ انت۔
ہپتگے بے وابی ءُ سگریٹ ءِ داگ، بلیڈ ءِ گوماں بُرّگ ءِ ہمرائی ءَ آواں وڑ وڑیں جُست کت۔
یک روچے ایشان افسرے آرت، گوشی: ”من سائیکیٹرسٹے آں ءُ اسلام آباد ءَ چہ سئے روچ ءِ واستا تئی واستا اتکگاں۔ گون تو ہر روچ سئے گھنٹہ تاں سئے روچ ءَ بے سزا ءَ گپ کناں“۔
ایشی ءَ تاں سئے روچ ءَ ہمے وڑ کت۔ یک روچے منی چم ئےِ پچ کنائینت اَنت، منی پشت ءَ اوشتات کہ من آئرا مہ گندین، ءُ منا لہتیں ایڈریس ءُ نکشہ ءُ دْرچکانی عکس ئےِ کشائینت۔ من بی۔ایم۔سی ءَ سائیکیٹری ءِ تہا پوسٹ گریجویشن کنگا اتاں ءُ کمے زانت کہ اے طریقہ چہ لا شعورءَ چیریں گپّانی کشگ ءِ واستا انت۔ ہمے عکس یا نکشہانی کشّگ ءِ نیام ءَ آئی ءَ سوال ہم جست کت۔ اے چہ بازیں بے وابی یا ویلئیم انجکشن جنگ ءَ پد گپ ءِ کشّگ ءِ سکّیں آزمودہیں طریقہ یے۔
ہمیشی ءَ گوْشت:’’یار یہ ڈاکٹر ہے، شلوار کدھر ہے، لاؤ شلوار پہنا دو‘‘ ۔ پدا گوْشی فلان زالمے، آئی ترا جتہ، بے عزت کرتہ، من چشیں مردمے نہ آں، مرچی دیم تئی سزا ختم ءُ ترا کوٹی یے دیاں، اے سزا والا کوٹی نا۔
من گوْشت منی گولی منی بٹواءِ تہا انت، اگن منا دیگ بہ بنت۔ گوْشی: ”ختم بوت اَنت منا ہال دئے۔ ہاہاہاہا“۔ہمے منی بٹوا والا گولی منا نہ رستاں۔ بلے دگہ کوٹی یے ءَ برت اِش ءُ کوٹی ءِ دپ اش بند کرت۔
کوٹی سک برز اَت، برزا چھت ءَ کسانیں لائٹے جنوک اَت کہ کمیں رُژنائی دیگا اَت۔ لیگاریں نپادے ایراَت۔ ہپتگے بے وابی ءَ پد تچک بوگ ءِ موہ رسگا اَت۔ من نِند جاہ زمین ءَ ایر کرت، بلے نندگ نہ بوت۔ تیوگیں پشت چترءَ ہنچو کرت اَت کہ وسپگ نبوت۔ تاں دہ روچ ءَ لاپ زمین ءَ کرتگ ءُ وپتگوں۔ راستیں پاد ءِ ران، بزگوشت سک سچگا اتنت، من دست سک کرت چارت، پوست ڈڈّ، بُور بُور ہشک اَت۔ ٹوائیلٹ ءَ کہ شتوں من دیست اے جاگہ درست کرنٹ ءَ سُہتہ، چیا کہ مُلایا فوٹو چارگ ءِ وہد ءَ گیشتریں کرنٹ ہمدا جت اَنت۔
کوٹی ہما وڑا تنک ءُ شپ ءُ روچ چم بند ، پیشاب ءِ موکل روچے یک رندے دو منٹءِ واستہ، بلے کسانیں پیشاب ءِ واستہ بوتلے ہست ات کہ زلورت ءِ وہدا کار گپت کتہ۔
ماہے ءَ پد جاگہ بدل بوت، دوہمی جاگہ ءَ من شتاں آدا دروازگ آسن ءِ گِرل والا اتنت۔ کشءِ بندیں مردمے ءِ توار اتک۔ آجاگہ ءِ کوہنیں بندیاں زانت کہ چے ٹائم ءَ گپ کنگی انت۔ گُڑاں زانگ بوت کہ منی یک کش ءَ الطاف بُگٹی ءُ دوہمی کش ءَ سمیع مینگل بند اتنت، کہ انگہ گاراَنت۔
چہ ادا من نہہ ءُ دہ جولائی ءِ شپ ءَ یلہ کنگ ءُ شال ءِ بازارءَ ایر کنگ بوتوں۔ ڈنّءَ زانت کہ ڈاکٹرز ایسوسی ایشناں اے وہد ءَ کُل بلوچستان ءِ ہسپتال منی رہائی ءِ واستہ بند کتگ انت پمشکا بلکیں منا یلہ ئےِ کتگ۔
منی کزن اچ من سئے ماہ ءَ پدا یلہ بوت ۔آئی گُناہ ءُ میار ہمیش ات کہ منی کزن ات ۔ پدا مئے دوئینانی گناہ ءُ میار ہمیش ات ما بلوچ اتاں۔
من شالءَ وتی ڈیوٹی وارڈءَ شتوں۔ بی ایس او ءِ پیشی کماش ڈاکٹر امداد غلام رسول صاحب ءَ را مریضے پیش دارگا آرتگ ات۔ امداد ءَ گوْشت: ”تئی ادا ڈیوٹی اِنت یا تو مریض ئے“؟ من گْوشت دوئیں۔
Dr Naseem Baloch is a political activist. Based in France, he is the leader of the Baloch National Movement in Europe. He was 'disappeared' by Pakistan military twice due to his activism in Balochistan.
