مئی 25 پدا اتک ۔۔۔ اولی بہر

2

کراچی، گلستان جوہر، نعمان ایونیو۔ 25 مارچ 2005 ءَ شپ ءِ سئے بج ءَ دروازگ ءِ گھنٹی ءَ توار کُت۔ من واب ءَ بُست کت، دروازہ پچ کرت گنداں پولیس ءُ رینجرزءُ سول دریس ءِ کساس بیست مردم فلیٹ ءِ دروازہ ءِ دیما اوشتاتگ۔

من گوْشت:’’جی کیا ہے؟‘‘ آہاں جواب ءِ بدل ءَ منا کلاشنکوف ءِ کُنداکے یکے سرءُ یکے گردن ءَ جت ءُ دور دات۔ دست پُشت ءَ بست انت۔ چم ہم۔ تہنا منی گوش منا ہال دیگا اتنت کہ مئے آ دگہ سنگت ہم ہنچو جَنَگ ءُ بندگ بوگا انت۔

naseem

ما پاد شپاد ءَ، چم بند ءَ، گاڈی ءِ تہا دور دئیگ بوتاں۔

اولی سئے شپ ءَ مارا واب ءَ نئشت اِش۔ طریقہ ایش ات کہ مارا دْرتک اِش۔ بلاہیں کوٹی یے، سیاہ ءُ اسپیتیں ٹائل جنوک ات، یک بلاہیں سرچ لائٹے چمّانی توکا ءُ دست بُرزا دْرتکگ اتنت۔ یک سپاہی یے منی سرا ڈیوٹی ءَ ات کہ شپ ءَ منا پاس پہ دم جناں بکنت کہ واب مرواں۔ ایشی ءَ وتی کار شریءَ  کُت۔ ایشرا یک چتّرے (بلاہیں رَبّڑے گوں بلاہیں بردی دستگے ءَ) گون ات۔ ہمے چتّر گوں دو دستی ءَ مارا جان ءِ درستیں جاگہاں جت۔ اے جان ءَ انچو لچّتگ کہ پدا ہون درتکہ۔ بُرزا دست ہنچو دْرتکگ انت کہ اگن پاداں شر زمین ءَ ایر بکناں دست زور وَرنت ءُ ہون بنت۔ سر پلاسٹک ءِ توکا کُتگ کہ ساہ بند بہ بیت۔ سگریٹ ءِ گوما مَگون، مُک ءُ دست ءِ مُشت ءِ بوگ داگ داتنت۔

اے اولی لہتیں روچ ءِ کسّہ اَنت۔ پدا کسانیں کوٹی یے، ہمینچو کہ پاد دْراج ببنت، برگ بوتاں۔ کراچیءِ گرماگ، مکسک، تنک ءُ تہاریں کوٹی، چم سیاہیں پٹّی ءَ گوں بندوک ءُ پاد جولان۔ واب چونا نیست ات، پدا شپءَ یک آفیسرے ءِ راؤنڈ ات کہ آ وتی تَب ءَ برے  یک بج ءَ اتک ءُ برے دوءُ سئے ءَ۔  اے وہدا کسے واب بوت آئی ءِ جتا سزایے ات۔ بزگوشت ءَ بجلی ءِ کرنٹ۔

اولی سئے روچ بے واب ءُ بیم دارگ ءِ واستہ اتنت۔ پدا جُست ءُ پُرس بندات بوت، تاکہ بے وابی ءُ تُرس ءِ سبب ءَ اے وتی گپّاں بجن اَنت۔

جُست ءُ پُرس ءِ وہدا چم بندوک، دیما آفیسر ے جُستءَ اِنت ءُ پُشت ءَ سپاہی یے گوں چِتّرءَ یا لٹّ ءَ اوشتاتہ۔ اندازہ ہمیش اِنت کہ  افسر انچو اشارہ کنت سپاہی جنَگ شروع کنت ۔ دگہ یک لٹ وڑیں چیزے منی پاد ءَ لتارت ئےِ ءُ جُست ءِ کُت: زانئے چی یے؟ من نزانت۔ گْوشی ایشی ءِ باریگ کئیت گُڑا زانئے۔ پدا من نزاناں ایشی بارگ اہت کہ نا۔

چل ءُ پنچ روچ کراچی ءَ جست پُرسءَ پد کوئٹہ ءَ شفٹ کنگ بوتاں۔ اودا ہم ہمے رنگیں سزا ءُ ہمے رنگیں جُست، ٹوٹل دو ماہ ءَ ہمے وڑیں کوٹی ءُ ہمے وڑیں سلسلہ۔

 بیست ءُ پنچ مئی ءَ من گوں سئے سنگت ڈاکٹر امداد، ڈاکٹر یوسف ءُ غلام رسول ءَ یلہ بوتا ں۔ آ دگہ سئے سنگت انگہ گاراَتنت۔

جون 2005 ءَ من، ڈاکٹر امداد ، ڈاکٹر یوسف ءُ غلام رسول (جی آر) سندھ ہائی کورٹ ءَ شتاں کہ گواہی بدیاں کہ ڈاکٹر اللہ نذر، اختر ندیم ءُ علی نواز گوہر گوما یکجاہ آوار جنگ بوتگنت۔ مارا 18 مئی ءَ ڈیرہ غازی خان ءِ پولیس ءِ دست ءَ داتگ ءُ ڈاکٹر اللہ نذر، اختر ندیم ءُ علی نواز گوہر انگہ فوج ءِ دست ءَ اَنت۔ سندھ ہائی کورٹ ءَ وکیل حفیظ لاکھو ءِ ذریعہ ءَ مئے گپ گوشداشت اَنت۔ منی ہیال ءَ ڈاکٹر امداد ہم کورٹ ءِ دیما کمیں گپ جت۔ ہنّونیں بی این ایم ءِ ڈنی کارانی کار مستر حمل حیدر مئے ہمراہ ات۔ جے ڈبلیو پی ءِ سلیم بلوچ ہم منی ہیال ءَ ساڑی ات۔

منی پِت، ڈاکٹر امدادءِ پِت ہُدا مرزی واجہ نورجان، جی آر ءِ کزن ڈاکٹر اقبال، سنگت حمل حیدر ءُ ڈاکٹر یوسف ءِ کزن مقبول شمبے زئی ڈیرہ غازی خان ءَ مئے چارگ ءُ دست گرگ ءَ اتکگ اتنت۔

سنگت گوشنت کہ تو تاریخ، گپ ءُ واقعاتانی یات کنگ ءَ سک زبرئے۔ من بلکں زبر بوتگوں بلے 25 مارچ ءَ فوج ءِ دست ءَ آوار جنگ ءَ پد ءُ تہاریں زندان ءَ وہد گْوازینگ ءَ پد منی یاد داشت سک نزورترّتہ۔ ذہن نزور بوتہ۔ بس پہ زورءُ دِکّہ میڈیکل ءِ چکاس گْوازینت۔ شاباش انت ہما مردان ءَ کہ تہاریں زنداناں سالانی سال بیگْواہی ءِ زند گْوازینگا انت یا گوْازینتگ اش۔ من روچے سد رند ءَ زندان ءِ تْرانگ ءَ کپاں۔

ہودا روچ ءُ تاریخ اندازہ ءِ سرا یات کتگ اتنت۔ روچانی ہساب دارگ ارزان ات کہ جمعہ ءِ روچ ءَ دیم ءِ کشمیری مُلا ءَ چیرکانی گوْشتگ ات کہ جمعہ اِنت، جمعہ ءِ نماز وانگ بہ بیت۔ آ شیریٹن ہوٹل ءِ وت کشیں تراک کنوک ءِ کمک کنگ ءِ جرم ءَ بند اَت۔

یک روچے منا (مارا) چہ کوٹی ءَ کَشت اش ءُ جست پرس ءُ لٹ دئیگ ءِ جاگہ ءِ بدل ءَ کمیں دور برت اش۔ پدا گاڈی ءَ سوار اِش کرت۔ چم ءُ دست بندو ک اتنت۔ گاڈی ءِ تہا سُک سُک ءُ گپ ءَ محسوس بوت کہ غلام رسول (جی آر)، ڈاکٹر یوسف ءُ اختر ندیم گون اَنت۔ بلئے سپاہی ءَ ہکّل کرت کہ ہبر مکنئے۔ ہر گپ ءِ سرا سیرے لٹ۔ اے تُرس دل ءَ مان اَت، پمشکا منی وڑءَ درست خاموش بوت اَنت۔ گاڈی روگ ءَ لگ اِت، ریڈیو چالُو بوت۔ ریڈیو والا گُشگا ات کہ ایف ایم کراچی ءُ باریں دگہ چے چے۔ پدا گْوشی ہشت مئی اِنت ءُ ماسانی میان استمانی روچ اِنت۔

من وتی ماس ءِ ترْانک ءَ کپتاں۔ منی ماس ناوانندہے، آ نزانت ماسانی روچ چے ء ُ چکانی روچ چے۔ ہمدا وسّرا تُرسے منی جان ءَ پُترت کہ کہ منی ماس پکا مُرتہ، دو ماہ اِنت کہ من گار اتاں ءُ کسا ہال نیست ات۔

من بی ایس اوءَ اتوں، 2002 ءَ بی ایم سی ءَ مسلہے ءَ جیل بوتوں۔ ماس ءَ منی ناکوزہک اچ مشکے دیم دات منی چارگ ءَ ءُ گوشتگ ات ئےِ کہ منی یکیں بچک انت، اگں مزید دیر ءَ جیل بوت مں مِراں۔ پمشکا ہما گاڑی ءِ تہا منا ہیال اہت کہ اے گْرانیں ساہتاں ماس زندگ نہ بیت۔

آ نوں ہم پریشان اِنت، بلئے شکراِنت دنیگہ زندگ اِنت۔ ڈاکٹر اللہ نذر ءَ مارا پہ مذاق ہر وخت ءَ گْوشتہ کہ شمارا بْراس نیست ، شما وتی باز خیال ءَ بدارئے۔ روڈ ءِ گوازینگ ءِ وہدا گوْشتگ ئےِ کہ شما اے نیمگا بہئے کہ لگّت مہ بئے۔ من، ڈاکٹر شمس عرف بچو، غلام رسول عرف جی آر، عطاء الرحمان ءُ ڈاکٹر امداد ہمے کلب ءَ گون اتیں۔ مات ءِ یکّیں بَچک۔

خیر، من کراچی ءُ پیشی ءِ گپءَ اتاں۔ کورٹ ءَ پیشی ءَ پد مارا سلیم اخترءَ کہ ہیومین رائٹس ایکٹوسٹے ات، ہارون نامیں نفسیاتی ڈاکٹرے ءَ کرّا بُرت۔ آئی ءَ مارا جتا جتا یک یک ءَ لوٹائینت ،جست ءُ پرس ءُ چارگ ءَ پد دوا ءُ درمان دات۔ یکے گولی یے، ٹوفرانل ، منا یات اِنت۔ اے من بازیں وختے وارتاں ءُ کمو سکون بوتوں ءُ مدان مدان ءَ 25 مارچ ءِ شپ ءُ آئی پد ءِ ٹارچرءِ یادداشت بیہال بواں بوتنت۔ سالے ءَ پد من دوا ورگ ءَ بیزار بوتوں ءُ یلہ داتاں۔ 2007 ءَ یک روچے سک بے تاہیری بوت، پدا ہمے ٹوفرانل گت ءُ وارت بلے فرق نیہت۔

ہچ جاہ ءَ نندگ ءَ دل گْوشگا نہ ات۔ شال ءَ وتی دوست تریں جاگہ بی ایم سی ہاسٹل یلہ دات ءُ ناکو ءِ لوگ ءَ شتوں کہ بلکن وشتر بی بلے نا۔ 25 مارچ ءِ شپ ءُ پدءِ کسہ فلمے ءِ وڑا سہت ءُ دمان ذہن ءَ رِپیٹ بوگا اتنت۔

منا قیصر رخشانی (اسلی نام نہ اِنت) نامیں سنگتے ءِ موٹر سائیکل گون ات، من نزانت من کجا روگااوں۔ بس روگا اتوں آروچءَ۔ روڈ ءَ ٹالکی سائیکلے روگایت، منا راہ دیگا نہ ات، من آرا کشکائی ٹکّرے جت، آبزگ کپت ءُ من وش بوتوں۔ ہمے وڑیں حرکت منا تاہیر دئیگا اتنت۔

نوں من زانگا اتوں کہ اے دوا ترا شر کنگا نہ اَنت ءُ ترا دگہ دوا ورگ لوٹی۔ بلئے من وتی گپاں چیر دیگا اتوں۔ وترا نارمل دارگ ءِ جہد کنگا اتوں۔ بلئے ہچ پہ ہچ۔ ہمدا من ہاسٹل ءَ سنگت (فرہاد) فون کرت کہ تیار ببو رواں ڈاکٹر غلام رسول صاحب ءَ منا پیشدار۔ آ ہندگا لگّت، گْوشی گنوک ئے؟ من گْوشت نا، بلئے زلورت محسوس کنگااوں ۔ منا موٹرسائیکل گون ات، آ ہاسٹل ءِ تہہ ءِ سیاہیں مزنیں گیٹ ءِ دیما منی ودارءَ ات ۔ من سر بوگی اتوں، دلءَ گْوشت کہ غلام رسول صاحب ءَ حسن خان ءَ علاج کرتہ ءُ شر کرتہ گُڑاں منا  الّم شر کنت۔ پمشکا شر بوگ ءَ پیسر ہاسٹل ءِ گیٹ ءَ ٹکّرے بجن۔ من سنگت ءِ کرا ہاسٹل ءِ گیٹ ءَ کسانیں ٹکّرے جت۔ سکیں بے وتی یےءِ آماچ مارگ ءَ بوتگوں، (کمیں ہنگہ ہست )۔ نوں گُمان بیت لہتیں چیز من پہ وتی ریلیکس کنگا پہ زانت کرتگاں۔

شتاں غلام رسول صاحبءِ کلینکءَ ۔ کسہ گوْشت وتی۔ آئی ءَ گوْشت منا پوسٹ ٹرامیٹک اسٹرس ڈسارڈر انت۔ اے بیماری ہماہاں بیت کہ گْرانیں ساہتے ءَ گوزگ ءَ پد آئی ءَ ہما نگیگیں یادداشت بیہال نہ بنت۔ چو کہ منا فوجی بوٹ، فوجی پچانی رنگ، فوجی وڑیں گاڑیانی گندگا انگہ بیم اتک۔ ڈاکٹر ءَ منا پِروکزیٹیں ءُ دگہ وابی گولی یے دات ءُ گوْشت کہ شراِنت اہتگ ئے، نہ تو اے بیماری گیش بوتگ ات۔ گوْشت ئےِ ہرماہ منی کرّا بیا۔

من درمان وراں کتاں۔ دو سئے ماہ ءَ کمو فرق بوت، ٹینشن کم بوت، واب شر بوت، بلے تُرس ءِ ماحول برجاہ ات۔ لہتیں مردمانی توار، دروازگ ءُ کھڑکیانی پچ ءُ بند بوگ ءِ توار سک بیم دیگا اتنت۔ کِلیتانی توار وَ ازابے ات۔ بندی جاہ ءَ کہ کلیت والا اہتہ گُڑا ترا یا دگہ بندی یے برتگ ئےِ ءُ لٹ داتہ آرتگ ئےِ۔ گوں کلیتانی توارءَ ہرکس ءَ گْوشتہ کہ منی نمبراِنت۔ لٹّ وَ یکبرے بوتہ، لٹّ ءَ گیش ہمے تُرس بیمناک بوتہ۔ کلیت والا سپاہی ءَ کلیت ءِ بنڈل ہر وخت ءَ توار دیاں کرتہ اہتہ۔ الم نبوتگ کہ ہر رندا یکے بہ بارت، منی ہیال ءَ اے یک نفسیاتی ٹارچر ءِ طریقہ یے بوتہ۔

 خیر، ہر ماہ من غلام رسول صاحب دیست ءُ آئی ءَ منا گوْشت درماناں وراں کن۔ پِروکزیٹین ءِ ورگ ءَ منی وزن ودّگ ءَ لگ اِت ءُ تہہ ءِ ترس ءُ بیم ہم ہلاس بوگ ءَ نہ اتنت۔ گڑا سالے ءَ پد ڈاکٹر ءَ اے بند کت ءُ سَرٹالین ءِ پنجاہ ایم جی والا گولی دات۔ اے 2008 ات۔ 2009 ءَ ایشرا سَد ایم جی کرت۔ دواءِ خرچ بازاَت ءُ اچ منی تالبی ماہانہ خرچ ءَ گیش اَت۔ لوگ ءَ من ہال نہ دات کہ مات ءُ مردم منی اے بیماری ءَ پریشان بنت۔ بلے غلام رسول صاحب ءِ مہربانی ات کہ منا سیمپل دوا (ہما مفتی دوا کمپنی پہ آہانی مشہوری ءَ ڈاکٹران اش دینت) دات۔

ہمے سال ءِ فروری ءِ ماہ ءَ من ہاؤس جاب ہم ہلاس کت۔ میڈیکل افسری ءِ  سروس کمیشن ءِ چکاس پاس کت۔ فروری 2010 ءَ ایم سی پی ایس (سائیکیٹری) ءَ منا داخلہ رست گُڑا منی میڈیکل افسری ءِ پوسٹنگ ہم ہمدا بی ایم سی ہسپتال ءَ بوت۔ اے فیلڈ من پہ چوائس زُرت کہ منی بیماری ات، وتی بیماری زانگ لوٹ اِت، وتی علاج کنگ لوٹ اِت بلکں۔

فروری، مارچ، اپریل ایم سی پی ایس ءِ وانگ ءُ ٹریننگ ءَ گْوست انت۔ پدا مئی اتک،25 مئی۔

روان انت