خالق ارمان ءِ دستونکے

پتاتہ دل نہ ارواہ پیچَگی اِنت

وتی بس جند تہنا پیچگی اِنت

داں اے استار بوجیگاں نہ وپسنت

شپءِ ہنکینءَ دریا پیچگی اِنت

منی اَہدءِ ہُداءَ دم نہ برتگ

کجام اُزرءَ اے دنیا پیچگی اِنت

اے روچءِ کُمب سررِتکہ چہ برانزاں

شپءِ دَرپءَ تماشا پیچگی اِنت

تئی سر اوں بگندئے تاک کپتہ

کماشیں اُمرءِ کسہ پیچگی اِنت

ہمینچو پند بُرّئے بُرّ اَرمان

منا اے کِشک دیما پیچگی اِنت