فتح شاکر ءِ اے رپورٹ کیا بلوچ ءَ چہ اردو ءَ رجانک کتگ۔
بلوچستان ءِ سیاسی گَلّ بلوچ ہیومن رائٹس آرگنائزیشن ءُ وائس فار بلوچ مسنگ پرسنز ءِ واکداراں گشتگ کہ ملک ءَ جمہوری رہبند ءِ ہست بوہگ ءَ ابید ہم بلوچستان، خیبرپختونخوا ءُ سندھ ءَ انسانی حقانی ہلاپ ورزی برجاہ انت۔
بلوچستان ءِ مہلوک ءَ اقلیت ءَ بدل کنگ ءِ ہاترا گوادرءَ دری مردمانی آرگ ءُ جاہمنند کنگ ءِ چِن ءُ لانچ بوہگ ءَ انت، ایشی ءَ بلوچ ہچ رنگ ءَ رازی نہ بیت۔ سانحہ توتک، سانحہ 8 اگست، سانحہ پی ٹی سی ءُ شاہ نورانی ءِ ڈولیں ویلانی بوہگ ءَ پد ہم حکمرانانی اقتدارءَ نند گ مہلوک ءِ داتگیں ووٹانی گوما گدّاری انت۔ ژوبءَ بہ گر داں گوادرءَ مہلوک زلم ءِ ہلاپ ءَ توار چست بہ کنت ، بلوچستان ءَ 3750 مردم بیگواہ کنگ بوتگ ۔ 1250 بلوچانی زامبیلیں لاش دست کپتگ۔
بلوچ ہیومن رائٹس آگنائزیشن ءُ وائس فار بلوچ مسنگ پرسنز ءِ چیردستی ءَ ماں کوئٹہ پریس کلب ءَ انسانی حقانی میان اُستمانی روچ ءِ درگت ءَ برجم داشتگیں مراگش ءَ نیشنل پارٹیءِ بنجاہی آرگنائزر ڈاکٹر عبدالحئی بلوچ ، وائس فار بلوچ مسنگ پرسنزءِ چیئر مین نصراللہ بلوچ، بلوچ ہیومن رائٹس آرگنائزیشن ءِ چیئرپرسن بی بی گل بلوچ، عوامی نیشنل پارٹی کوئٹہ ءِ کارمستر ملک ابراہیم کاسی ، بلوچستان نیشنل پارٹی ءِ مرکزی رہنما موسی بلوچ، جماعت اسلامیءِ مولوی ہدایت الرحمان، آغا اشرف شاہ ءُ دگراں گشتانک دات۔
وائس فار بلوچ مسنگ پرسنز ءِ چیئر مین نصراللہ بلوچءَ گشت کہ اے وہدی بلوچستانءَ انسانی حقانی ہلاپ ورزی برجاہ انت۔ وائس فار بلوچ مسنگ پرسنزملک ءِ ہر ہما ادارہ ءِ کرا انصاف لوٹگءَ شتگ کہ چرائی ءَ امیتے بوتگ، بلے انگت ءَ مارا انصاف نہ رستگ ۔ بلوچستان ءِ سیاسی ءُ مذہبی گَل زلم وجبرءِ ہلاپ ءَ گوں ما ہمکاری بہ کننت ءُ وتی توارءَ چست بہ کننت، داں کہ ماں بلوچستانءَ بووکیں نا انصافایانی سرا یک مہکمیں ءُ یک مشتیں توارے دیما بئیت ءُ ملک ءِ حکمراناں مجبوربہ کننت کہ آ مئے جیڑہانی گیش ءُ گیوارءَ وتی کردءَ پیلو بہ کننت۔
نیشنل پارٹی ءِ بنجاہی آرگنائزءُ بلوچ قوم پرست ڈاکٹر الحئی بلوچ ءَ گشت کہ اے ملک ءَ چہ 1948 بہ گر داں روچ ء مرچی ءَ ہچ ایردستیں راج ءِ حق نہ داتگ، ہمے واستا نا انصافی گیش بوتگ انت۔ گوں بلوچاں چہ بنداتءَ انصاف نہ بوتگ ساحل ءُ وسائل مئیگ انت، گوادر، سیندک پروجیکٹانی واستا چہ پنجابءَ مردم آرتگ ءُ بہر داتگ انت ءُ بلوچ مرچی ہم چہ وتی حقاں زبہر انت۔ سانحہ توتک ، سانحہ 8 اگست ، سانحہ پی ٹی سی ءُ سانحہ نورانی ءِ وڑیں ویلاں پد ہم کسے چہ وتی عہدہاں دست کش نہ بوتگ، ہمے واجہانی وجہ ءَ مہلوک ءِ اُوست چہ وتی حکمراناں پروشتگ۔
اے دگہ گشتانگ دیوکاں گشت کہ بلوچستان سندھ ءُ خیبر پختونخواءِ مہلکوکءَ گوں ناانصافی بوہگءَ انت۔ آ ہروہدے کہ وتی حقانی واستا توار چست کننت غدار گشگ بنت جَنَگ بنت ۔ پشتون، بلوچ ءُ سندھی راہدربر وتی حقانی لوٹبءَ غدار گشگ بوتگ انت ءُ جیل و زنداناں کنگ بوتگ انت بلے انگت مئے راہ دربراں سودابازی نہ کتگ۔
گڈیءَ آہاں گشت کہ بلوچستان ءِ مہلوک ءِ حقانی پد جنگ ءَ درستیں گَلّاں وتی کرد پیلو کنگی انت۔
منّت: حال حوال
Keyya Baloch is the president of the Baloch National Movement's Netherlands zone. Additionally, he works as the Web and Social Media Manager of the party's media wing, Zrumbesh. He also hosts a talk show on Zrumbesh's Youtube channel.
