من1989 ءَ وہدے ڈگری کالج تربت ءَ ایف ایس سی ءِ اولی سال ءَ داکِلہ گپت گڑا مَکُّران ءِ بچکاں ابید یک مَشکِہی بچکے دین مَھمد ھم گوں من وانگا اَت۔ دین مھمد مدام دو بچکءِ ھمراہ اَت۔ یکے پَٹکّ اَت، دومی بُرز اَت۔ یک روچے من جست کت: ” اے پَٹکّینءُ بُرزیں کے اَنت کہ تو مدام اِشانی ھمراہ ئے؟” دین مھمدءَ بچکندت ءُ گشت: “اے دوئیں مئے دَمگی اَنت۔ پَٹکّینءِ نام منّان اِنت۔ بُرزینءِ اَلّانِزر“۔
من ءُ دین مھمد اولی سالءَ اتیں ءُ اَلّانِزرءُ مَنّان دومی سالءَ اتنت بلے ما دْرہ بی ایس او یاسین ءَ اتیں پمیشا زِیتّاں ھورءُ تور بیتیں۔ آ وھداں بی این وائی ایم / بی این ایم ھم جوڑ بیتگ ات کہ آھیءِ سروک ڈاکٹر ھئی اَت۔
گوں منّان ءِ گندگ ءَ من مدام ڈاکٹر ھئی ءِ تْرانگ ءَ کپتاں۔ یک روچے من جست کت: ” ڈاکٹر ھئی تئی چی اِنت؟” گشت ئےِ: “ھِچّ نہ اِنت۔ چیا زاناں؟” من گشت: “ترا گنداں ڈاکٹر ھئیءِ تْرانگ ءَ کپاں۔ آھیءَ کندتءُ گشت: “چوں؟” من گشت: “رنگءُ دانگ ءَ تو آھی ءِ چَھرگ ءَ جنئے۔ ھماھیءِ وَڑءَ پٹکّ ئے ءُ ھماھی ءِ رنگ ءَ دیواناں گُشتانک دیگءَ شُرو بئے، بَسّی نہ زانئے۔”
مَنّان ءَ ٹَھک دات۔ آ وھداں ڈاکٹر ھئی مئے دْرستانی دِلواہ اَت۔ بی ایس اوءِ اولی سرکماش بیتگ اَت۔ بی ایس اوءِ اولی رَھشون اَت کہ پاکستان ءِ راجی دیوانءَ سر بیتگ ات ءُ واجہ ھیربشک مریءِ پَجّیءَ 1973 ءِ سَررھبند ئےِ نہ مَنّتگ اَتءُ دَزنام نہ جتگ اَت۔ بلوچانی اُلسی سیاستدان اَت، بزاں سردارے نہ اَت ءُ نی بی این ایم ءِ رنگیں راجدوستیں گلے ءِ مستر اَت۔ پمیشا ڈاکٹر ھئیءِ نامءِ بندگ ءَ مَنّان زھر نہ گپت، اَنگہ گل بوت۔
ایف ایس سی کنگ ءَ رند وَھدے من بولان میڈیکل کالج ءَ سِیٹ گپت گڑا دین مھمد، منّانءُ اَلّانِزر ھم گون اتنت۔ من گوں منّانءَ گشت: “نی تو شرتر ڈاکٹر ھئی بیت ئے۔۔” کندتءُ جست ئےِ کت: “چون ڑے؟” من گشت: ” شما پیسرا ھمچَھرگ اِت، پَٹکّ اِت ءُ پِیتّار اِت۔ نی ڈاکٹر اِت ھم۔” آھیءَ کندتءُ گشت: ” نوں گڑا من نزّیک کتگ۔۔“۔
آ دور گْوست۔ وَھد مَٹّ بوت۔ ءُ وھد ءَ وتی پَجّی ءَ بازیں چیزے مَٹّ کت۔ ڈاکٹر ھئی ءَ بلوچ جھد ءِ سروکی یلہ دات ءُ پاکستانءِ رندگیری بِنا کت۔ ڈاکٹر اَلّانِزر، ڈاکٹر مَنّانءُ ڈاکٹر دین مھمد ءَ بَرگشتگیں ڈاکٹر ھئی ءِ رَندگیری ویل کتءُ بلوچ جھد ءِ سروکی زُرت۔
مروچی کہ ڈاکٹر منّان پہ بلوچ ءِ آجوئی ءَ شھید بیتگءُ ڈاکٹر ھئی پاکستانءِ گُلامیءَ زندگ ءَ مُردار اِنت، من ھیال کناں کہ آ ھم وھدے اَت کہ “ڈاکٹر ھئی” ءِ نام پہ ڈاکٹر منّان ءَ شَرپے اَت ءُ نی ھم وھدے کہ ڈاکٹر ھئیءِ نام زاھے۔
1989á wahdé man đigrí kálij Turbatá F.Sc e aolí sálá dákila gipt guŕá Makkurán e bacakkáń abed yak Maśkihí bacakké Dín Mahmad ham góń man wánagá at. Dín Mahmad mudám do bacakk e hamráh at. Yakké paŧakk at, dumí burz at. Yak rócé man just kut: “É paŧakkén o burzéń ke ań ki to mudám iśání hamráhe?” Dín Mahmadá bickandit o guśt: “É duéń me damagí ań. Paŧakkén e nám Mannán iń. Burzén e Allá Nizar.”
Man o Dín Mahmad aolí sálá itéń o Allá Nizar o Mannán dumí sálá itant bale má druh B.S.O Yásíná itéń paméśá zíttáń hór o tór bíttéń. Á wahdáń B.N.Y.M / B.N.M ham jóŕ bíttag at ki áhíe sarók Đr. Haí at.
Góń Mannán e gindagá man mudám Đr. Haí e tránagá kaptáń. Yak rócé man just kut: “Đr. Haí taí cí iń?” Guśté: “Hicc na iń. Cíá záná?” Man guśt: “Tará gindáń Đr. Haí e tránagá kapáń.” Ahíá kandit o guśt: “Cóń?” Man guśt: “Rang o dánagá to áhíe cahragá jane. Hamáhíe waŕá paŧakke o hamáhíe rangá díwwánáń guśtánk díagá śurú be, bassí nazáne.”
Mannáná ŧahk dát. Á wahdáń Đr. Haí me drustání dilwáh at. B.S.O e aolí sarkamáś bíttag at. B.S.O e aolí rahśón at ki Pákistán e rájí díwwáná sar bíttag at o wája Her Baśk Marí e pajjíá 1973 e sarrahbandé na mannitag at o daznám na jatag at. Balócání ulusí syasatdán at, bizáń sardáré nah at o ní B.N.M e rangéń rájdóstéń galé e mastir at. Paméśá Đr. Haí e nám e bandagá Mannán zahr na gipt, anga gal bút.
F.Sc kanagá rand wahdé man Bólán méđikal kálijá síŧŧ gipt guŕá Dín Mahmad, Mannán o Allá Nizar ham gón itant. Man góń Mannáná guśt: “Ní to śartir Đr. Haí bítte!” Kandit o justé kut: “Cón ŕe?” Man guśt: “Śumá pésará hamcahrag it, paŧakk it o píttár it. Ní đákŧar it ham.” Áhíá kandit o guśt: “Núń guŕá man nazzík kuta!”
Á dor gwast. Wahd maŧŧ bút. O wahdá watí pajjíá bázéń cízzé maŧŧ kut. Đr. Haíá Balóc juhd e sarókí yala dát o Pákistán e randgírí biná kut. Đr. Allá Nizar, Đr. Mannán o Đr. Dín Mahmadá bargaśtagéń Đr. Haí e randgírí wel kut o Balóc juhd e sarókí zurt.
Marócí ki Đr. Mannán pa Balóc e ájúíá śahíd bíttag o Đr. Haí Pákistán e gulámíá zindagá murdár int, man hayál kanáń ki á ham wahdé at ki “Đr. Haí”e nám pa Đr. Mannáná śarapé at o ní ham wahdé ki Đr. Haí e nám záhé.
Naguman, a medical doctor by profession, is a Balochi fiction writer and literary critic. He also often comments on political and social issues of Balochistan.
