سرۆکےءِ تها، منی نِزّءَ، سئے سِفت اَلّمی اِنت؛ ایمانداری، مخلسی، بهادُری یا نه‌تُرسی. ءُ من که ایوب بلیدیءِ ترانَگءَ کپاں، اے سےئێں سِفتاں آئیءِ تها گِنداں.
1987ءَ مئے چێرێں گَلءِ سنگتاں سَلاه ءُ مشئورهءَ رند پئیسله کت که ما سرفیس سیاست کنێں، ءُ اِشیءِ واستا یک سیاسی گَلے، بی این وائی ایم جۆڑ کنگ بوت. ایوب هم بی این وائی ایمءَ هئوار بوت گۆں، ءُ تاں گُڈّی وهدا همے پارٹیءَ اَت. اے وهدی ایوبءَ لهتێں سال مشکتءَ گوازێنتگ‌اَت ءُ رندا مشکتءِ پئوج‌ئےِ یله داتگ‌اَت ءُ بلیدهءَ اَتکگ‌اَت. چه بلیدهءَ ڈسٹرکٹ کئونسلءِ هم ممبر بوتگ‌اَت.
همے وهداں، یک رندے سَرێں سنگتانی دیوانےءَ سَلاه بوت که مارا تربتءَ، په چێرێں گَلءَ، په سنگتانی هپازتءَ مزنێں سِلاهے پکار اِنت. اے وهدی افغانستان جنگ اَت، تیر ءُ تپنگ اَرزان اَت، بلے اِشانی ٹهێنگ ءُ تربتءَ سر کنگ گرانێں کارے اَت. گڑا اے زمه‌داری ایوبءَ زرت. نزاناں آئیءَ اے کار چۆں ٹهێنت.
1988ءَ جنرل ضیاء الحق بێران بوت، پاکستانءَ جمائتی بُنیاداں اۆٹانی جار جنَگ بوت. گڑا مئے سنگتاں پئیسله کت که ما پارلیمانءَ رئوێن ءُ په وتی مهلوکءِ هَکّاں جُهدے کنێں. اے رِدءَ، ما چه اۆٹاں دو سئے ماه پێش بلۆچستان نیشنل الائنسءِ نامءَ اتّهادے کت. اے اتّهادءِ تها بی این وائی ایم اَت، نواب اکبر بگٹی اَت، ءُ سردار عطاءالله مێنگلءِ رَزا گۆن اَت ءُ آئیءِ چُکّ اختر مێنگل چۆناهیا بی این وائی ایمءَ هم گۆن اَت.
1988ءِ گچێنکاریاں چه بی این وائی ایمءِ سنگتاں سوبائی اسمبلیءَ من، ڈاکٹر مالک، ایوب ءُ اختر مێنگل سۆبێن بوتێں. ما کوئٹهءَ شتێں. مێنگل هائوسءَ مئے بی این اےءِ دیوان بوت ءُ پئیسله بوت که نواب اکبر خان بگٹی مئے پارلیمانی لیڈر بیت. سردار عطاءالله مێنگلءَ پئون کت ءُ سَلاه دات که بگٹیءَ پارلیمانی لیڈر مکن‌اِت، بلے سنگتاں گُشت که ما پئیسله کتگ. گڑا ما وتی پارٹی پئیسلهءِ سرا اۆشتاتێں. نواب بگٹی بلۆچستانءِ سروزیر جۆڑ کنگ بوت، من اسپیکر نامێنگ بوتاں، ڈاکٹر مالک وزیرء سِهَت. اختر مێنگل ءُ ایوب ایم پی اے اَتنت. مئے پارٹیءِ سرۆک ڈاکٹر عبدالحئی اَت.
مُلک ءُ هکومتی بند ءُ بَست، گِر ءُ دار مشکل ءُ گرانێں کارے، هرکَسی وَسی کارے نه‌اِنت. مئے پئیسله اِش اَت که دراهێں سنگت پارٹی ڈسپلنءِ پابندیءَ کننت. هر کارءَ پارٹیءِ ضلعی کابینه ءُ مرکزی کیادتءِ پئیسلهانی پابندی کنگ بیت. ٹرانسفر هم پارٹی سنگتانی گُشگءِ سرا کنگ بوتنت.
نواب خیر بخش مری گۆں وتی مهلوکءَ چه افغانستانءَ واتر بوتگ‌اَت. کوئٹهءَ، سریابءَ نشِست‌ئےِ اێر کت، سیاسی سرھالانی سرا بهس ءُ تران کنگا اَت. نبی بنگلزئی مَریءِ نزیکێں سنگتے اَت، ءُ بی ایس او ءُ ورناھانی هم سنگت اَت. نبی بنگلزئی همے زمانَگاں تَرّ ءُ تابءَ مکرانءَ اَتک. اے سپرءِ مکسد کۆهانی سروے اَت که آۆکێں وهدا کجام جاگه په جنگۆلاں مُناسب بنت. گڑا ایوبءَ وتی گاڑیءِ سرا بنگلزئی بلیده ءُ زامرانءِ کۆه ءُ گَراں گَردێنت. منی هئیالءَ اے وهدی ایوبءَ په بلۆچی بنگلزئیءِ مهمان‌نئوازی کت ءُ گَردێنت، دگه وابستگی ءُ چیزے نێست‌اَت. اے هما رۆچانی هبر اِنت که نواب اکبر خان بگٹی بلۆچستانءِ سروَزیر اَت ءُ ایوب ایم پی اے اَت.
کساس شانزدَه ماه هکومتءَ گوازێنَگا رند ما پارٹی پئیسلهءِ بنیادءَ چه هکومتءَ استیپا دات ءُ آزادێں بِنچانی سرا نِشتێں. مئے اے کارءَ دو ماهءَ رند اسمبلی پرُشتنت. آ رۆچاں پاکستانءِ آئینءِ آرٹیکل 52-بی هست‌اَت، ءُ پاکستانءِ سدرءَ اے اهتیار هست‌اَت که کُجام هم وھدےءَ پارلیمانءَ بپرۆشیت. غلام اسحاق خان مُلکءِ سَدر اَت. آئیءِ زھم ھر وھدا ھکومتءِ سرا ساھێل اَت. پد ماں پدا سئے چار ھکومت‌ئےِ گوازێنت. همے نیامءَ مئے پارلیمان هم پرُشت. ءُ نگران هکومتے اَتک.
نواب بگٹیءِ گُشگءِ سرا همایوں مَری بلۆچستانءِ نِگران سروزیر جۆڑ کنگ بوت. اۆٹانی جار جنگ بوت. اے نوں 1990ءِ اۆٹ اَنت. تربتءَ عزیز لاسی نامێں ڈپٹی کمشنرے راه دئیَگ بوت، گۆں ھاسێں ھدایتےءَ، که بی این وائی ایمءِ اُمێدوار دئور دئیگی اَنت. اۆٹان داندلی کنگ بوت ءُ من ءُ ایوب اۆٹءَ دئور دئیَگ بوتێں. نوں تانکه 1993ءِ اۆٹاں ایوب یکّۆئی پێشی پاشی جنَگا اَت. نزاناں آئیءِ سرا چے کێس درج کنگ بوتگ‌اَت، بلے مُدام پێشیءَ تربتءَ اَتک. باز وهدا منی لۆگءَ داشت‌ئےِ.
1993ءِ اۆٹ که بوتنت، من، مالک، کچکۆل ءُ ایوب اے گچێنکاریاں سۆبێن بوتێں.
ڈاکٹر مالک پارٹیءِ پارلیمانی لیڈر اَت ءُ وزیر تالیم اَت. من وزیرء اِطلاعات ءُ اِسپورٹس، کچکۆل وزیرء فشریز اَت ءُ ایوب وزیرء مال، ایکسائیز ءُ ٹیکسیشن.
اے وهدی هم ایوب هما پئیما مهلوکءِ هزمتءِ جزبه، ءُ پارٹی ڈسپلنءِ پابندیءَ کنگا اَت، هما پئیسله که چه بنداتءَ گۆن اَت. منا یاد اِنت نواب عبدالرحیم شھوانی مستونگءِ ایم پی اے اَت. آئیءَ وتی ھلکهءَ پٹواری‌یے ٹرانسفر کنائێنگی اَت. آئیءَ ایوب گُشت. ایوبءَ پَسّه دات که تئی هبر سر ءُ چمّاں، بلے من وتی پارٹیءِ پابند آں. تئو اگاں مئے پارٹیءِ مستونگءِ ضلعی سدرءَ هبر بکنئے، شرتَر اِنت. مستونگءَ پارٹیءِ سدر اقبال زھری اِنت، تئو گۆں همائیءَ هبر کن. اے هانوادَهێں مردءَ اقبال زھریءِ کرّا سفارشی کاگدے گِپت ءُ آورت، نوں ایوبءَ پٹواری ٹرانسفر کت.
عزیز لاسی اے وهدی یک مهمکمهےءِ سکٹری اَت. یک رۆچے منا ءُ ڈاکٹر مالکءَ گُشت‌ئےِ که شما ایوبءَ بگُش‌اِت. من وتی آ گلَتیءِ سرا ماپی لۆٹاں. لاسی گُشگا اَت که منی دپترءَ اَتکگ ءُ منا بےاِزّت‌ئےِ کتگ، که ”تئو ڈپٹی کمشنرءِ بستارءَ کئومی بددیانتی کُتگ.“
دگه رَندے، مکُرانءِ کمشنر مرجان خان نامێں مردے اَت، شَرّێں ایماندارێں اپسرے اَت، منا گُشت‌ئےِ که من ایوبءِ وَشّان کنگا بلیدهءَ رئوگا تئیار آں. بزاں یک گپّےءِ سرا مرجان ءُ ایوبءِ نیاما ناتپاکی ءُ دلرنجی پێدا بوتگ‌اَت. آ دلرنجی هلاس کنگ بوت. همے پئیما کمشنر مرجان ءُ ایوب وشان بوتنت. منی گُشگءِ مکسد اِش اِنت که ایوب پھکێں بلۆچے اَت، وتی هبرءِ سرا اۆشتات. په تُرس، په لالچ پُشتا نکنزِت.
1995ءَ، مئے هکومت اَت ءُ زامُران، دشت ءُ تَگرانءَ بازێں جاگهےءَ جالی اۆٹ دَرج کنگ بوت. انچێں جاگهاں که مردمءِ جند نێست‌اَت، اۆدا هم بێکساس اۆٹ دَرج کنگ بوت، په داندلیءَ. ما الیکشن کمیشن آف بلۆچستانءَ درخاست دات که اے چه اۆٹر لسٹاں باید اِنت در کنگ ببنت. همے واستا بلۆچستانءِ سوبائی الیکشن کمشنر فرحت الله بابر چه کوئٹهءَ اَتک. مند ءُ تمپءَ شت. پدا ایوبءَ وتی گاڑیءَ سوار کت ءُ بلیدهءَ برگا اَت‌ئےِ. 22 نومبر 1995 اَت. بلیدهءِ کۆهاں مردماں سنگر گپتگ‌اَت، تیرگواری‌اش کت ءُ ایوب ءُ فرحت الله همدا جنگ بوتنت.
ایوبءِ جند وَ بَدواهاں کُشت، بلے ایوبءِ سیاست ءُ آئیءِ سیاسی اسولانی کاتِل کئے اِنت؟ آ سیاست که ایوبءَ گۆں وتی همراهاں بُنگێج کتگ‌اَت، اسولانی سرا اَت. ایوب تاں مُرت ءُ شت، وتی کردارئےِ پۆلنگ نکُت. پد چه آئیءَ آئیءِ کَس ءُ دگه بازێں همراه ءُ همسپرےءَ آ راه یله داتگ. ایمانداریءِ جاگه مۆکه‌پرستیءَ گِپتگ، مخلسیءِ جاگه زَرّ ءُ لالچءَ، ءُ دلێریءِ جاگه چاپلوسیءَ. من دلجم آں که اے جاوَرانی گِندگا ایوبءِ ارواہ تکانسر ءُ ناراھت اِنت که آئیءِ پُشپد گۆں آئیءِ وتنءَ، گۆں آئیءِ مهلوکءَ چے کنگا اِنت.
Akram Dashti is a senior nationalist politician from Balochistan. In a political career spanning more than three decades, he has held important positions, including that of Minister of Information in Balochistan and Speaker of the Balochistan Assembly. He has also served as a senator.
Dashti has authored three books. He lives in Kech.
