ہر سال دُنیاءِ سیاسیءُ مالی گل ہمے ودارءَ اَنت کہ کدی مستریں جہانی خطرہانی رپورٹ درکئیتءُ آ وتی سیاسیءُ مالی پالیساں ہماہانی ہسابءَ بہ ٹہیننت۔ چہ ہمے مستیریں گلاں یکے ورلڈ ایکونومک فورَم اِنت کہ وتی سالی رپورٹ ”گلوبل رِسک رپورٹ“ءَ شنگ کنت۔ اے رپورٹ مالی، ماحولیاتی، جیوپولیٹکل، چاگردیءُ ٹیکنولوجیکل خطرہاں جاہ کاریت، ٹپاسیتءُ پدا شنگ کنت۔
دوہزارہَژدَہءِ گلوبل رسک رپورٹ انگہ شنگ نہ بوتگ۔
دوہزارہَبدہءِ مستریں خطرہ اے بوتگ اَنت
مزنیں تباہی آروکیں سِلاہ، بِزاں ویپن آف ماس ڈسٹرکشن
دُنیاءِ تہا یک ترسے مُدام اَست اِنت کہ اگاں جنگے بہ بیت تہ لہتیں ملک انچین اَنت کہ دومیءِ ہلاپءَ مزنیں تباہی آروکیں سِلاہ کار بَست کننت، چو کہ میزائلءُ نیوکلربمب۔ اگاں چُش بوت تہ جہانءِ تہا سکیں مزنیں جانیءُ مالی تاوان ہم بیتءُ جہانءِ سرا دگہ ہم بازیں تاوان کپنت۔ آ ملک کہ اے رنگیں کار اِش پِر جنت، گیشتر، گوریچانی کوریاءُ ایران گُشَگ بنت۔
مزنیں قُدرتی تباہی
دُنیاءِ موسم تیزیءَ بدل بوان اِنت۔ ہارءُ سیلاب، گواتءُ طوفان، زمین جُمب، سونامیءُ دگہ چشیں قدرتی آفتءِ تُرس باز اِنت کہ چراہاں مزنیں کچےءَ تباہی آتک کنت۔ اے رنگیں تباہیانی مالی، چاگردیءُ سیاسی اثر سک باز اَنتءُ چہ اے رنگیں جاورےءَ درآہگ، یا اشیءِ نُکسانءَ را کمءَ چہ کَم کنگءِ واستا دُنیاءِ مُلک ءُ کارپوریشناں مزنیں کچّےءَ زرّ جنگی اِنت۔
زوریں لڈّءُ بار
دُنیاءِ تہا چہ مستریں جیڑہاں یکے اش اِنت کہ مہلوکءَ جنگءُ جدَلانی سوَبءَ وتی لوگءُ مُلک پہ نادِلکَشّی یلہ دئیگ کپیتءُ دگہ مُلکءُ جاگہاں پناہ زورگ کپیت۔ اے لَڈّءُ بارانی مستریں سوَب جنگ اَنت۔ انچو کہ میان رودراتک بزاں مڈل ایسٹءَ، جنگءِ سوَبءَ مزنیں مہلوکےءَ وتی مُلک یلہ داتءُ یورپءُ اے دگہ مُلکاں پناہ ئِے زُرت۔ پناہ گیرانی جیڑہ، انّوں دُنیاہءِ تہا مستریں جیڑہ اِنت۔
آپءِ جیڑہ
دُنیاءِ تہا چہ مستریں جیڑہاں یکے آپ نہ بُوّگءِ جیڑہ اِنت۔ آپ روچ پہ وچ کم بوان اِنت۔ چہ اشیءِ سوَبءَ ہم مزنیں جنگانی چست بوّگءِ گُمان اِنت۔ گوادرءِ آپءِ جیڑہءَ ما درست سرپدیں، بلے ما بزانیں کہ اے جیڑہ جہانی جیڑہےءُ دُنیاءِ شَرّیں مُلکانی بجٹءِ مزنیں بہرے پہ وتی مہلوکءِ آپءِ پُجّارینگءَ ہرچ بیت۔
گُلوبل وارمنگ
زمین، روچ پہ روچ گرم تِر بُوّان اِنت۔ اے گرمیءِ سوَب گرین ہائوس گیس انت، بزاں ہمے دوت کہ مشیناں درآہگا انت، اے زمینءِ قدرتی گرمءُ سردیءِ نظامءَ ہراب کنگا انت۔
مزنیں کچّےءِ ڈیٹاءِ دُزّیءُ ڈیٹا فراڈ
مئے انّوگیں جہانءِ مستریں دارءُ مدار ڈیٹاءِ سرا اِنت۔ ڈیٹا، ہما مالومداریءُ انفارمیشن اَنت کہ کمپیوٹرءُ دگہ جاگہاں ایر اَنت۔ گورنمنٹ بہ بیت یا مالی، سیاسی گَلءُ دگہ ادارہ، ہمے ڈیٹاءِ بُنیادءَ فیصلہ سازیءُ کار کننت۔ ڈیٹا مہ بیت، کارءُ بار نہ بیت۔ ڈیٹا مہ بیت، سرکار وتی بجٹءَ جوڑ کُت نہ کنت۔ پولیس، عوامءَ پَجاہ آورت نہ کنت۔ ہمے ہسابءَ ڈیٹاءِ دُزی ہم مزنیں تُرسے۔ ہیکرز، بینکانی کارڈ نبمراں دُزی کننتءُ چہ بینکاں کروڑانی ہسابءَ زَرّ در کننت۔ مُلک، بینکءُ اے دگہ گل، ہمے چیزءِ سرا مزنیں زَرّے جنگا اَنت کہ آہانی ڈیٹا دُزّگ، یا ڈیٹا غلط کنگ بوت مہ کنت۔
دہشتگردانی اُرُش
دُنیاءِ تہا یک مزنیں جیڑہے دہشتگردی اِنت۔ دہشتگردیءِ سوَبءَ مزنیں مالی، جانی، چاگردیءُ سیاسی تباہی اتک کنت۔ بازیں مُلکانی سیاسی استحکام ہم تباہ بوت کنت، انچو کہ عراق داعشءَ تباہ کُت۔
چہ اِشاں ابید دگہ مزنیں خطرہ ہم اَست۔ بے روزگاری، مالی نا برابریءُ بیماری ہم
مزنیں خطرہ اَنت۔
