جہاندپتر: کوہنیں مصر

15

ماہو،

ما وتی گوستگیں کاگد ءِ تہا گپ ءَ اتیں کہ فرانس ءِ ہاکُم نپولین بوناپارٹ 1797 ءَ یک ٹوہیں لشکرے زوریت ءُ دیم پہ مصر ءَ روت۔ نپولین ہمے لشکر ءِ تہا بازیں زانتکارے ہم وتی ہمراہی ءَ بارت گوں۔ ایشانی تہا یکے ڈینون بیت۔ چد ءُ پیش ڈینون یک سفیر ے ہم بوتگ۔ آ کوہنکدگانی ہمنچو باز اَکس کشیت کہ رندا یکیں کتاب ءِ دو جلد شنگ کنت۔ ما اے ہم نام گپتگ اَت کہ ڈینون بازیں پلیٹ یے ہم وتی گوما فرانس ءَ کاریت گوں۔ ہمے پلیٹانی سرا بازیں نَکشءُ نگارءُ بازیں چیزے نبشتہ بیت۔ بلے جیڑہ اِش بیت کہ کس نزانت کہ اے کجام زبان ءَ نویستگ اَنت۔ ڈینون اے ہم درگیجیت کہ اے نبشتگیں لبز سے قسم ءَ انت کہ گشاں۔ نوں ما اشاں ہیروگلیپک، ہیراٹک ءُ ڈیموٹک گُشیں۔

ہیروگلیپک کوہنیں مصر ءِ نبشتہ ءِ رہبندے۔ اے نبشتہ رہبند ءِ تہا چُش بوتہ کہ ہرچی کہ نبشتہ کنگی بوتہ ، یا سنگ ءِ سرا آ چیز ءِ اَکس جوڑ کنگ بوتہ۔ اے لوگو ءِ رنگ ءَ جننت۔ پہ درور جہل ءِ اکس ءَ بچارِت۔

ہیراٹک ہم کوہنیں مصر ءِ نبشتہ رہبند ے۔ اے گوں سیاہی ءَ بزینءُ جوانیں تاکانی سرا نبشتہ کنگ بوتہ۔ ہیراٹک ءِ تہا ہَرف نبشتہ کنگ بوتہءُ جلدی جلدی نبشتہ کنگ ءِ واستا کارمرز کنگ بوتہ۔ ہیراٹک نبشتہ رہبند ءَ ہرف یا اَکس گوں یکے دومی ءَ ہوار کنگءُ نبشتہ کنگ بوتگ اَنت۔

کوپٹک، مصر ءِ یک کوہنیں زبانے کہ چہ ہیروگلیپک ءُ ڈیموٹک زبان ءَ نوکتراِنت۔ کوپٹک ءِ باز ہَرف چہ یونانی زبان ءَ زورگ بوتہ ءُ لہتیں چہ ڈیموٹک ءَ زورگ بوتہ۔ اشی ءِ نبشتہ ءِ بندات چہ اولی سدی عیسوئی ءَ بیت۔ اے زبان تا سینزدہمی سدی ءَ مصر ءَ گپ کنگ بیت بلے رندا عربی اشی ءِ جاگہہ ءَ گیپت۔ اے انگتہ مصر ءِ کوپٹک چرچ ءِ زبان اِنت۔

ڈینون ءِ کتا ب کہ شنگ بیت گڑا بازیں مردمے ہمے نبشتہاں سرپد بوگ ءِ جہد ءَ بنگیج کنت۔ اے رد ءَ سویڈن زبانزانتے روسیٹا اسٹونیو چہ درستاں گیش سوبمند بیت۔ 1814 ءَ انگلستان ءَ اتکگیں تھامس ینگ وہدے روسیٹا ءِ نبشتہاں وانیت آ کوپٹک علامتانی گیشتری نیم ءَ مانا کنگا سوبین بیت۔

 

گڈی ءُ مستریں کامیابی فرانس ءِ مردم جین فرانکوس چمپولین ءَ رسیت۔ آئی ءَ گوں رودراتکی زباناں سک باز مہر بیتءُ سرجمیں ہیروگلیپک نبشتانک، کہ آ وہدا دست کپتگ اَنت، درستاں وانیت۔ اے درگت ءَ آ سک باز جہد کنت ءُ چہ وتی مرگ ءَ پیش 1824 ءَ وتی کتاب ءَ شنگ کنت۔ کتاب ءِ تہا ہیروگلیپک رہبند ءِ سرا گوں سک باز شاہگانی ءَ تران کنت۔ چہ اے کار ءَ رند اِندگہ تاریخدان ءُ زانتکارانی واستا مصر ءِ کوہنیں تاریخ ءِ سرا پٹءُ پول کنگ ءِ راہءُ در سک باز اَرزان تر بنت۔

ہمے مردمءُ چہ اشاں رندی مردمانی جہدانی برکت ءَ مرچی ما سرپد بئیں کہ مصر ءِ کہنیں تہذیب چہ مسیح ءَ کساس 3000 سال پیش بندات بوتگ۔ تاریخدان کوہنیں مصر ءَ سے دوراں بہر کننت

کوہنیں بادشاہی دو ر 2635 تا 2155

میانی بادشاہی دور 2060 تا 1700

نوکیں بادشاہی دور 1554 تا 1080

ہاندانی بادشاہی دور ءِ بنگیجءُ مصر ءِ یکجائی:

چہ عیسیٰ ءَ کساس سے ہزار یا سے ہزارءُ یکسد سال پیش، مصر دوبہر ءَ بیتءُ دو ملک بیت۔ یک ملکے برزی مصرءُ دومی ملک جہلی مصر ءِ نام ءَ زانگ بیت۔ ہر دوئیناں وتی وتی بادشاہ بوتگ۔ کوہنیں مصر ءَ بادشاہ ءِ باروا مدام گشگ بوتگ کہ بادشاہ ءَ را آزمانی تاکت گون۔ باز وہدا وَ مردماں گُشتہ کہ بادشاہ وت ہدا ءِ جند اِنتءُ آپ، گوات، پیداوار درستیں چیز بادشاہ ءِ ہُکم ءِ پابند اَنت۔ مردماں بادشاہ جادوگرے ہم تصور کتہ۔ ہمے تاکت ءِ لیکہہ بوتہ کہ بادشاہ سرجمیں زند ءِ مات دار گشگ بوتہ۔

کوہنیں مصر ءَ یک رسمے بوتہ۔ اگاں مردماں دیستہ کہ بادشاہ ءِ تاکت نزور تران اِنتءُ ریاستءُ مردمانی لوٹاں پیلو کنگا نہ اِنت گڑا مردم مچ بوتگ اَنتءُ بادشاہ گپتگءُ زندگ ءَ کل کتہ۔ ہمے مردماں پدا نوکیں بادشاہے تہت ءِ سرا نادینتہ۔ اے رسمے بوتہ کہ اشی ءَ را فیسٹیوَل آف سیڈ گَشگ بوتہءُ اے رسم ہر بادشاہ ءِ بادشاہی ءِ سی سال سرجم کنگ ءِ وہدا کنگ بوتہ۔ چرے گپاں زانگ بیت کہ کوہنیں مصر ءَ زندگی ءَ شرک ءُ پالانی مزنیں اثرے بیتہ۔

کوہنیں مصر ءِ تہا مستریں تاریخی سیاسی واکیہ ہمدا کئیت کہ سنہ 3000 یا 3100 ءِ برزی مصر ءِ بادشاہ مینیز، جہلی مصر ءِ سرا اُرش کنتءُ ملک ءَ ایردست کنت۔ چہ ہمدا دوئیں مصر یکجاگہ کنگ بنتءُ ہاندانی بادشاہی دور ہم چہ ہمدا بندات بیت۔ دنیگہ زانتکاراں چشیں چیزے دست نہ کپتہ کہ گشت بکننت کہ چہ مینیز ءَ پیش ہم بادشاہ ءِ مرگ ءِ صورت ءَ بادشاہ ءِ چک یا برات یا دگہ وارثے ءِ بادشاہ کنگ ءِ رسمے بوتہ۔

گشادکاری ءِ نظام:

نیل ءِ کوردنیا ءِ مستریں کوراں ہساب بیت کہ مصر ءَ انت۔ اشی ءِ برکت ءَ ایوکا مصر سیراب نہ بوتہ، بلکنہ لانچانی سرا یک جاہءُ دومی جاگہہ رؤگ ءِ ہم آسراتی بوتگ۔ یک مزنیں ریاستے ءِ گرءُ دار ءِ واستا لازم اِنت کہ ٹرانسپورٹیشن ءِ نظام جوان بہ بیت۔ نیل ءِ کور کساس سرجمیں مصرءَ تچیت۔ پمے واستا مینیزہما زمانگ ءَ ہم یک انچیں مزنیں ریاستے ءِ چار ءُ دلگوش ءَ پہ جوانی ءِ سرا کت کنت کہ آئی ءِ درستیں وس ءُ واک یک مرکزے ءِ دست ءَ انت۔ دومی وجہ ایش بیت کہ مصر یک وانندگیں ریاستے بیت ء ُ کارگشادی ءِ نظام وانندگیں مردمانی دست ءَ یت ۔ اے گپ ہم دلگوش کرزیت کہ کوہنیں مصر ءَ وانندگیں مردمان ءَ سک باز شرپ دیگ بوتگ۔

انتظامی ہساب ءَ مصر شش سرکاری افسر ءِ دست ءَ بوتہ کہ ہرکس ءَ وتی کار دلگوش کتگ اَنت:

اولی ادارہ ءَ عدالتی نظام ءِ چارءُ دلگوش کتہ۔ انچو گشنت کہ اے کار ءِ واستا سرجمیں مصر ءَ شش عدالت بوتگ اَنت۔

دومی ادارہ ءَ سرکاری ریکارڈ انی نبشتہءُ حفاظت کنگ ءِ کار گون بوتہ۔

سیمی ادارہ ءَ روزگار ءِ انتظام دست ءَ بوتہ۔ اے ادارہ ءِ زمہ واری بوتہ کہ کشتءُ کشار ، بان بندگ، لشکرکشی ءِ واستا پوریاگرءُ قابلیں مردمانی بندو بست ءَ بکنت۔

چارُمی ادارہ ءِ کار وَردِن ءِ امبارانی دلگوش کنگ بوتہ۔ اشانی مستریں ترساں یکے اے بوتہ کہ سرکار ءِ امبارانی تہا ہمنچوتوشگ بہ بیت کہ اگاں ڈُکّالے کپت تہ مہلونک شُد ءَ مہ مریتءُ ہمے ڈُکّالیں سال پہ ایمنی بگوزنت۔ اشانی دگہ کارے اے بوتگ کہ اگاں ملک ءَ جنگے سر ءَ بِکپیت تہ لشکر ءِ ورگ ءِ واستا وردن ءِ کمی مہ بیت۔

مصر ءِ ہمے زمانگ ءِ ہشکسالی ءِ سرا یک مزنیں کسہے اَست کہ یوسف ءُ زلیخہ ءِ کسہ گشگ بیت۔ وہدے ما کسان بوتگیں، مئے بلک جان بی بی ءَ مدام سرشپ ءَ ہمے کسہ آورتگ۔ اے کسّہ ہمے کوہنیں زمانگ ءِ مصر ءِ سرا اِنت۔ اے کسّہ ءِ تہا چے دروگءُ چے راست، من نزاناں، بلے یک گپے اَست اِنت کہ اے کسّہ مارا ہما زمانگءُ مردمانی زند ءِ اَکس کشی یے کنتءُ دنت۔

پنچمی ادارہ خزانہ ءِ ادارہ اِنت۔ ایشی ءِ کار مالیات گرگ بوتہ۔ ہر کس ءَ را کہ زاتی مالءُ دلوَت یا زمین بوتہ سرکار ءَ چراہاں مالیات گپتہ۔ زانتکار انچو گُشنت کہ چو کہ مصر یک مرکزی بادشاہی ملکے بوتہ یک مزنیں مرکزی مالیانی ادارہے درالحکومت ءَ ہم بوتگ۔ ایشی ءِ کار چہ دور ءُ دراجیں میتگ ءُ شہراں مالیات گِرگ بوتہ۔

ششمیءُ زورآورتریں ادارہ وزیرانی بوتہ۔ ہر وزیر ءِ دست ءِ چیرا یک ہاسیں کارے بوتہ۔ گیشتر وزیر بادشاہ ءِ وتی ہاندان ءِ مردم بوتگ اَنت۔ بازیں بادشاہے وت ہم پیسرا وزیر بوتگءُ رَندا بادشاہ۔ وزیر ءِ کرد چہ بادشاہ ءِ کرد ءَ رَند کئیت۔ ما گشت کنیں کہ سرجمیں مصر ءِ ہاکمی ءِ انتزام وزیرانی دست ءَ بوتگ۔

ریاست ءِ مستربادشاہ وت بوتہ۔ انچو کہ ما پیسرا گشتگ اَت کہ بادشاہ واجہ ہُدا ءِ جند لیکگ بوتگ۔

چاگردی طبقہ:

کوہنیں مصر ءِ چاگرد ءِ تہا طبقہ نسلی نہ بوتگ اَنت، مالی بوتگ اَنت۔ نسلی طبقاتی نظام ءِ تہا مردم کہ پیداک بیت ہما طبقہ ءِ تہا اِنت داں بمریت انگہ ہمے طبقہ ءِ تہا بیت۔ بلے مالی طبقاتی نظام چو نہ اِنت۔ ایشی ءِ تہا اگاں کسے ءِ مالی جاور گہتر بہ بنت، تہ آ چہ یک طبقہ ءَ دومی طبقہ ءِ تہا روت۔

بادشاہ ءِ ہاندان مستریں طبقہ لیکگ بوتہ۔ چہ اشی ءَ رَند نواب بوتگ اَنتءُ بازیں وزیر چہ ہمے طبقہ ءَ بوتگ اَنت۔ وانندگیں مردمانی سک باز عزت کنگ بوتہ۔ اگاں کسے پوریاگرے بوتہ بلے آئی ءِ چک ءَ ونتہ ءُ لائق بوتہ گڑا آ چہ یک طبقہ ءَ دومی طبقہ ءَ شتہ۔

دہکانانی ہالت سک شر نہ بوتہ۔ چو کہ مصر ءِ تہذیب یک زرعی تہذیبے بوتہ، گیشترمردمانی کار زمینانی کشگءُ رون ءُ موش بوتہ۔

کوہنیں مصر ءِ تہا گلام جہلتریں طبقہ ءِ مردم اَنت۔ نسلی ہساب ءَ کس گلام کنگ نہ بوتہ۔ گیشترگلام جنگی قیدی بوتگ اَنت۔ بلے اگاں گلام ءِ مالی جاور بدل بوتگ اَنت یا وانگءُ زانگ ءَ زبر بوتہ گڑا آئی طبقہ ہم بدل بوتہ۔

ما دگہ یک چیزے کوہنیں مصر ءِ تہا گندیں کہ قانون ءِ چماں گلاماں ابید اِندگہ درستیں مردم برابر اَنت۔ بادشاہ ءِ زمہ واریانی تہا یکے اے بوتہ کہ آ درستیں مردمانی حفاظت ءَ بکنت۔ گلاماں ہم اے حق بوتہ کہ وزیر ءِ دروازگ ءَ بُٹکّ اَنتءُ وتی اَرز ءَ آئی ءَ سر بکننت۔ گپ ءَ اگاں گونڈ بگرئےءُ اے بگوش ئے کہ ریاست ءِ زمہ واری بوتہ کہ وتی مہلوک ءِ جان سلامتیءُ حقانی حفاظت ءَ بکنت گڑا اے گپ دروگ نہ بیت۔

پیرامڈز: Pyramids

مصری تہذیب ءَ بلکیں انسانی تہذیب ءِ رُدوم ءِ واستا بازیں چیزے داتہ، بلے چرے درہیں چیزاں مسترینءُ جوانتریں چیز مصر ءِ مزنءُ دراجیں پیرامڈ اَنت۔ مرچی ہم ایشانی گندگ ءَ مردم ءِ عقل ہیران بیت کہ کساس پنچ ہزار سال پیش انسان ءَ اے بلاہیں پیرامڈ چون بستگ اَنت۔

مصر ءِ تہا کُل 35 مزنینءُ دگے بازیں کسانیں پیرامڈ است۔ بلے ایشانی تہا مستریں پیرامڈ سے انت کہ گزا ءِ دمگ ءَ مک اَنت۔ اے درستیں پیرامڈانی تہا بادشاہ ( کہ فرعون یا فیروا گُشگ بوتگ انت) کلّ اَنت۔ ما انچو کہ گشتگہ کوْہنیں مصر ءَ بادشاہ ہدائی بستار ءِ واہند بوتگ انت۔ آیاں ہمے لیکتگ کہ بادشاہ ءِ مرگ ءَ رند بدن نہ مریت، بلکنہ یک روچے کہ آئی ءَ وتی ہلاس بوتگیں ہدائی تاکت دوبر رسیت تہ بادشاہ پدا پاد کئیتءُ زندگ بیت۔ ہمے واستا مصریاں مردگیں بادشاہ ءِ بدن ءِ دو ا ءُ درمان جتہ ءُ ممی جوڑکتہ کہ مہ سَڑیت۔ چوناہی ءَ ہرکس کہ مصر ءَ مرتگ گڑا ریکانی ٹل ءِ تہا کبر کنگ بوتہ۔ گرمیں ریکاں جسم پتکگءُ ہراب بوہگ ءَ نئیشتہ۔ رند ترا سیریں مردماں ہمے ریکانی ٹُل سنگ بند کتگ اَنت۔ چو کہ بادشاہ سیرتریں مردم بوتہ، آئی ءَ وتی زند ءَ وتی ریکانی ٹل سنگ بند کتہ۔ ہمے مزنیں ریک ءِ ٹلانی سنگبندیں بان ءَ پیرامڈ گشنت۔

اے پیرامڈ انجینیرنگ ءِ مزنیں شاہکار اَنت۔ انگتہ مزنیں زانتکار ہیران اَنت کہ اے مزن مزنیں سنگ چون تراشگءُ آرگ بوتگ اَنت ءُ پدا چون مک کنگ بوتگ اَنت۔ چنچو مردماں ایشانی بندگ ءِ واستا کار کتہ۔ چنچو سال ءَ یکے تیار بوتہ۔ اے درستیں سوالانی جواباں انگہ کس پہ دلجمی دات نہ کنت۔

مصری تہذیب ءِ زوال:

دُنیا ءِ درستیں تہذیب، تری اَنوگیں بہ بنت یا کوہنیں، اے درُستانی تہا یک یکی یے گندگ بیت، کہ تہذیب چو انسان ءِ پیما وَدی بنت، رُدنت، مزن بنتءُ پدا مرنت۔ بلے وتی کتگیں کاراں وتیءُ دگہ نسلانی واستا ایر کننتءُ جنزنت۔

ہمے ہساب ءَ مصری تہذیب کہ 3000 پیش مسیح ءَ ودی بیت، گام جنان کنت، وتی تاکت ءِ مزنی ءَ سر بیتءُ میزان میزان ءَ زوال ءِ نیمگ ءَ روان کنت۔ انچو کہ درستیں انسانانی مرگ ءَ یک یا چہ یکے ءَ گیش سبب بیت،ہمے ہساب ءَ مصری تہذیب ءِ زوالی ءِ وتی سبب اَنت۔

مصری تہذیب ءِ زوال ءِ سبب دَری تہذیبانی مصر ءِ سرا اُرش کنگ اِنت۔ اے اُرش کساس ہزار سال پیش مسیح ءَ بندات بنت۔ بندات ءَ لیبیا ءِ بازیں ٹکے مصر ءِ سیمسری دمگانی سرا اُرُش کنت۔ اے اُرُش بازیں وہدے روا ن بنتءُ سک باز تاوان دئینت۔

سوریائی تہذیب کہ مصر ءِ سیمسراں بیت، اے زمانگ ءَ چہ دنیا ءِ تاکتورتریں تہذیباں یکے بیت۔ اے ہم مصر ءِ گوما سدانی سال ءَ جنگ ءَ بیت۔ ہمے جنگاں مصر ءَ بازیں مالیءُ جانی تاوان بیت۔ چہ دہمی سدی پیش مسیح ءَ اے دیم سوریا ءِ جہد بیت کہ لیوانٹ ءِ زرخیزیں زمیناں بگیپت۔ لیوانٹ مرچیگیں سوریا ءِ کساس ہمے جاگہہ انت کہ داعش ءَ گپتگ۔ لیوانٹ چہ مصر ءَ کمک لوٹیت۔ مصربازیں جنگ ءَ باج بارت، بلے اے جنگ مصر ءَ سک باز تاوان دئینت۔

525 پیش مسیح ءَ ایران مصر ءَ پرْوش دنت ءُ وتی بہرے جوڑ کنت۔ کساس سد سال ءِ ہاکمی رند بے جنگ ءُ داوا ءَ آ مصر ءَ سکندر اعظم ءِ دست ءَ دینت۔ چہ ہمدا مصر ءِ یونان ءِ ہاکمی بندات بیت۔ سکندر نوکیں دارالحکومتے جوڑ کنت ءُ نام ءِ اسکندریہ کنت۔
30 سال پیش مسیح ءَ روم کہ آ وہداں دنیا ءِ مستریں ریاست بیت، مصر ءَ چہ یونانیاں پچ گیپت ءُ وتی بہرے جوڑ کنت۔

رندا ما گندیں کہ اولی سدی عیسوئی ءَ عیسایت مصر ءِ کوہنیں رسمءُ رواجاں کہ لپاشان کنت ءُ مردماں لہتیں پہ زور، لہتیں پہ لالچءُ تبلیغ ءَ عیسائی جوڑ کنت، مصر ءِ مردم وتی ہزاراں سال ءِ دود ءُ ربیدگاںءُ شرک ءُ پالاں وتی کافری ( کہ عیسائیاں آ وہدا مصری کافر گشتگ اَنت) ءَ برجاہ دارگ ءِ بازیں جہدے کننت،بلے درآمد زورتر بنتءُ میزان میزان ءَ مصر عیسائیت ءِ نیمگا ایر بُکّان بیت۔ ایشی ءِ گوما ہما درستیں رواج ہم گار بوان بنت کہ ما مرچی بس نبشتہی رنگ ءَ گندان اِشءُ ہما ہزاراں سالانی گاریں مصر ءَ درگیجگ ءِ جہد ءَ کناں۔
مصری عرب بوت انت۔

ماہو! اگاں مصری تہذیب ءَ نبشتہ مزانتیں، مرچی بلکنہ ما ایشانی بابت ءَ ہچ نزانتگ اتءُ ایوکا پیرامڈ دیستگءُ ابکہءُ ہیرانی ءَ چارتگ اتنت۔

+ posts