دلگوش: ما بلوچ نبشتہ کارانی گچینے کَم کَمّا شنگ کنگا ایں۔ عطائے اے شئیر ہمے گچینئے بہرے۔
کَدّہئے سَررِچَگ مَرکا اَرزاں نَکنت
(گوں یَک پرانسیسی ہِپّیےءَ نِند و نْیادے)
سارترئے شَہرئے پِنڈوک
کلدار و نیمئے ہَشیش آکِبَت سوچیں ایوکّیا
تَنکَدا آسَریت؟
زندئے اے بَندیجاھا
کہ ہوشام وت یَک خُمارے
کَدّہئے سَررِچَگ مَرکا اَرزاں نَکنت
مَرے ”ماہ‌سازیں“ جہانا
کہ مہزَب گْوشئے پیریئے دانک اِنت
لَرزگا اِنت دپا
زند بے منزلا
پہ دِلا
یک اَزابے کہ بے مِنّت اِنت اچ خمار
سارترئے شَہر کہ جُلگہ اِنت
تَنگہ‌مَلگور، زِرچَمّ، گینی بدن دلبرانی
(ہَمّلئے چم‌خمارانی مَٹّ اَنت یا کہ نہ اَنت)
اِشکتگ ما کہ اَمبازگئے جنّت اِش
چُش گُنہگارَ کنت
کہ دل پہ ہُدایی بَہشتا نَکشّیت
و پہ گُلاماں گَم اِنت
کہ پہ ما ہمک رنگ ”مادام کاووکیئے“ ترانگا زَگرَ کنت
ما ویئیتنامی گُلام
جئیکلینا نزاناں
ائیشیازادَگانی نسیب
سارترئے جُلگہ‌تہنائیں بے آکِبتّیں شپ و روچ۔۔۔
چَم پہ کِبلہی سُہرپوست
بے اوست
ما کہ ماجین و بَنگئے وداریگ
برادَرکُش و جان‌دوست
میر مئے راہ‌سپار
آجویئے سر و سرمچار۔۔۔ اُگدہ‌دار
ما چو ہما مُردَگا۔۔۔ کہ ”پُرس“ ہم مئیار
بیا کہ تئو بے ہَشیشا
و من بے شَراب
گوں یک دِگر
کیامت آروکیں ہوشاما
پہ ائیشیایی گُلامانی ناما بِتنگاں
مَرے ”ماہ‌سازیں“ جہانا
وتی جُلگہ‌تہنائیں بے آکِبتّیں شپ و روچاں
آجویئے کُشتگیناں پہ کُرباں کناں
وت وتارا بِشَرمیناں
