په بلۆچ جُنزءِ پرۆشگءَ وَتگڑێں مُلّا باز برا دێما آرگ بوتگ‌اَنت ءُ مزهبی کارڈ اِستمال کنگ بوته. بلۆچءِ مزهبی اَڑ ءُ کُڑ نۆکێں گپّے نه‌اِنت. مُلّاهاں زِگری بد ءُ رَد کتگ‌اَنت، جتگ‌اَنت، کۆهِ مراد بےاهترام کته، ”زگری کافر“ ءِ ناره جته.
اے کار دراهێں مُلاّهاں نَکُته، سرکارءَ وتی مُلّا کار بستگ‌اَنت. بلے ما مُدام اِجتمائی سورتءَ سجّهێں مُلّاهاں ٹارگٹ کنێں.
انچۆ که مزهبی جنگ ریاستءِ کارءِ دێما برَگ اِنت، ھمے پئیم اِجتمائی سورتءَ بلۆچ مُلّاهانی بد گُشگ هم وڑے نه وڑے ریاستءِ گپّءِ دێما برگ ءُ ناتپاکیءِ گێش کنگ اِنت.
تربتءَ ورنائێں ٹیچرے ھمے انتهاپسُندیءِ هَرجاں بوت. درستێں ھانوادَھێں مردم اے امَلءَ اێر جنگا اَنت، اێر جنَگ کرزیت هم. شئوکترێں گپّ اِش اِنت که بلۆچ نوں زانتکار اِنت. کاتلءَ پَجّاه کاریت ءُ اێر هم جنت.
بلے بازێنے گُشیت اِشیءِ سئوَب جماعت اِسلامیءِ ”اِسٹْریٹ‌پاوَر“ اِنت. اے مردم گُشنت اے انتهاپسُندی همے زمانگءَ مهکم بوّان اِنت که جماعت مکُّرانءَ سرگرم اِنت. بلے چه جماعتءِ آهگا پێش هم اِدا ڈیتھ‌اِسکْواڈ بوته. ھزاراں مردم‌اِش کُشته، ھزاراں بێگواه کُته.
اے ڈیتھ‌اسکواڈ اَنت ءُ مُلّا اَنت. بلے ڈیتھ‌اسکواڈ تهنا مُلاّ نه‌اَنت. ڈیتھ‌اسکواڈءِ شکل باز اَنت. هما تاکت که بلۆچستانءَ کئوم‌پرستیءِ نامءَ ریاستءِ پالیسیاں دێما برگا اَنت، آهانی مزنێں بهرے هم ڈیتھ‌اسکواڈ اِنت. میر ءُ سرداراں اینچو زۆراکی کته، اِشاں هم همے کار کته. اگاں هر اے دابێں جێڑهءِ سرا چاگردءِ یک بهرے ٹارگٹ کنگ بیت، گڑا سرجمێں بلۆچ کاتِل اَنت؟ پرچا که ڈیتھ‌اسکواڈانی مردم هم بلۆچ اَنت.
اَسلءَ جێڑه یک اُستادےءِ کۆش نه‌اِنت. هبر اِش اِنت که تئی سرا مُشتگێں اِنتهاپَسُندی چینچو تاکت‌وَر اِنت، رۆتگ‌ئےِ تئی چاگردءَ چینچو جُهل اَنت.
مزهبی اِنتهاپسندی مئے ھمساھگێں راجاں سَک کارمرز کته. مرچی آهانی ”مُلّا“ هم اِشیءِ اسرءَ نرَکّتگ‌اَنت. اگاں اے رندی ما برداشت کت، باندا ما هم اَنچۆ بێں.
مزھبءِ سرا بلۆچ ءُ سندھیءِ ربیَت کمّ ءُ گێش یک پئیم اَنت. سندھءَ بلاھێں کچّےءَ ھندو جهمنند اَنت، بلے مرچی ترپارکر ءُ دگه مێتگاں ھندو جنِکّ چِست کنگ، سانگ کنگ ءُ په زۆر مُسلمان کنگ بوّگا اَنت. اِنتهاپسندی الّم نه‌اِنت که هر جاگه یکّێں شکلءَ ببیت. رؤفءِ کۆش هم مزهبی انتهاپسندی‌یے ءُ ھندو جنِکّےءِ په زۆر سانگ کنگ ءُ مزهبءِ مَٹّ کنگ ھم.
رئوفءِ کُشنده چێا ”نامعلوم“ اَنت؟ مهلوک کاتِلاں پجّاه کاریت، گڑا سرکارِش چێا کُشنده نَلێکیت؟ اے گپّ زاهر کنت که اِشانی تاکت دئیۆک کئے اِنت.
باز گُشیت که چه انتهاپسندیءَ ریاستءَرا چے نپ رسیت؟ بلۆچ جُنز ببیت یا چاگرد، راجدۆستیءِ سان هر چیزّءَ مان اِنت. بلۆچ چه مزهبی پرکاں بالاتر اِنت. ریاست ترا مزهبءِ نامءَ بھر ءُ بانگ کنگ لۆٹیت که مهلوک وتکۆش ببیت ءُ چه وتی ھۆرێں لۆٹءَ گِسر ببیت.
رئوف یک کارستے. رئوفءَ مارا، پَشت کپتگێں مردمانءَ، اے مسلهءِ سرا باوَست کنگ ءُ اِشیءَرا چه بُنءَ گْوَجگءِ ماھۆلے داته. مارا یکجاه‌ئےِ کته. نوں ما رئوفءِ نامءِ سرا هۆر بێن ءُ اے رنگێں سجّهێں پرکاں گار کنێں، یا رۆچے گروپے بُهتامانی چێرا کنێن ءُ پدا هامۆش بێں، اے مئے سرا اِنت.
اگاں چه بلوچ راج ءَ گپ جنے گڑا چه مذهب ءَ گپ مه جن، اگاں دین ءُ مذهب ءِ نام بئت گڑا گلگ مه کن که پرچا زگری یا پلان پلان بےدین ءُ بد گوشگ بےانت، هر بنگپے را سیمسرے هست، تو چه وتی حد ءُ کساس ءَ دێمتر ءَ مه رو پرچا که بیت‌کنت گڑا هر رنگے چیز بگندے. پمێشا گهتر انت که هما راجی بنگپانی باروا گپ جنے نه دینی بنگپاں، دینی بن گپ بلوچ راجے سۆرێں کشک انت، من ترا سۆگه کن آں آ کشک ءَ پاد ءِ چێر ءَ مه کن.