ما سنگ‌آبادءَ سنگتےءِ سورءِ داوتءَ شُتگ‌اَتێں. مردےءَ مارا ھال دات که مرچی گُلام نامێں شپانکے سرکارءَ برتگ. دگرےءَ کسّه کت که گلامءِ مات شپادءَ رۆڈءِ سرا اۆشتاتگ ءُ نێم گنۆکیءِ ھالتءَ لبجگا بوتگ که ”منی چُکّش بُرت. منی چُکّ گار اِنت.“ سنگتانی رِدءَ گلام ھُدائی بزّگے، شپانکی‌ئےِ کتگ ءُ وتی مات‌ئےِ لاپ داته. سیاسی یا جنگی چِست ءُ اێری مردمے نه‌اِنت. بلے پئوج که کۆهءَ مان رتکه، گلام‌ئےِ دزگیر کته.
شپءَ که ما تربتءَ سر بوتێں، مارا ھالءَ گپت که سرکارءَ گُلامءِ ژانگۆلێں لاش چگل داته. نه سیاسی گلےءَ گپّے کت، نه ما ٹْویٹرءَ ھیش‌ٹیگے دیست. ھر چیزّ نارمل اَت.
ھُدا بزانت که ماھے چُشێں چُنت کێس ژانگۆل بیت ءُ رئوت.
اے گێشتر ھما مردم اَنت که مئیم نبنت. اے نه شھراں نِشتگ‌اَنت ءُ نه که واننده اَنت. اے مردم حیاتءِ وڑێں وَش‌بَھت ھم نه‌اَنت که اِشانی ھم‌کلاس پرێشاں اِسٹیٹَس یا ھیش‌ٹیگے بجننت یا کَسے اشانی ماتانی اکساں سوشل میڈیاءَ بدنت.
بلۆچستانءَ جنگ اِنت. اِدا برَگ ءُ کُشگ مزنێں ھبرے نه‌اِنت. بلے چۆ بےتئواریءَ اے کسّھانی اندێم بوّگ مردمءَ هئیران کنت. بازێنے گِلّه اِنت که سیاسی گل کُج اَنت؟
بلۆچانی سیاسی گل تھنا ھما کێساں دێما کارنت که چه پێسرا میڈیاءَ اَتکگ‌اَنت. ھما مسله که مردمےءِ کھۆلءَ، سنگتاں یا لس مھلوکءَ میڈیاءَ هائیلائٹ کتگ. مئے گلاں گۆں آ مردماں کار نێست که invisible اَنت، ھما که اِسپاٹ‌لائٹءَ نه‌اَنت. اگاں ترا تھنا میڈیاءِ دێما آورتگێں جێڑه دست جنگی اَنت، گڑا تئی وتی هیسیت چے اِنت؟ بےتئوارێں مردمانی جھگیریءَ کئے کنت؟
ھبر تھل اِنت بله تَچک اِنت. مئے پۆسٹرانی سرا په گُلامءَ جاگه نێست، ءُ نه که مئے پتّرءِ سرا پرائیءِ پیرێں ماتءَ جاگه ھست. آئیءَ باڑه بتّا هم نێست که شالءَ برئوت.
Hassam Baloch is a poet. He studies literature at the University of Turbat.
Rást goshay anchosh ent. Har gal tahná wati mardománi wástá gap jant. Am mardomay kas námá nagipt.