دیریگیں گپّے کہ خیر بخش مری یورپی پولکارے ءَ گُشیت کہ بلوچ ءِ گوْرا مذہب تہنا پیدائش ءُ مَرگ ءِ ساہتاں کار ءَ کئیت۔ چُکّے کہ پیداک بیت مُلا کئیت گوش ءِ بانگے دنت ءُ مردمے مِریت مُلّا جنازہ ءِ وانیت۔ چوناہا پیدائش ءُ مرگ ءِ نیام ءَ ہم مُلّا ءِ کِردے ہست: نکاح ءِ وانَگ۔
بلے مَرچاں مُلّا ءِ بِستار رُستہ۔ جَن ءُ مرد چِہ وڑا وپت ءُ واب بہ کننت، اے اڈ ءَ ہم مُلّا ءِ دست ءُ پاد دوئیں مان اَنت۔ پدا منہ نہ انت مرد ءِ دپ ءَ لبز ء طلاق دربئیت۔ بزاں جَن ءِ سُہن کپتگ انت، ءُ مُلّا ہمے جنین ءِ وت حلالہ کنگ ءِ دیمونی ءِ دیگ ءَ ہم دمان ءَ رازی بیت۔ آئی ءَ چوں برداشت بیت کہ جن ءُ مرد دیر ءَ یکے دومی ءَ گِستا بہ بنت۔
یک رندے مئے بازار ءَ فُٹ بال ءِ ٹورنامنٹے بوگا اَت۔ بَچکے ءَ لاؤڈ اسپیکر دپ ءَ ات ءُ کمنٹری کنگا ات۔ مَسیت ءِ پیش امام ءَ کہ عصر ءِ نماز ءَ رند سلام تَرّینت آئی ءَ وتی چندہ ءِ زرّاں زُرتگیں لاؤڈ اسپیکر دپ ءَ کُت ءُ دپ پچ لگوشت: درْستیں لئیبی ءُ لئیب چاروکانی جنانی سْہن کپتگ انت کہ مئے نماز اِش ہراب کتہ۔
بازار ءِ مردماں مُلّا گِپت کہ واجہ مردم باز بوتگ انت، تئی عمر چو نہ انت کہ اینچو حلالہ بہ کنئے۔ فتوا کینسل بوت۔
ہمے جُست کس ءَ نہ کُت کہ واجہ مُلّا، لئیبی وَ سالے یک رندے ٹورنامنٹ کننت، تو وَ گوں وتی بِینگیں اسپیکر ءَ روچے پنچ رندا مہلوکات ءِ گوشاں کُدین ئے۔ بلئے چُشیں جُستے ہر کس بہ کنت دین ءِ دشمن انت۔
مذہب ءُ مُلّا یک نہ انت۔ آ دگہ گپے کہ تو مُلّا ءِ رَدی ءَ رَد بہ گُشے آ پِر ترّیت ترا دین ءِ بدواہ گُشیت۔ وہداں کہ ناں سائنش بوتہ ناں فلسفہ ءِ علم، مذہب ءَ ایشانی جاگہ گِپتہ۔ نادْراہیاں بِگر داں ہؤر ءُ گوْات ءِ اسرارانی توجیل انسان ءَ مذہب ءِ تہا شوہاز اِتہ۔ مذہب انسانی زانت یا نازانتی ءِ بُن مات انت۔ آ زَمانگ ءَ جہان ءِ رازانی سرپدی ءِ ڈُبّہ مذہب ءَ گوں بوتہ۔
فلسفہ ءُ سائنش رندا اتکگ انت۔ بلے انچیں جاگہ دنیگہ باز انت ہودا سائنسی زانت سَر نہ بوتہ۔ بلوچ چاگرد ءَ سئیل کن۔ ذہنی نادرہاہ ءَ مُلّلا ءِ کرّا بَرنت کہ جِن ءَ گپتہ۔ مُلّا تاں ہما وہدا پہ لَٹ ئےِ چوپیت کہ نادراہ توبہ مہ کنت ءُ مہ گُشیت منی جِن چہ چُکّیں لَنکُک ءَ در شُتہ۔ سَگندان ہراب انت گشنت ناپگ ئےِ کپتہ۔ پاد ءِ پینز یا ماتی لنکک ءِ سرا ناپگ تنا وہدے دارگ بیت کہ روتے بہ سِدیت۔ نُنّک ءَ اَہمَکی گیپت مُلّا ءِ کرَا دم ءُ چُپ ءِ واستا بَرنت اِش۔ مرد دگہ سانگے مہ کنت، جَن سِہر ءُ سامَڑی ءَ مُلّا ءَ پانَگ اِنت۔
بلے ہمے مُلّا ءِ لاپ گیس بہ بیت ڈاکٹر ءُ ہسپتال پَش نہ گیجیت۔ کجام مُلّا پہ وتی نادرہائی ءِ علاج ءَ دومی مُلّا ءِ کرّا پہ بند ءُ تائیت ءَ شُتہ؟ آ زانت کہ دنیا ءِ نیکوکارتریں مُلا تُری آئی ءِ سجّئیں اندام ءَ دَم بہ کنت آئی ءِ گیس نہ رؤت، تنا وہدے کہ گیس ءِ گولی ءَ مہ وارت۔ بلے ہمے مَرد ءِ کرَا یکے بئیت کہ منی سَر درد کنت، پِیت ءِ پرْائی ءِ تائیتے دنت ئےِ کہ سر ءِ بند وش بئے۔ ہجبر آئی ءَ ہمے سوج ءَ نہ دنت کہ ڈاکٹر ءَ برؤ یا سر دردی گولی یے بہ ور۔
پدا ہمے مُلّا کئے انت؟ اگں ماتے ءَ پَنچ چُک آؤرتہ، آہانی تہا ہما کہ چہ درْستاں کُنٹ ذہن تِر اِنت ءُ اسکول ءَ کِلاسے ہم دیما شُت نہ کنت آئی ءَ را مدرسہ ءَ دیم دیگ بیت، یا ہما ورناہیں بَچ کہ نشہی ءُ آوارہ انت تبلیگ ءَ راہ دیگ بیت کہ بلکیں ہدا ءِ تُرس ئےِ دل ءَ بہ نندیت ءُ شر بہ بیت۔ ہمے درکئیت مسیت ءِ پیش امام بیت یا جہاد ءَ رؤت وتا ءُ ایدگراں پہ ہور ءُ تہور ءِ لالچ ءَ ترْاکینیت۔
مُلا ءِ لالچ دو انت۔ ہورانی ہَمزانی ءِ ہُبّ ءَ یا وتا بہشت ءَ رسینیت یا ہمے دنیا ءَ چار جَنین سانگ کنت ءُ آہانی لاپ ءُ ہرچ ءِ چِن ءُ لانچ وتا ہر کار، ہر جیڑہ ءِ زانوگر کنت۔ چُک ءِ گوش ءَ بانگ دنت زر گیپت، نماز وانینیت زر گیپت، جنازہ دنت زر گیپت، دم ءُ چُپ کنت زر گیپت۔ تو شکر ءِ نادراہ ئے یا کینسر ءِ، اگں تئی کیسگ یا پندول ءَ زَر مان، مُلا نہ گُشیت آئی ءِ کرّا علاج نیست۔
زاہر انت ہر مُلّا چوش نہ انت۔ چُشیں دین زانت ہم کپتہ کہ تیوگیں عمر ءَ یکّیں جن ءِ مہر ءَ گوازیننت۔ ناں وتا ترْاکیننت ناں دگراں۔ بلئے چُشیں مُلا نیست کہ آئی ءَ مذہب وتی لاپ نہ کتہ۔
مذہب ءَ مُلّا پَکار نہ انت، بلئے مُلّا ءَ بے مذہب ءَ شُدے جَنت۔ اگں دین ہدائیگ انت ءُ ہدا ہست ءُ سلامت انت وَ چرائی ءَ شَرتر کَس دین ءَ پہریز اِت ءُ وشنام تِر کُت نہ کنت۔ بلے مُلّا ءَ دین پہ وتییگی کُتہ ءُ وتا ہدا ءِ ترجمان۔ پمیشکا مردمانی نزّیکی چہ دین ءَ گیشتر گوں ملا ءَ انت۔
اگں تو اے گُہہ وارت ءُ جُست کُت کہ واجہیں مُلّا انسان ءُ ہدا ءِ نیام ءَ تو چے کنئے، ہمے نیمون ءَ دنت کہ مردمے بے ڈاکٹری ءِ وانگ ءَ اگں علاج کُت نہ کنت، گڈا کسے بے دین ءِ علم ءَ چوں دین ءَ سرپد بیت، چوں ہدا ءِ شون داتگیں راہ ءَ زانت کنت؟ اے بے بُنیں ہبرے نہ انت۔ بلئے ہمے مُلّا کہ نزانت میڈیکل کالج چی یے چوں دنیا ءِ درْاہیں نادراہیانی علاج ءَ پہ بند ءُ تائیت ءُ دم ءُ چُپ کنت؟
پدا دین ءِ زانتکاری تہنا چندے آیتانی دل یاد کنگ نہ انت ناں اِش کُتگیں حدیثانی پہ زورے نُکّ ءَ عربی رنگ ءَ تاب دیگ ءُ وانگ انت۔ اسلام ءِ تاریخ ہزاراں سال دراج انت۔ یک لکھ ءُ بیست ءُ پنچ ہزار پیگمبر ءِ دین انت کہ واجہیں محمد ءَ کامل کتہ۔ اسلام ءِ تاریخ ءِ زانَگ وتی جاگہہ ءَ تو ء مُلّا لکھ ءُ بیست ءُ پنچ ہزار پیگمبرانی تہا سد ءِ نام ءَ نزانئے۔
میڈیکل سائنس اگں نوکیں درمانے جوڑ کنت امریکہ ءِ قانون ءِ ہساب ءَ تاں 12 سال ءَ آ چکّاسگ بیت کہ ایشی ءِ شرّی ءُ ہرابی چی انت، چرائی ءَ رند ءَ آئی ءَ را بہا کنگ ءِ اجازت دیگ بیت۔ بلے انگہ لہتیں درمان درکئیت کہ 30 سال ءَ رند زانگ بیت کہ آئی ءِ تاوان چہ نَپاں گیشتر انت ءُ ہود ءِ سرکار آئی ءَ را بند کنت۔
بلئے مُلا ءِ دین زانتی ہمیش انت کہ حدیثے کہ آئی ءِ تب ءَ کپیت ہر دیوان ءُ ہر واز ءَ ہمیشی ءَ پِرلیسیت بلے ہمے یکّیں حدیثانی کتاب ءِ دگہ حدیثے گوں مُلّا ءِ ہاجتاں دپ مہ وارت آئی ءَ دگرے بوانیت درْنجگی انت۔ مثال ءِ ہبر ءَ صحیی بخاری ءَ مان اِنت کہ بی بی عائشہ ءَ درَائینتہ کہ پیگمبر ءَ شیرکنی ءُ بینَگ وش بوتہ۔ مُلّاہانی لِلّک دم نہ بارت ہمے حدیث ءِ شون دیگ ءَ۔
صحیی بخاری ءِ سرا مُلاہاں سِتک انت۔ ہمیشی ءِ پنجاہ ءُ نہمی کتاب ءِ حدیث نمبر 741 ءِ ہساب ءَ بی بی آئشہ ءُ ابن عباس ءَ درَائینتہ کہ پیگمبری ءِ رَسَگ ءَ رند آ دہ سال مکّہ ءَ نشتہ ءُ پدا دہ سال مدینہ ءَ۔ بلے صحیی بخاری ءِ پنجاہ ءُ ہشتمی کتاب ءِ حدیث نمبر 242 ءِ ہساب ءَ ابن عباس ءَ درّائینتہ کہ واجہیں پیگمبر تاں سیزدہ سال ءَ مکّہ ءَ نِشتہ، پدا مدینہ ءَ شُتہ۔
ملّا ءِ دینی زانت چے گشیت مردم چرے دوئیں حدیثاں کجامی ءَ بہ منّیت؟ جاگہے گُشیت دہ سال مدینہ ءَ نشتہ ءُ جاگہے سیزدہ سال۔
اے ہبراں کنئے ملا ءِ گڈّی ارز ہمیش بیت کہ دنیا ءِ توامیں علم ءُ زانت پاکیں قران ءِ تہا انت، دگہ علم ءِ سرا وہد زوالی کنگ نہ لوٹیت۔ اگں چوش انت گڈا ہدا پاکیں قران ءِ بیستمی سورت ءِ آیت نمبر114 ءَ چیا گُشیت کہ ”بہ گُش، یا اللہ، منی علم ءَ گیش بہ کن“؟ پنجاہ ءُ ہشتمی سورت ءِ یازدہمی آیت اے وڑ انت: اللہ شمئے تہا ہماہاں دوست داریت کہ آہاں ایمان آؤرتہ ءُ ہماہاں کہ علم دیگ بوتگ۔ قران ءِ تہا یک سد ءُ پنچاہ ءُ دو آیاتانی تہا ”علم“ ءِ لبز 161 رند ءَ اتکہ۔
مُلا پمشکا علم ءِ حق ءَ نہ انت کہ اگں مردم بزاننت، چم پچ بہ بنت، آ نزانتکاریں مُلّاہانی مہتاج نہ بنت۔ چوش کہ بہ بیت مُلا ءِ لاپ چوں درکئیت۔ آئی ءِ چاریں جنانی دوچی ئیں پوشاک ءُ لاپ ءِ ہرچ چوں درکئیت؟
پمیشکا آئی ءَ سائنس یا علمی دیمرئی ءِ دارَگ ءِ واستا سِینَگ مِک کُتہ اوشتاتہ۔ وہدے یورپیاں پانزدہمی صدی ءَ پِرنٹنگ پریس جوڑ کُت مُلّاہاں فتوا دات کہ نبا کنئے قران یا ایدگہ اسلامی کتاباں کافرانی اڈ داتگیں مشین ءِ دپ ءَ بہ دیئے۔ خلافت ءِ زمانگ ات۔ سلطان بزاجِت دوہم ءَ 1483 ءَ پرمان دات کہ ہر کس ءَ اے فتوا ءِ ناپرمانی کُت کُشگ بہ بیت۔
عیسائیاں بائبل پرنٹگ مشین ءِ دپ ءَ دات ءُ روچے ہزارانی ہساب ءَ چاپ ءُ شِنگ کُت۔ مُسلمان نِشت انت پہ وش ہَتّی قران ءِ نبشتہ کنگ ءَ۔ ماہ ءُ سال گوْست انت یک کتابے ءِ سرجم بوگ ءَ۔ چار اِت اش چو نہ بیت، نوزدہمی صدی ءَ پرنٹنگ پریس مسلماناں انچو وتیگ کُت نہ گُشئے کافرانی جوڑ کُتگین چیزے۔
فوٹو ءِ کَشّگ گناہ انت۔ ٹی وی چارَگ کُفر انت۔ پرچہ، واجہ مُلّا؟ فوٹو ساہ مان کَنَگ لوٹنت۔ ایدگہ مذہبانی مُلّا ٹی وی ءِ دیما نِشت انت واز اش کُت۔ یکّیں وہد ءَ تیوگیں دنیا ءَ آہانی ہبر سر بوت۔ اسلام ءِ تبلیگی در پہ در اتنت۔ شلوار اش لانتگ ات، دنتان سپا کنوکیں لٹّک اش کیسگ ءَ ات لوگ پہ لوگ اتنت مہلوک ءَ وتی راہ ءِ آرگ ءَ۔ پدا چارِت اش چو ما پَشت کپیں۔ مرچی مُلّاہاں ریش ہنّی کُتگ انت ءُ چہ ٹی وی ءِ دیم ءَ پاد نیاینت۔ حج ءِ سر ءَ سیلفی کَش ءُ کا انت۔ اُشتر ءِ اولاک کنَگ ءِ سُنّت ءِ پدگیری ءَ کس نہ کنت، کافرانی جوڑ کُتگیں گاڑیاں سوار اَنت۔
سائنس ءِ دیم ءَ ناں اسلام ءِ مُلّا داشت کننت ءُ ناں ایدگہ مذہبانی۔ مرچی بلوچستان ءِ وڑیں پد منتگیں جاگہے ءَ ہر جنین ءِ پندول ءُ مردین ءِ کیسگ ءَ اسمارٹ فونے مان۔ اے اسمارٹ فون تہنا پہ وش گپّی ءُ کلہ ءُ ہال ءَ نہ انت۔ اے سائنسی علم ءَ لوگ لوگ ءَ رسینگ ءَ انت۔ سیٹلائٹ جَنگ بوگا اَنت کہ ہر جاگہ ءَ انٹرنیٹ نیست ہود ءِ مردماں مُپت ءَ اے آسراتی بہ رسیت۔ اے تیزی ءَ گوں سائنس کہ دیم ءَ روگا انت، دیر نہ گوْزیت کہ مُلّا لاپ ءَ بہ کپیت۔
ہمے تُرس انت کہ مُلّا گنوکی ءَ گپتگ انت ءُ وتی روزگار ءِ دارگ ءِ واستا گُڈی زور ءَ جنَگا انت۔ برے نوک ورناہاں سِکین دینت کہ وتا ترْاکین ئے، برے اسکولاں جننت، برے لائبریریاں آس دینت ءُ برے وانندہیں مردماں تیربار کننت۔ بلے کُنٹ ذہنیں مُلا ءَ ناں پیسرءَ سائنس ءِ دیم داشت کُتہ ناں نوں کنت ئےِ۔
آہاں ہر جَنے گِرگی انت مَہلا بہ گِرنت کہ آہانی روزگار رَوگی انت۔
Sajid Hussain (1981-2020) was a writer and senior journalist from Balochistan. He had a degree in Economics, International Relations and English Literature from Karachi University. He had the experience of working with Pakistani newspapers Daily Times and The News International. Sajid Hussain was also the founding editor of this online magazine.
