Á róchién kyámatá kay béhayál bekant

88

É wabáay mósomá man yak paymá jérhagá atán ke chón o che paymá watá gón áiay badaná nazzikk bekanán. Maróchi márá dah róch sarjam at ke cha yakdomiá jetá, wati shapán róch kanagá atén. Árósay awali shapá ke man cha áiay badanay sázán malár atán, maná hecch gomán néstat ke anchén wahdé ham kayt ke man cha é mehrabánén badanay malárán zebahra bán.

Maróchi dah róch sarjam at ke á, kwárantin wárdhá waptagat o wenthilaytharay payp áiay poppán at ke pa dam kasshagá komakk kanagá at, ke nun pa ájói dam kasshagá damesh bortagat. Begenday é damáná á jérhagá bebit ke “Kadi é wabáay mósom cha mani sará bechotthit o man do bar gón abramay shirkenén hawáay lezzatá hawár dam kassháná, é shahray abétkén sirkagán homár bebán”, bale man chó jérhagá naatán.

Man jérhagá atán ke é kwárantin wárdhay bashánagay tahá áiay badanay héd chónén lezzaté wadia kanant. Agan é wenthilaytharay paypay jágahá man wati lonthán áiay lontháni sará ér bekanán o áiá dam kasshagá komakk bekanán, begenday áiay popp gésh ásudag bebant. É wabáay mósomá, ke harkas watá cha ensánay sáhegá dur, rakkénagay johdá at, nazánán parchá man angat áiay badanay sehrá gardesh kanagá atán o maná samá baygá at ke á ham cha é gappá áshná ent.

Maná na wabáay parwáh hastat o na wabá-ámácháni. Maná á chizzay ke parwáh at, á, áiay pákén badan at. Hán, agan maná dega chizzéay parwáh hastat, á esh at ke wabáay halás bayagá pad áiay badan angat hamá paymá táhira bakshit yá na. Man dega géshter jérhagay janjálá naatán. Gwashay pa dega chizzay jérhagá wahd ham néstat. Mani delá at ke hamé dmáná segréthé rók bekanán o áiá tawár bekanán: “Mani arwáh! porchandhá kammé télánk day. Taw chinchok dur neshtgay. Kammé nazzikkter byá.” Man johdá atán ke kammé démá bekenzán. Haminchoká man porchandh o badanay nyámá rasetagatán ke kessahay nedárah matth but.

Annun shap ent. Dhanná chath hámóshi ent. Sajjahén métag ensertagant. Maná hámóshi sakk dósta bit o shap paméshká dósta bant ke har némagá hámóshi ent. Maná hámóshi cha har chizzá dósttera bit. Cha kasániá mani yak wáhagé hamesh ent ke donyáay sajjahén mardom bemerant, bass tahná mani jend pasht bekapit o man donyáay goddhi mardom bebán… maná pura modám yakin ent ke yak róché kayt ke donyáay sajjahén mardom pajjigá merant, abéde mani jendá. É hayál maná sakk mazaha dant. Har némagá hámóshi bebit, o man chó Fridric Brownay kárestá, tahná, kóthiéá nendók bebán o anágahá kasé dará bejant. Hámóshiay proshagay dard o dar janókay zánagay waswás ke yakjágaha bant, kamála kanant o kessahay nedárahá yakbaré padá mattha kanant.

Man modám ke segréth rók kortag, áiá porchandh zortag o átkag o mani kashá neshtag. Chónáhá ázmánk nebeshtah kanag o ketáb wánagay wahdá man báz segrétha kasshán. Baré baré wa segréthay talab mabit ham, dast watsará wat gón segréthay dhabbiá sar o potha bit. Pa man, cha gránterén wahdán yakké hamesh ent ke man ázmánk nebeshtah kanagay yá ketáb wánagay wahdá dastá pa segréthay dhabbiá bebarán o á hálig bebit, o washterén gapp esh ent ke áiá maná beh cha segréthay kasshagá makan nakortag. Baré baré wa wat cha mani dastá segréthi poletag o ténz ténzá yakk o do dami jatag. Cha ed o pésar ke man gappé bekanán, modám pésh kaptag: “Mardom, yár! báid ent tahná enjwáay makant” o man bechkandetg, bale maróchi awali randá maná samá bayagá at ke áiá cha mani segréthay duttán bad áyagá ent. Nazánán chiá, bale man cha tahá sakk ajálat bután. Cha wati jágahá pád átkán, darigay sham pach kort o dhanná cháragá atán. Jérhagá atán ke daray thokkókay pad janagay waswás agan maná daray pach kanag beparmáit o man begendán ke daray dapá mani arwáh óshtátag, hamesh ent nóki cha kwárantin wárdhá dar átkag o wadárá ent ke maná begendit, á chinchok molura bit ke man ódá naán.