Home / Balochi / انسانی تاریخ ءِ سرا گونڈیں چمشانکے

انسانی تاریخ ءِ سرا گونڈیں چمشانکے

اشی ءِ مزنیں بہرے تاج بلوچ ءَ چہ سمیر محراب ءِ انگریزی نبشتانک ءَ رجانک کُتگ۔

آ کجام بود اِنت کہ ما انسانءَ را چہ اِندگہ سجہیں سہداراں بالاتِر کنت۔

اسلءَ جینَس ہومو بزاں انسانی نسلءِ تہا ہزاراں سال پیسر، بید ء مارا بازیں دگہ انسانی زات ہوار بوتہ۔ انچو کہ کُچک، روباہ، گُرک یکّیں نسلءِ دگہ دگہ زاتءِ سہدار انت۔ پیشی، شیرءُ پُلنگءِ نسل یک انت۔ ہمے ہسابءَ انسانانی ہم باز زات بوتگ انت۔ آہانی تہا ہومواِریکٹَس، ہوموہَیبیلِس، ہوموہیدلبرجِنسِس، نِیَنڈرتل، ہومونَلیدی ہوار بوتگ انت۔ بلے اے درُست وہدءِ ہمراہیءَ گار بوتگ اَنت۔ نوں تہنا یک زاتے پش کپتگ کہ آئی ءَ سائنسءِ زبانءَ ہوموسَیپِیَنز گُشنت۔ انوں کہ ہر انسانے دنیاءِ تہا است انت، اے درست ہوموسیپینز انت۔

انسانءِ درستیں زاتانی تہا اے چیز یک بوتگ کہ آ گَردَگءَ چاردستءُ پاد نہ بوتگ اَنت، دو پادءِ سَرا گَشتگ اَنتءُ دَست اِش آزاد بوتگ اَنت۔ ہمے سببءَ اشاں گوں وتی دستاں بازیں اوزار جوڑ کتہءُ چرے اوزارانی کارمَرزیءَ اشانی دیمرویءِ راہ پچ بوان بوتگ انت۔

بلے مئے، ہومو سییپینزانی تہا یک انچیں صفتے بوتگ کہ اے دگہ سہدارءُ انسانی زاتانی تہا نہ بوتگ۔ مئے زبان چہ اندگراں شاہگان تر بوتگءُ مئے تہا کسہ جوڑ کنگءِ بود مان بوتگ۔ نامداریں اسرائیلی دپترنویس یووال ہراری گشیت کہ ہمے کسہ آرگءِ بودءِ برکتءَ ما، بزاں ہوموسیپینزاں ایدگہ انسانءُ سہدار زیر دست کُت کتگ انت ءُ دنیاءِ ہاکم جوڑ بوتگیں۔

انسانانی بازیں ذات

وتی شاہکاریں کتاب ”انسانانی گونڈیں تاریخ“ ءِ تہا یووال ہراری نویسیت کہ ہمے کسہ آرگءِ بودءِ سببءَ مئے زاتءِ انسانءِ تہا ہمکاریءُ یکے دومیءِ کُمک کنگءِ سِنچ اتکہءُ ہمے ہمکاریءِ سببءَ ما چہ ایدگہ سہداراں باج بُرتگ۔

انسان دگہ ہر ہسابءَ چہ گیشتر سہداراں نزور تِر انت۔ بلے ایدگہ سہدارانی تہا ہمکاریءِ بود آ ہسابءَ نیست کہ انسانءِ تہا ہست انت۔ اگں تو یک شادوءُ یک انسانے جنگلءَ یلہ بدیئے شادو شرتر زندگ بوت کنت۔ بلے اگں تو ہزار شادوءُ ہزار انسان جنگلءَ یلہ بدیئے گڑا انسان شرتر زندگ بوت کننت۔ چیا کہ ہزار شادو وت ماں وتا ہمکاری کُت نہ کننت بلے ہزار انسان وت ماں وتا ہمکاری کُت کنت۔ آیانی ہمے ہواریں زورءُ طاقت آیانءَ چہ شادواں بالاتر کنت۔ یک پہ یکءَ انسان چہ شادوءَ نزور تر اِنت۔

چوناہا گیشتر ساہدار وڑے ناں وڑےءَ وت ماں وتا گپ کُت کننتءُ کمو باز ہمکاری کُت کننت۔ مثالء ہبرءَ، اگں یک شادوے شیرے بہ گندیت آ یک انچیں آوازے کشّیت کہ ایدگہ شادو سہی بنت کہ نزّیکءَ شیرے ہستءُ وتی سرءَ گِرنت۔ بلے شادو وت ماں وتا اے گپءَ کُت نہ کننت کہ اگں دیمی رندا ما شیرے دیست گڑا ما درست آئیءَ مان ترّینیںءُ گِریں۔ تہنا مئے انسانءِ زبانءِ تہا اے شاہگانی ہست کہ ما وتی پِرگوْست، ہستءُ بانداتءِ گپءُ کسّہاں کُت کنیں۔

شادو یا ایدگہ سہدار تہنا کسانیں تعدادےءَ وت ماں وتا ہمکاری کُت کننت۔ اگں زور بہ جننت تہنا سد شادو ہمکار بوت کنت۔ ہما کہ یکے دومیءَ پجّاہ کارنت، چہ مزنیں مُدتےءَ ہمراہ بوتگ انت۔ تہنا ما انسان ہزاراں، لکّان، کروڑانی ہسابءَ ہمکاری کُت کنیں۔ مثالءِ ہبرءَ دنیاءِ گیشتر مسلمان وڑے ناں وڑے ہمکاری کننت۔ بلوچاں فلسطینءِ مُسلمان پہ چم ندیستگ انت، ناں کسّے پجہ کارنت بلے انگہ آیانی واستا آواز چِست کننت۔ چوش ہجبر نہ بیت کہ بلوچستانءِ شادو پہ فلسطینءِ شادواں آواز چِست بہ کننت۔ چیا کہ بلوچستانءِ مسلمانءُ فلسطینءِ مسلمان یکیں مذہب، یکّیں اسلام، یکیں کسّہءِ منّوک انت۔ انسانءِ درستیں دیمرئیءِ سبب ہمے ہمکاری انت۔

وہدے ہومو سیپینز، بزاں مئے زاتءِ انسان، چہ افریقہءَ لڈّتہءُ یورپءَ شُتہ، تہ نینڈرتل کہ دگہ انسانی زاتے بوتگ چہ پیسرا اودا موجود بوتہ۔ نینڈرتل زاتءِ انسان دگہ ہر ہسابءَ چہ مارا شرتر بوتگ انت۔ آیانی جسم چہ مئے جسمءَ مہکم تر بوتگ۔ آیانی سَرگ چہ مئے سَرگءَ مستر بوتگءُ ہوشءَ پُرتِر بوتگ انت۔ آیاں ہم اوزار جوڑ کُتہ۔ ننڈیرتَل، چہ ما پیش یورپءَ موجود بوتگ اَنتءُ اودءِ موسمءِ رِپک اِش چہ ما پیسر چِتہ۔ بلے آہاں مئے وڑا گپ جَت نہ کُتگ، مئے وڑا کسہ جوڑ کُت نہ کتگ، مئے وڑا ہمکاری کُت نہ کُتگ۔ پمیشکا مئے زاتءِ انساناں آ جتگءُ گَلّینتگ انتءُ آہانی زات وہدءِ ہمرائیءَ ہلاس بوتگ۔ ما ہزاراں، لکّانی تعدادءَ ہمکاری کُت کُتگءُ نینڈرتل انساناں چہ سدءِ تعدادءَ بُرز ہمکاری کُت نہ کُتگ۔

چو کہ ہوموسَیپِیَنانی زُبان چہ اِندگہ انسانی نَسلانی زباناں گیش ترقی یافتہ بوتہ، پمیشکا ہوموسَیپِیَناں شَرتریں شکارجاہءُ دگہ آسراتیانی شوہاز شَرتِر کُرت کتہ۔ ننڈیرتَل، چہ ما جسمانی سورتءَ تواناتِر بوتہ بلے مئے زُبانءُ مئے ہمکاریءِ بودءِ دیم ئِے داشت نہ کتہ۔

بلے مئے تہا اے بود چہ بنداتءَ گوں نہ بوتگ۔ ہپتاد ہزار سالءَ پیش مئے زبان چو نہ بوتگءُ ما ہم چو ایدگہ سہداراں چہ سَدءَ گیشترءِ تعدادءَ ہمکاری کُت نہ کتگ۔ بلکنہ ما چہ گیشتر سہداراں ہر لہازءَ نزور تِر بوتگیں۔ شیرءَ شِکار کُتگ، ہپتارءَ شتگ جون وارتگءُ بس کہ ہڈ پش کپتگ، انسانءَ شُتگ ہڈءِ مجگ کشّتگ وارتگ۔

بلے ہَپتادہزارءَ پیسر سال مئے زاتءِ انسانی تہا زبانءِ یکے آشوبے کئیتءُ مئے زبان چہ ایدگہ سہدرانی زباناں گیشتر شاہگان جوڑ بیت۔ ما ہما گرانتِرینءُ پیچیدہ تریں چیزانی درشانءَ کُت کنیں کہ شادو، ماہیگ، پِیلءُ اندگہ سہداراِش کُت نہ کننت۔ اِندگہ سہدارانءَ وت ماں وتءَ ہبر کنگءِ واستا زُبان وَ بیت، بلے آہانی زبان بَس لہتیں بُنیادی چیزانی درشانءَ کُت کنت۔

ہراری مسال دنتءُ گوشَیت کہ یک ہوموسَیپِیَنے کئیتءُ میتگءِ مردماں گوَشیت ”من پِلاں کورءِ کِرّا یک مزارے دیستہ کہ گوکانی سَرا کپتہ“۔ نوں میتگءِ درہیں مردم نندنت ہبر کننت کہ چے کنگ بہ بیت۔ مَزار تاچینَگ بہ بیتءُ گوک شکار کنگ بہ بنت۔ بلے اِندگہ سَہدارانی زُباناں یک نہ یک رنگےءَ تہنا اے گوَشت کتہ کہ ”شیرے“، دانکہ ہما سَہدار تَتکءُ وتا رَکّینت بکننت۔ ہمے ہسابءَ ہوموسَیپِیَنانی زبانءِ تہا اے بود بوتہ کہ نہ دیستگیں چیزانی ہم اظہار کرت کتہ، چو کہ جِنّ، ہُدا۔ آوتی زبانءِ بَرکتءَ کِسّہ جوڑ کنت، ہما چیز کہ تو اِش نہ گِندئے، حقیقتءَ نیست انت بلے ما وتی زبانءِ برکتءَ آہان سازِت کنیں۔ ما وتی اے جوڑ کُتگیں کسّہانی سر ءَ باور کنیںءُ پریشانی واستا یکے دومیءَ ہمکاری کنیں۔

پنچ سد سال پیسر امریکہ نامیں ہچ چیز نہ بوتگ۔ پدا لہتیں مردم نشتگءُ امریکہءِ نامءَ یک ریاستے، یک کسّہے سازتہ۔ کروڑاں مردماں ہمیشیءِ سرا باور کُتگ۔ نوں بلے درست وتا امریکی گُشنتءُ پہ امریکہءِ دیمرئیءِ واستا گوں یکے دومیءَ ہمکاری کننت، بلّ ئِے کہ آ یکے دومی ءَ نہ گندنت، پجّاہ نیارنت۔

شکاری انسان

بنداتی زمانگاں، انسان کَسان کَسانیں ٹولیاں نشتگ انت۔ آ شکاری بوتگ اَنت۔ ہراری گوَشیت کہ اے ٹولی ہجبر کمءُ گیش چہ سَد کَسءَ نہ گوَستہ۔ چیا کہ انسان ءَ چدءُ گیشءِ کِساسءَ یک جاگہ بوّگءِ بود مان نہ بوتہ۔ انچو کہ اِندگہ سہدار کننت، اے الّمی بوتہ کہ درہیں ہوار نندوکیں مردم یکے دومیءَ را شَرّیءِ سرا بزاننت، چوکہ یکیں خاندانءِ مردم یا سنگت یکے دومیءَ زاننت۔ ہَراری گوَشیت کہ کِساس ہپتاد ہزار سال پیسر، ما انسانءَ یک نوکیں بُودے چِتہ، کہ ہراری اشیءَ کاگنیٹیو آشوبءِ نامءَ دنت۔ اے نوکیں بود زُبانءُ کسّہ جوڑ کنگءِ لائکی انت۔ اشیءِ بُنیادءَ ہیالءُ لیکہ جوڑ کنگءُ درشان بوت کنان کنت۔ ہما مردم کہ یکیں کسہءِ سرا باوَر کنان کننت، ابیدء یکے دومیءِ زانگءُ پجارگءَ، گوں یکے دومیءَ بندوک بُوّان کننت، گوں یکے دومیءَ ہمکار بوان کننت۔

ہمے ہمکاریءُ کُمک کاری، کشارآشوب یا زرعی آشوبءِ بنیاد بوتگ۔ مَدان مَدانءَ شہر، ملکءُ دین جوڑ بوتگ اَنت۔ بلے ادا ہم ہَراریءِ ہبر نوک اِنت۔ ہَراری، کشاورزی آشوبءَ دُنیاءِ مستریں دروگءُ جُگاڑ گوشیت۔ بِل تُری چہ کشاورزی آشوبءَ انسان گیشتر وراکءُ گیشتر مردم یک جاگہ نزّارگءَ سوبین بوتہ، بلے اشیءَ انسان بَزّگ تِرءُ گَنتِر کتہ۔

بنداتی وہدءُ زمانگاں، انسانءَ شکاری زندے گوازینتگ۔ آہاں ایدگہ سہدار شکار کُتگءُ وارتگ انت، کاہءُ نیبگ چِتگءُ وارتگ۔ ہر جاگہءَ کہ کاہءُ شکارءُ آپ گیشتر بیت ہمودا رونتءُ نندنت۔ اگں اودا ہشُک سالی بوتگ تہ لڈّتگءُ نوکیں جاگہےءَ آباد بوتگ انت۔

بلے کشارورزیءِ ہیل گرگءَ پد آ یکّیں جاگہءَ جہہ منند بنت۔ مزنیں کورانی کشءُ گْوراں ڈگار آباد کننت، گَلّہ کِشنتءُ کشارءِ چارءُ گزارءَ کننت۔ شکار آہانی دستءَ یلہ بیت چیا کہ گیشتر وہدئِے ہمے کشارءِ پانَگیءُ پہازءَ گوزیت۔ ہمے جہمنندیءِ سببءَ شہر جوڑ بنت، انسانی آبادی گیش بیت۔

بلے ہراری گُشت کہ چہ کشار ورزیءَ رند انسانءَ وتی آزادی باہینت۔ شکاری ئیں انسانءَ کار کَمتِر کتہءُ وراک شَرتریں وارتہ۔ پیسرا آیاں وڑ وڑیں گوشتءُ نیبگ چِتگءُ وارتگ۔ کشاری ورزیءِ زمانگءَ آئیءِ وراک بس گلّہءُ دگہ یکءُ دو کشار بوتگ انت۔

کشاوَرزی آشوبءَ رَند انسان مجبور بوتہ کہ گیشتر وہدا وتی ڈگارانی سرا کار بکنت، سجّہیں روچءَ سَر سلونٹکی

کشارورزی ءِ زمانگ

بنندیتءُ پُلگیچ بہ گوجیت۔ چریشیءَ انسانءِ سرین نزور تِرتّگ چیا کہ انسانءِ جسم آ وہدا پہ چشیں کارےءَ عادت نہ بوتگ۔ کشارءِ ہرابیءُ کَہتءُ ڈُکّال کہ بوتگ سَداں ہزار مردم مُرتہ۔

شکاری سندءِ زمانگءَ، مردماں گیشتر ارزانیءَ وتی جاگہ بدل کت کتہ، ہر وہدا کہ بَرّی کاہءُ شکار یک جاگہےءَ کَم تَرّ اِتہ، تہ مردم لَڈّ اِتہءُ دگہ جاگہے جہہ منند بوتہ۔ بلے کشاوَرزی زندےءِ تہا کہت سالیءِ سببءَ تو وتی ڈگارءُ وتی لوگءَ یلہ داتءُ شُت نہ کنئے۔

ہراری گوَشیت کہ انسانءَ گَلّہ رامَہ نہ کتہ۔ گَلّہءَ انسان رامہ کتہءُ داشتہ۔ ما وتی سَک باز وَشتریں زندے پہ اے دانءِ فائدہءَ یلہ داتہءُ اے دانءَ را وتی زندءِ مستریں مَڈّی یے جوڑ کتہ۔ اے سپرءَ مئے سجہیں دلءُ دین گوں ہمے گپءَ بوتہ کہ چوں اے دانءَ را چہ ہراب بُوّگءَ، چہ کَہتءُ ڈُکّالءَ بِرَکّینینءُ چوں اشیءَ گیشءَ گیش آبِدان بکنیں۔

ما ہزاراں سالءَ ہمے گپءِ سرا کپتہ بوتگیں کہ چونیءَ اے بَرّی کاہءَ داں مروچیگیں گَلّہءَ سَر بکنیں۔ ما کہ لَڈّءُ بار کتہ، تہ اے دانءِ توم گوں وتا زُرتہ گوں، ءُ اے تومءَ را نوک نوکیں زمین دئیان کتہ۔ نوں ہَراری گوَشیت کہ کشاوَرزی تہذیبءِ کِسّہ، اسلءَ اے کسہ اِنت کہ چوں یک بَرّی کاہے دانائیں سَہدارےءَ را وتی چَمدار کنت۔

کتاب ءِ تہا دیمترا ہراری گوَشیت کہ پہ انسانءِ ہمکاریءُ ہواریءَ زَرءُ ہکومتءِ مزنیں کردارے۔ زَرّ ہما چیز انت کہ دُنیاءِ ہر مردم اشیءِ سرا باور کنت۔ اُسامہ بن لادنءَ را گوں امریکہءَ مسئلہ بوتگ بلے گوں امریکی ڈالرءَ ہچ وڑیں جیڑہ ئےِ نہ بیت۔

زرءِ جندءَ را بِستارے نیست کہ کاگدی چُنڈُکے۔ چو کہ مارا درستاں زَرّءِ قدرءُ بستارءِ سرا سِتکءُ باور اِنت، تہنا ہمے سِتک اشیءِ بستارءِ سبب انت۔

یکبرے کہ تو مردمانی بلاہیں آبادی یے، یکیں کسّہءِ باور کنگءِ واستا تیار کرت کت، تو مزنیں ہکومتءُ مزنیں بینک ہم جوڑ کرت کنئے۔

مزنیں ہکومتءُ ایمپائر کہ جوڑ بوت اَنت، تہ بیوروکریسی ہم جوڑ بوت دانکہ چیزانی ہسابءَ بداریتءُ کاراں ترتیب بدنت۔ اولی نبشتہ رَہبند پرے ہاترا جوڑ بیت کہ ملکتءُ مالیاتانی ہساب دارگ بوت بکنت۔ سُمیریاں نبشتہ رَہبندے جوڑ کرتگ اَت کہ آئیءِ کار تہنا زمینءُ مالیاتانی ہسابءِ دارگ اَت۔ اے نبشتہ رَہبندءَ شعرءُ کسہ نبشتہ کنگ بوت نہ کتگ اَت، چیا کہ اے گیشتر ہساب کتابی حَرف اتنتءُ زیمری نشان اتنت کہ تہنا پہ یک ہاسیں کارءُ مَکسدےءَ جوڑ کنگ بوتگ اَت۔

نبشتہ رَہبند رَندا شاہگان تِر بوت انتءُ اشانی تہا انسانی زندگیءِ درہیں تکءُ پہناتاں نبشتہ کنگءِ گنجائش اتک۔ نبشتہیں زُبانءُ ہکومتانی تشکیل، چہ یکے دومیءَ سِستگیں انسانی چاگردانی تہا وتی وتی رنگءَ دیما روان بوتگ انت۔ کمءُ گیش چہ یکے دومیءَ نا سَہی، بلے یک رَنگءَ، ءُ گیشتر یکیں وہدا۔ چہ میسوپوتامیہءَ بگر داں مصر، ءُ چہ چائناءَ بگر داں نیامی امریکہءَ، انسان، کمءُ گیش یکیں رنگءَ ہکومت جوڑ کنگا مشکول بوتہءُ نبشتہ رَہبند چیزانی ہساباں داران بوتہ۔ یووال ہراری پکّا گُشت نہ کنت کہ پرچہ اے درہیں انسانی چاگرد، یکیں وہدا، یکیں رنگیں سیاسیءُ چاگردی عملءَ گوْستگ انت۔ اے گپءِ ہم دلجمیں جواب نیست کہ پرچہ اے درہیں چاگردانی واکءُ اختیار مدام مردینانی دستءَ بوتگ۔

مئے انّوگیں انسانی چاگردءِ جُنزگءُ اشیءِ داشتءِ توانءِ یک مزنیں بُنیادے زَرّ اِنت۔ ہَراری گوَشیت زَرّ،انسانءِ مستریں ایجاد انت۔ زَر ہما چیز اِنت کہ دژمنءَ ہم دوست اِنت۔ ایسائییاں مُسلمان جتگءُ کُشتگ انت بلے آہاں ہجبر اِسلامی سُہرءُ تلاہءِ زورگءَ انکار نہ کتہ۔ ہمے رنگءَ اُسامہ بن لادن امریکہءِ دژمن بوتہ، بلے آئیءَ را گوں امریکی ڈالرءَ ہچ رنگیں دژمنی یے نہ بوتہ۔

وہداں کہ زر نہ بوتگ انسانءَ مٹءُ بدلءِ سرا سودا کُتگ۔ مثالءِ ہبر اگں مں گلّہ کشتگءُ دگرےءَ پس داشتگ۔ اگں منا پس پکار بوتگ من آئیءَ را گلّہ داتگءُ آئیءَ منا پس۔ ہمے ہسابءَ چاگردءِ تہا یکے دومیءِ لوٹ پیلہ کنگ بوتگ انت۔ اے قسمءِ سودائیءَ بارٹر گُشنت۔ بلے بارٹرءِ سرا تہنا کسانیں چاگردانی لوٹ پیلو بوتگ انت۔ پہ مزنیں ہکومتءُ ایمپائرانی معاشی نظامءِ واستا اے کامیاب نہ بوتگ۔ پمیشکا انسانءَ زر جوڑ کُتگ۔ ترا ہرچیزے پکار انت، تو زرءِ سرا بہا زرت کنئے۔

دینءُ سیاسی لیکہانی پَیما، زَرّءَ را ہم اسلءَ وجودے نیست۔ اے ہم چہ ہما ہیالءُ کسہاں یکے کہ انسانی باوَرءَ وت سازتگ انتءُ آہانی سرا باور کُتگ ئےِ۔ زرّءَ را دگہ یَکءُ ٹِکّیں راستی نیست۔ اگاں تو شادویےءَ را یک ڈالرے بدیئے، ءُ بگشئے کہ وتی دستءِ موزءَ منا بدئے، شادو ہجبر اے سوداءَ نہ جنت گوں۔ یا اگاں شادویےءَ را بگشئے کہ وتی دستءِ موزءَ منا بدئے، اشیءِ بدلءَ ترا بہشتءَ سے موز رسیت، شادو نہ کنت گوں۔ اے تہنا ما ایں کہ کسہانی سرا اے کَدءَ باوَر کنیں، ءُ ہمے چیز مارا چہ شادوآں جتا کنت۔

ہَراری گوَشیت کہ انسانی حقوق دگہ یَک ہمے رنگیں ہیالءُ کسہے کہ اصل حقیقتءَ نیست اِنت۔ آ گوَشیت کہ انسانی حقوق ہم، اندگہ بازیں ہیالءُ لیکہانی پَئیما مئے ہیالانی تہا ہَست اِنتءُ بَس۔ مارا چہ میراسءَ انسانی حق گون نیست، ءُ انسانی حق وہد پہ وہد بدل بنت۔ مرچی ما اے گپءَ مَنّیں کہ سیاہءُ اسپیتیں مردمءِ حق برابر اَنت، بلے گوستگیں زمانگءَ ما اے گپ نہ مَنّ اِتہ۔ سائوتھ افریقہءَ وَ یک وہدے سیاہیں مردم کَمتریں انسان گَشگ بوتگ اَنت۔ سیاہیں مردمانءَ اسپیتیں مردمانی تیاب دپءِ گَردگ ہم نَیشتگ اِش۔ اے کار اِش اے واستا نہ کتہ کہ اسپیتانی پوستءِ تہا چہ روچءِ اسَرءَ رکّگءِ شرتریں نظامے بوتہ۔ اسپیتانی پوستءِ سرا روچءَ گیشتر اَسَر کتہ۔ بلے مردمءِ زہنءَ یک برے کہ یک گپےءِ سرا باوَر کت، پدا اشیءِ سرپد کنگءُ بَجّینگ گران اِنت۔ یک کسّہےءِ بدل کنگءِ واستا ترا دگہ یَک انچیں کسّہے ٹہینگءُ جوڑ کنگ کپیت۔

کشاوَرزی آشوبءِ جوڑشت، شہری ریاستءُ رَندا مزنیں ایمپائراں پہ اولی بازراجیں ملکءِ جوڑ بوگءَ راہ پچ کت۔ یک وہدے اَت کہ شکاری ئیں مردم کَسانیں میتگءُ کَلّگاں نندوک اَت کہ ہر یکےءَ دومی مردم پجاہ آوُرت، بلے اے مزنیں ایمپائرانی سیمسرانی تہہءِ مردمانی زبان یکیں نہ بوتہ، یکیں قومءُ یکیں نسل ہم نہ بوتگ اَنت، دودمان اش ہم یکیں نہ بوتہ، ہُداءُ دین اِش ہم یکّیں نہ بوتہ۔

ہَراری گوَشیت کہ اگاں تاریخءِ یک مخصوصیں وہدےءَ انسانءَ یَک ہُدائیں دین مہ زُرتینءُ باز ہُدائیں دین یلہ مداتیننت، تہ انسانءِ تہا برداشتءُ اوپار ہم گیشتر بوتگ اَت۔ آ نشان دنت کہ ہما وہدا کہ انسانءَ یَک ہُدائی دین زُرتہ، انسانی چاگردءِ تہا مذہبی زوراکیءُ شدت ہم گیش بوتہ۔ انسانی تاریخءِ تہا اینکسیں مزنیں مذہبی تشدد پیسرا ہجبر نہ بوتہ کہ یک ہُدائیں دینانی آہگءُ رائج بوگءَ رَند بوتہ۔ آ گوشیت کہ رومءِ بادشاہیءِ وہداں رومن ہاکماں ہج جاگہ نہ گپتہءُ آ مردم دینءِ بدل کنگ نہ پرماتگ اَنت۔ رومن زورگپتیں ہندانی مردمانءَ اے آزادی بوتہ کہ وتی پتءُ پیرُکی دینءِ ہسابءَ عبادت بکننت، بلے یک ہُدائیں دیناں مردم جتہءُ مذہبءِ بدل کنگ پرماتگ اَنت۔ ما اے چیز زرباری امریکہءُ افریقہءَ گوں ایسائیاں دیستہءُ انڈیاءُ پرشیاءَ گوں مسلماناں۔

ہمے رنگءَ کہ زَرّ، مذہب، کِسّہءُ مِتھ، ایمپائراں نوکیں جہانی دودمان، یا نوکیں جہانی ماشی نظامءِ جوڑ بُوّگءِ ہم سَوَب گوَشیتءُ یورُپی نوآبادیاتءِ سَوَب ہم کہ ہمے چیزانی سَوَبءَ یورپءَ یک وہدے دُنیاءِ سرا ہاکمی کتہ۔ ہَراری سوال کنت کہ یورُپ، پَنچ سَد سالءَ پیسر وَ دنیاءِ معاشیءُ سیاسی طاقت نہ بوتہ، دُنیاءِ معاشیءُ سیاسی طاقت ہندوستانءُ چینءِ دستءَ بوتہ۔ داں ہَبدہ سَدءُ پَنجاہءَ وَ یورپءِ ٹیکنالوجیکل لیوَل چہ اِندگہ جہانءَ دیماتِر نہ بوتہ۔ گُڑا سَوَب چی اِنت کہ رَندا یورپ اے راہءَ جہانءِ اِندگہ مُلکاں گوازینیت۔

مُغل یا تُرک یا چینی ایمپائر کہ آ وہدی ہچ ہسابءَ چہ یورپءَ نِزورتِر نہ بنت، پرچا چہ اِشاں یکے ہم امریکہءَ در نہ گیجیت، امریکہءَ نہ گیپت۔ آ چینی جہان پَٹّ، ژینگءِ مسالءَ دَنت کہ چاردہ سَدءُ پَنجاہ تا چاردہ سَدءُ سیءُ سےءِ مِنگ بادشاہءِ زَمانگءَ سے سَد بوجیگ ئِے گوں سی ہَزار جانشوءَ گون بیتءُ سجّہیں بحرء ہندءُ افریقہءُ اِندگہ جاگہاں رئوت، بلے وہدے بیجنگءِ ہکومت بدل بیت تہ نوکیں ہاکم گوَشنت کہ مارا دَریاوَردیءِ ہاجَت نیست اِنت، تہ ژینگءَ را ہما نکشہ یا اِلم کہ چہ دریاوَردیءَ رَسیت، آ درُست گار بیت۔

بلے چاردہ سَدءُ نَوَدءُ دوءَ کولمبس گوں سے کَسانیں بوجیگءُ سَدءُ بیست مردمءَ امریکہءَ رئوت، ہالانکہ کولمبسءِ مردمءُ بوجیگ سَک باز کَمتِر بنت۔ ہَراری گوَشیت اے گپ زاہر اِنت کہ یورپ آ دورءَ چہ اِندگہ ملکاں دیماتِر نہ بوتہ، بلے شوہازگءِ شوقءُ ملکانی گِرَگءِ واہشت یورپءَ اَنچو دیما بَران کنت کہ ہَژدہ سَدءُ پَنجاہءَ دُنیاءِ ہاکم جوڑ بیت۔ اِندگہ جہان اے واستا پشت کپیت کہ آہانی کِرّا اَسباب نہ بنت، یا اگاں اے بلوٹنت تہ ہما وہدا کہ انڈسٹریلائزیشن شروع بیت، اے ہم گوں کَپت کننت گوں، اَنچو کہ فرانس، جرمنیءُ امریکہ رَندا سپرءَ ہوار بنت بلے رَندا طاقت جوڑ بنت۔ ہَراری گوَشیت کہ یورپی چاگردءِ بُنیاد ہمے رنگءَ ایر بیت کہ نوکیں چیزءَ جَذب کت کنت، نوکیں ہیالءُ آشوبءِ قبول کنگ یورپءِ واستا آسان بیت، بلے تُرک، ہندوستان، چین، عربانی فکرءُ دودمانءِ بُنیاد اَنچش بیت کہ جہان پَٹّی یا نوکیں زانتءِ ہُبّءُ واہگ آہانی تہا نہ بیت۔

فرانس، جرمنیءُ امریکہ دیرءَ رند اے سپرءِ تہا ہوار بنت بلے وتا گون گیجنت۔ ایشیاءِ تہا اے واہگءِ جند نہ بیت۔ ہمے گپءَ دیما برانءَ، ہَراری گوَشیت کہ یورپی ایمپائر اولی ایمپائر بیت کہ سائنسءُ ایمپائر دست ماں دست بنتءُ دیما روان بنت۔ سائنس، ایمپائرءَ فائدہ دَنتءُ ایمپائر، سائنسءِ دیمرویءِ واستا کار کنت۔ یورپیانی کِرّا نوکیں چیزانی زانَگ، نوکیں چیزانی پَٹّگ شَرّی یے بیت۔ امریکہءِ شوہازگءَ رَند یورپیانءَ دنیاءِ باروا وتی کَمزانتیءِ احساس بیت۔ وتی کوہنیں زانتءِ سَرا باور نہ کننت، ہما زانت کہ آئیءِ بُنیاد ایسائیتءِ سَرا بیت، چیا کہ ایسائی ہُدا، امریکہءِ باروا ہچ نزانت، بائبلءِ تہا امریکہءِ ہچ ذِکر نیست اِنت۔ نوں یورُپی وتی مذہبءُ وتی ہُداءِ زانتءِ سَرا ہم شَکّ کننت۔ یورپءَ را نوکیں ملکانی گِرَگءِ وہدا، یا کارءُ بارءِ تہا ہرچی نوکیں علمے رَسیت، اے زُوران کنتءُ وتی نازانتیءَ مَنّیت۔ بلے مشرق، انگہ وتی ہما کوہنیں علمءِ سرا اوشتیت، جہانءِ چارگءِ واستا مشرقءِ کِرّا پئیمانہ ہما کوَہنین بنت، نوک اِش نہ کنت۔

ہَبدہ سَدءُ شَستءُ ہَشتءَ وہدے رائل سوسائٹی، جیمز کوکءِ سربراہیءَ سائنسدانانی یک ٹولی یے روان دنت کہ دنیاءِ مختفلیں علاقہاں برئویتءُ روچءُ زمینءِ نیامءِ دوریءَ کَچّءُ ماپ کن اِت، ہمے ٹولیءَ ہَشت سائنسدان ہم ہوار بیت کہ ہمے ہندانی درَچک، دار، دَلوَتءُ مردمانی باروا معلومات نزّ کارنت۔ اے ٹولی چہ پیسیفِک زِرءَ رئوتءُ آسٹریلیاءُ نیوزیلینڈ وڑیں جاگہاں مالومات یجّاگہ کنت۔ ہمے زانت رندا آہانءَ زمینءُ ملکانی گِرَگءَ سک باز کُمک کنت۔

ہَراری گوَشیت کہ چہ یورپءِ زورگیری یا کالونائزیشنءَ سک باز مردم ظلمءُ زوراکیءِ آماچ بوتہ، یورپی اِسپیت پوستاں وتی فائدہءَ ابید دگہ ہچ نہ چارِتہ، بلے تاوان وتی جاگہءَ، چہ یورُپی اِمپیرئیلزمءَ بازیں فائدہ ہم بوتہ۔ مرچی ما درُست یک نہ یک وڑےءَ یورپی پوشاک پوشیںءُ مئے سجہیں سیاسیءُ معاشی دُنیاءِ بُنیاد یورُپی لیکہءُ نظریہانی سرا اِنت۔ مرچی چین بِلّ تُری معاشی ترقی کنگا اِنت، بلے آئیءِ معاشی نظام یورُپی اِنت۔ یورپءَ ہر ملکے کہ گِپتہ، آئیءِ زُبان، دودمان، سیمسر، ہرچیزءِ باروا پٹّءُ پول کُتگ۔ انگریز کہ ہندوستانءَ کایَنت، تہ اودا سروے بندات کننت۔ سروے ہَژدہ سَدءُ دوءَ بندات بیت، داں شَست سالءَ۔ انگریز ہندوستانءِ باروا ہر چیزءَ زاننت، کوہ، جنگل، درچکءُ دار، دانکہ مائونٹ ایورِسٹءِ بُرزی ہم اولی رَندا ہمے زمانگءَ کَچءُ ماپ کنگ بیت۔ ہمے پئیما ہَژدہ سَدءُ سیءُ شَشءَ ہِنری رولِنسن نامیں انگریز فوجی اَفیسرے، خط میخی، یا کیونیفارمءِ وانگءِ راہءُ درے در گیجیت، کہ چہ اشیءَ کوَہنیں میسوپوتامیہءِ دودمانءِ وانگءُ زانگءَ کُمک رَسیت۔ ہمے رنگءَ کوَہنیں ہندوستانی دودمان بہ بیت یا گوں اِنڈس سِوِلائزیشنءَ بندوکیں موہنجوداڑو، چہ انگریزانی آہگءَ پیسر، ہچ ہاکم اشانی سرا پَٹّءُ پول کنگءِ جہدءَ نہ کنت۔

یورُپی ایمپائراں وتی زورگپتیں ہندءُ ملکءُ اودءِ مردمانی تاریخ، دومانءُ ہرچیءِ باروا پٹءُ پول کرتگءُ زانتہ، پمیشکا آہانی پَنچ ہزار فوجی افیسر، چِل تاں ہَپتاد ہزار فوجیءُ دگہ لَکّ تاجرءَ سے سَد ملین ہندوستانیءِ سرا تاں دوسَد سالءَ ہاکمی کتہ۔ چہ یورُپی ایمپائراں پیسر، اِندگہ دُنیا وتی کَشءُ کِرّءِ ملکءُ مردمانی باروا سَک کمّ زانت، یا زانگءِ جہدءَ ہم نہ کنت۔ ہرمن کورٹیز، یک اَسپینی قبضہ گیرے بیت، وہدے پانزدہ سَدءُ نوزدہءَ، کیوباءَ کَسے آئیءَ ہال دنت کہ میکسیکوءَ یک سیرءُ آبادیں ایمپائرے ہست اِنت کہ آزٹِک ایمپائر گوَشگ بیت، گُڑا کورٹیز، لہتیں بوجیگءُ پَنچ سَد سپاہیگ زوریتءُ رئوت آزٹکءَ۔ وہدے اودا سر بنت، اودءِ مردماں گوَشنت کہ مارا اسپینءِ بادشاہءَ دیم داتگءُ مارا پہ آزٹکءِ بادشاہءَ پیگامے گون، مارا بادشاہءِ کِرّا بہ بر اِت۔ آزٹِک ایمپائر چہ وتی کَشءُ کِرّءَ بے سما بیت۔ نزاننت کہ کورٹیز اسپینی قبضہ گیرےءُ اندگہ جاگہاں مردمانی سرا چونیں ظلمءُ زوراکی ئِے کتہ۔ اگاں آ سرپد بوتین انت، تہ بلکیں آہاں کورٹیز وتی بادشاہءِ کِرّا نہ بُرتگ اَت۔

وہدے کہ کورٹیزءُ آئیءِ لشکرءَ بادشاہ، موکتیزوما دوئمءِ کِرّا بَرنت تہ اے لشکر بادشاہءَ، بادشاہءِ جندءِ کلاتءِ تہا دَزگیر کنتءُ ہمودا بندیگ کنتءُ ہرچی کہ گوَشنت، بادشاہ ہما پئیما کنت۔ ہمے پَنچ سَدیں مردم، کم کمءَ، اے ہزاراں سال برجمیں ایمپائرءَ ہلاس کننت۔ چہ اشانی مالءُ مڈّیءُ زمیناں، پیسرا اسپینیءُ پَدا درہیں یورُپی سیر بُوان کننتءُ آہانءَ چہ امریکہءِ درگیجگءَ، پہ اِندگہ دُنیاءُ جاگہانی گِرَگءِ واستا سک باز کُمک رسیت۔

پانزدہ سدءُ سیءُ دوءَ دگہ یک اسپینی افیسرے، فرانسِسکو پیزارو، گوں سینٹرل امریکہءِ اینکا بادشاہءَ ہمے پئیم کنت کہ کورٹیز آزٹکءَ کنت۔ پیزارو، اینکا بادشاہ، اَتاہُوالپءَ پہ گںدءُ نندےءَ لوٹائینیتءُ اغوا کنت۔ پدا چہ آہاں زَرّ لوٹیت کہ زر بدئیت ما ہاکمءَ یلہ کنیں۔ وہدے زَرّ اِش دئینت، اے بادشاہءَ کُشنتءُ اشانی مَستریں شہر کوزکوءِ سرا حملہ کننتءُ شہرءَ گِرَنت۔ چہ ہمدا اینکا ایمپائر ہلاس بیت۔

ہراری گوَشیت کہ اگاں اینکا ایمپائر وتی کَشءُ گوَرءِ ہالاں سرپد بوتیں، تہ آزٹک ایمپائرءِ ہالءَ سرپد بوتگ اَتءُ ہما رَدی کہ آزٹکاں کتہ، اینکاءَ آ رَدی نہ کتگ اَتءُ پیزاروءَ را وتی بادشاہءِ کِرّا سر بئیگءَ نئیشتگ اَت۔

یورُپی ایمپائرءِ دیما روگءِ سَوَب یکے بوت نہ کنت بلے زانتءُ سائنسءُ نوکیں علمءِ شوہازءَ سَک باز کُمک کتہ۔ پدا یورُپءِ معاشی نظام کہ سرمایہ داری اِنت، یورُپءِ دیمرویءِ تہا اشیءِ ہم مزنیں دستے۔ مرچی یورُپی ایمپائر ہلاس اِنت، بلے آئیءِ معاشی نظامءُ گلوبَل آرڈر پشت کپتہ۔ ہَراری گوَشیت کہ ما اگاں مرچی یورُپی ایمپائرءُ قبضہ گیریءِ سرا تنقید ہم کنیں تہ ہما لیکہ ءُ ہما پئیمانہانی سرا کنیں کہ یورپءَ گیشینتگ اَنت۔ مرچی ہم مردم یک نہ یک رنگےءَ چہ یورُپی ایمپائرءَ فائدہ گِرگا اِنت، نوکیں ٹیکنالوجی بہ بیت، سفرءُ برءُ آرءِ چیز بہ بنت، یا دگہ آسراتی۔

اے گپءِ تہا ہچ شکے نیست کہ ہوموسَیپِیَن، مرچی وتی تاریخءِ وشہالتریں دورءِ تہا اِنتءُ اشیءِ جوڑ کنگءِ ذمہ دار یورُپی ایمائر اِنت۔ بلے اے قبضہ گیریءِ پُشتءَ پہکیں واہشت نیک نیّتی نہ بوتہ۔

ہَراری گوَشیت کہ اے چیزاں درہیں جہانءِ تہا ہوموسَیپِیَنانی ہَمدابیءِ تہا مزنیں کارے کتہ، ءُ انسانی چاگردانی اے ہمدابی اَنگہ دیما رَوان اِنت، ءُ ہاس چہ صنعتی آشوبءَ رَند یک جہانی دومانےءَ سَر چِست کتہ کہ کم کمءَ دیم پہ جہانی ایمپائرےءَ روتءُ رسیت۔

آ گوشیت کہ اگاں ما انسانی تاریخءَ بوانیں، تہ گِندیں کہ انسانی چاگردانی اے ہمدابی یک ترتیبےءِ سَرا دیما روان بوتہ۔ انوں گیشءَ گیش انسانی چاگردءِ نیامءَ ہَمدابی ہَست۔ ما یک جہانی دودمانے رُدَگءَ گِندگا ایں، ءُ اے ہمے گپءِ نشانی اِنت کہ ہوموسَیپِیَن، ہِمداب بُوانءُ گلوبل کمیونِٹی یے جوڑ بُوان اِنت۔

ہَراریءَ را اے تُرس ہست اِنت کہ ما انسان آئوکیں وہدا چہ وتی جندءِ کارکِرداں گارءُ بیگواہ بئیں۔ سائنسءِ انقلاب، کہ مروچیگیں ٹیکنالوجیءِ دورءِ بُنپَد اِنت، بائیوٹینکنالوجیءُ جینیٹکسءِ شعبہاں بُووکیں دیمروی، انسانءَ را اے بودءُ زورءَ مان کننت کہ انسان وتا اَبَدمان بکنت، انسان وتا بے مَرگ کنتءُ سائیبورگ جوڑ کرت کنت۔ اے مُہکم ترینءُ داناتریں مہلوک، ما انسانانی جاگہءَ گیپتءُ انسانءَ یَک کِرّ کنت۔

ارتقائی تاریخءِ تہا اولی رَندا چش بیت کہ بے جانءُ مادی چیزے، جاندارءُ زندگیں چیزےءِ تہا ہوار بیتءُ مردُمءُ مشین ہَمداب بنت۔ اے چیز ہوموسیپیناں ہمینکس بدل کنت کہ مئے وہمءُ گُمانءَ ہم ڈَنّ اِنت، ءُ چہ اے چیزءَ ہما نوکیں امکان ہم وَدی بنت کہ دنیگہ مئے گَتءُ گُمان ہمے بوتہ کہ ناممکن اَنت۔

یووال ہراری ءِ کتاب

اے کتاب سَک وش اِنت۔ من وَ گوَشاں کہ اگاں تُری تاریخءِ سرا کسےءَ وانگءِ دلچسپی نیست ہم، اے چارسَد تاکدیمی کتابءَ الّم بوانیت۔

اے اولی رَند اِنت کہ یک دپترنویسےءَ ارتقائی بیالوجیءُ تاریخ ہوار کرتگ اَنتءُ مئے جندءِ بابتءَ یک شَرتریں دَرے بوتکہ۔

انسان، ہرچیزءِ بابتءَ سک باز زانت۔ بلے ما وتی جندءِ تاریخءُ بانداتءِ چاگردی ارتقاءِ باروا کَم زانیں۔

یووال نوواہ ہَراریءِ کتاب مئے جند، مئے بُندَرءُ مئے بانداتءِ پہمگءِ واستا نوکیں دَر پچ کنت۔

About Sameer Mehrab

Check Also

Tales from the dungeon: Dr Yousuf Murad Baloch (Part I)

This is first part of Balochistan Time’s Tales from the dungeon series in which former victims …

Leave a Reply

Your email address will not be published. Required fields are marked *