Home / Balochi / بلوچستان ءَ مردم شماری

بلوچستان ءَ مردم شماری

صدف مینگل ءِ اے کسانیں نبشتانک کیّا بلوچءَ چہ اردو ءَ رجانک کتگ۔

دروزگ یکےءَ ٹُک اِت۔ چہ تہا پیرزالے ءَ توار پِردات کہ ”کئے اِنت“؟

یکےءَ پسو دات ءُ جست کت: ”ما مردم شماری والا ئیں۔ لوگ ءِ مردم چُنت اَں ہمے جُست ءَ اتکگیں۔ نام لِکّگی اَں“۔

پیرزال ءَ گشت: ”ما شش مردمیں، بلے چار ہمدا ءُ دو بیگواہ‘‘۔

مردم شماری ءِ کارداراں اے گپ وتی اپسرءَ سر کت ءُ گشت کہ ”کل شش مردم اَں بلے دو بیگواہ۔ چے بہ کنیں“؟

اپسرءَ گشت: ”چار مردم ءِ نام ءَ زندگینانی تہا ءُ دو ءِ نام ءَ مرُدگانی تہا نبشتہ کنئے، کہ مردم شماری ءِ فارم ءِ تہا بیگواہانی واستا جاگہ نہ داتگ“۔

ہمے گپءِ اِش کنگ ءَ گشئے پیرزال ءِ سرا گرندے کپت۔ آئی ءَ پِریات کت ءُ گشت: ”مئے نازاکیں بچ واپس کایاں، آہاں زندیاتی ءَ مردگانی تہا ہوار مہ کنئے“۔

پیرزال ءِ توار مردم شماری ءِ کاردارانی پاسپانیں فوجی اَپسر ءِ گوشاں کپت۔ آئی ءَ گشت: ”بلّک، مارا یقین اِں کہ آ نوں نیا اَں“۔

گوْنے گپ ءَ گشئے چہ پیرزال ءِ پادانی چیرءَ زمین لَگُشت۔ آئی ءَ دیوال ءَ تِکہ دات ءُ نشت۔

چارءَ زندگ ءُ دوءَ مردگانی تہا ہوار کنگ ءَ پد مردم شماری ءِ کاردار دیم پہ بشام ءِ لوگ ءَ رہادگ بوتاں کہ آئی ءِ سے چُک سے سال اَت بیگواہ اِتنت۔

About Kiyya Baloch

Check Also

The Baloch Conflict with Iran and Pakistan — book review

By Hassan Hamdam In his latest book, ‘The Baloch conflict with Iran and Pakistan: aspects …

Leave a Reply

Your email address will not be published. Required fields are marked *