Seth Halir

حسّام بلوچ: دگہ راہے ءِ مساپر

تاج بلوچ ءِ اے نبشتانک سیٹھ ہلیر ءَ چہ انگریزی ءَ رجانک کتگ۔ 

حسّام ءَ ہر پِڑ ءَ جاگہ کُت کتگ اَت، بلے سیاست؟ پدا بلوچ ءِ سیاست، کہ پرائی ءَ ترندی ءُ ماں میاتکی الّمی جوڑ بوتگ۔

چوناہا منی وَ گَت ءُ گمان ءَ نہ بوتگ کہ حسّام ءِ اوں گوں سیاست ءَ نزیکی بوت کنت۔ بلے وہدے پانزدہ نومبر ءَ سندھ رینجرز آئی ءَ بارت ءُ گار کنت نوں من سہی بوتاں کہ آ وَ بی ایس او ءِ سنٹرل کمیٹی ءِ باسکے۔

اگاں حسّام ءِ فیس بک ءَ ہم بچارئے تہ مردم ءَ باور نہ بیت کہ اے ورناہ چُشیں چِست ءُ ایرے ءِ بہرے۔ آئی ءَ مدام زندگی ءِ درد ءُ دور نبشتگ اَنت، شائری نبشتگ، ازم ءُ لبزانک ءِ گپ جتگ۔

نوزدہ سَد ءُ نوَد ءُ پَنچ ءَ مند ءَ پیداک بوتگیں حسّام ءَ چہ کسانی ءَ گوں ازم ءُ لبزانک ءَ دوستی بوتگ۔ اسکول ءِ سرجم کنگا پد آ چہ مند ءَ، بلوچی لبزانک ءِ بنزہ، تربت ءِ کالج ءَ رئوت۔ آؤدا آئی ءِ مہر پہ لبزانک ءَ گیش ودّیت۔ کالج ءَ اتکگیں گیشتریں ورناہ دلمانگ بنت کہ آ ڈاکٹر بہ بنت، انجینئر بہ بنت، بلے حسّام لبزانک ءَ درچنت۔

دو ہزار پانزدہ ءَ وہدے کیچ ءِ سیاسی جاور نہ گیگ بنت ءُ ترس ءُ بیمے ودی بیت، حسّام اولی سِمِسٹر ءَ پد تربت ءِ یونیورسٹی ءَ یلہ دنت ءُ کراچی ءَ رئوت۔

حسّام ءِ سنگتے آئی ءَ گیر کاریت ءُ گُشی: ”آئی ءَ مردمانی تہا بہہ وش نہ بوت۔ مدام ایوکی یے شوہازگا اَت کہ بہ نندیت گوں کتاباں سر ءُ چیر بہ بیت“۔

حسّام ءِ دگہ سنگتے گشی: ” بید ء لبزانک، ازم ءُ آرٹ ءَ آئی ءِ کرّا دگہ گپ نیست“۔

کراچی ءَ آہگ ءَ پد آئی ءِ شائری پلگارتِر بُوان بوت۔ حسّام ءِ یک بلوچی شئیرے چو اے وڑا انت۔

 

تو واتر کن، دسمبر بُن گِرگ لوٹیت

دسمبر شت پہ بے برمشی
نیتکئے تو
نیتکئے تو کہ تہناہی مہ جنت زنگءَ
زہیرانی

تئی رہسر نگاہانی ہُدابند اَنت
گشئے اہدءِ شپانکاں من
رمگ زرتگ
ہیالءِ جنگلءَ ویلاں
بلے ڈُکٌال اوستانی منا نئیلیت
من واتر باں گسءَ کایاں
ملامت باں

تئی اندوہ چو اگریچءَ
توامیں نوبتاں سوچیت
تو واتر کن، دسمبر بُن گرگ لوٹیت

Don’t miss posts from Balochistan Times!

We don’t spam!

+ posts

Seth Halir is a UAE-based Balochi writer. He mainly writes short, satirical pieces. He also edits and shoots Balochi films.

Leave a Comment